ފަތުރުވެރިކަމުގެ ދާއިރާއަށް ޚާއްސަކޮށް "ވިޒިޓާ އިކޮނޮމީ ކައުންސިލް"ގެ ނަމުގައި ޚާއްސަ ކައުންސިލެއް އުފައްދަވައިފި
ފަތުރުވެރިކަމުގެ ދާއިރާ ސިންދަފާތުކޮށް ޑައިވާރސް ކުރުމަށްޓަކައި ކުރަންޖެހޭ މަސައްކަތްތައް ކުރާނެ
ރައީސްގެ އޮފީހުގެ އަންޑަރ ސެކްރެޓެރީ ފޮރ ޕަބްލިކް ޕޮލިސީ މުޙައްމަދު ފިރުޒުލް ޢަބްދުﷲ ޚަލީލް ނޫސްވެރިންގެ ބައްދަލުވުމުގައި ވާހަކަފުޅުދައްކަވަނީ
ފަތުރުވެރިކަމުގެ ދާއިރާއަށް ޚާއްސަކޮށްގެން "ވިޒިޓާ އިކޮނޮމީ ކައުންސިލް" ގެ ނަމުގައި ޚާއްސަ ކައުންސިލެއް އުފައްދަވައިފިއެވެ.
މިކައުންސިލް ޗެއަރ ކުރައްވަނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ.
އާދިއްތަ ދުވަހު ރައީސް އޮފީހުގައި ބޭއްވެވި ނޫސްވެރިންގެ ބައްދަލުވުމުގައި ރައީސް އޮފީހުގެ އަންޑަރ ސެކްރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް އަބްދުﷲ ޚަލީލް ވިދާޅުވީ ރާއްޖޭގެ އިގްތިސާދުގެ އެންމެ މައި އަސާސަކީ ފަތުރުވެރިކަން ކަމަށާއި، ފަތުރުވެރިކަން ފުޅާކޮށް ކުރިއެރުވުމަށް ޚާއްސަ އިސްކަމެއް ދެއްވާނެ ކަމަށް ރައީސް މުއިއްޒު ވިދާޅުވެފައިވާ ކަމަށެވެ. އެ މަސައްކަތުގެ ތެރެއިން އެކަމަށް ޚާއްސަ ސަމާލުކަމެއް ދެއްވުމުގެ ގޮތުން ވިޒިޓަރ އެކޮނޮމިކް ކައުންސިލެއް އުފައްދަވާފައިވާ ކަމަށް ފިރުޒުލް ވިދާޅުވިއެވެ.
ފިރުޒުލް ވިދާޅުވީ ފަތުރުވެރިކަމުގެ ދާއިރާ ސިންދަފާތުކޮށް ޑައިވާރސް ކުރުމަށްޓަކައި ކުރަންޖެހޭ މަސައްކަތްތައް ކުރާނެ ކަމަށެވެ. އަދި ފަތުރުވެރިކަން އެހެން ހަރުފަތަކަށް ގެންދިއުމަށް ޚާއްސަ އިސްކަމެއްދޭނެ ކަމަށް ފިރުޒުލް ވިދާޅުވިއެވެ.
ފަތުރުވެރިކަމުގެ ދާއިރާއަށް ޚާއްސަކޮށްގެން ވިޒިޓާ އިކޮނޮމީ ކައުންސިލްގެ ނަމުގައި ޚާއްސަ ކައުންސިލެއް އުފެއްދެވިއިރު، ނާއިބު ރައީސް ހުސައިން މުހައްމަދު ލަތީފް ޗެއަރކުރައްވާ ގޮތަށް ސޯޝަލް ކައުންސިލާއި އިކޮނޮމިކް މިނިސްޓަރު ޗެއަރކުރައްވާގޮތަށް އިކޮނޮމިކް ކައުންސިލް ވެސް ވަނީ އުފައްދަވައިފައެވެ.
