ރައީސް އޮފީހުން މުވައްޒަފުން ވަކިކުރަން ފަށައިފި
ސިޔާސީ މަޤާމުތަކުގައި ނެތް މީހުން ވަޒީފާ އިން ވަކިކުރާތީ އާއްމުންގެ ކަންބޮޑުވުންތައް މީސްމީޑިއާގައި ވެސް ހިއްސާކޮށްފައިވޭ
ރައީސް އޮފީހުގެ މުވައްޒަފުން ވަކިކުރާ ކަމުގެ ކަންބޮޑުވުން ދަނީ ފާޅުކުރަމުން
ރައީސް އޮފީހުން މުވައްޒަފުން ވަކިކުރަން ފަށައިފިއެވެ.
ސިޔާސީ މަޤާމުތަކުގައި ތިބި މުވައްޒަފުން ނޫން އެހެން މުވައްޒަފުންވެސް ރައީސް ޑރ.މުހައްމަދު މުއިއްޒުގެ ސަރުކާރުން ވަކިކުރަމުންދާކަން ހާމަވާ ސްކްރީންޝޮޓްތަކެއް މީސްމީޑިއާގައި ވެސް ވަނީ ދައުރުވާން ފަށާފައެވެ. އަދި ވަޒީފާއިން ވަކިކޮށްފައިވާ މީހުންގެ ތެރޭގައި ފަންނީ މީހުން ހިމެނޭކަން ރާއްޖެ އެމްވީ އަށް ވަނީ ކަށަވަރުކުރެވިފައެވެ. ބައެއް މުވައްޒަފުން ވަނީ އެ މުވައްޒަފުން ވަކިކުރުމުން އެކަމުގެ ކަންބޮޑުވުން ރައީސް އޮފީހުގެ ރަސްމީ ވަޓްސްއެޕް ގްރޫޕްތަކުގައި ވެސް ހިއްސާކޮށްފައެވެ.
ސިޔާސީ މަޤާމުތަކުގައި ނޫން މަޤާމުތަކުގައި ތިބި މީހުން ވަކި ކުރާތީ އެކަމުގެ ކަންބޮޑުވުން ރައީސް އޮފީހުގެ ކުރީގެ އަންޑަރ ސެކޭޓްރީ ފޯ ލީގަލް އެފެއާޒް އަހުމަދު މައުރޫފް ވެސް ވަނީ ހިއްސާކުރައްވާފައެވެ. އޭނާ ވިދާޅުވީ ރައީސް އޮފީހުގެ ޕޮލިސީ ސެކްޝަނާއި ލީގަލް އެފެއާޒް ސެކްޝަނުން މީހުން ވަކިކޮށްފައިވާ ކަމުގެ މައުލޫމާތު ލިބިލައްވާފައިވާ ކަމަށެވެ. އެ މީހުންނަކީ އެ މީހުންގެ ވަޒީފާ އަށް ތަމްރީނުވެފައިވާ ގިނަ ދުވަހުގެ ތަޖުރިބާ ހުރި މީހުންކަން އޭނާ ވަނީ ފާހަގަކުރައްވާފައެވެ. އަދި އާ ސަރުކާރު ހިންގާއިރު ދާއިރާ އަށް އާ މީހުން އެ ތަންތަނަށް ލުމަކީ ރަނގަޅު ގޮތް ނޫން ކަމަށް ވެސް އޭނާ ވަނީ ވިދާޅުވެފައެވެ.
ސިޔާސީ މަޤާމުތަކުގައި ނެތް މީހުން ވަޒީފާ އިން ވަކިކުރާތީ އާއްމުންގެ ކަންބޮޑުވުންތައް މީސްމީޑިއާގައި ވެސް ހިއްސާކޮށްފައިވެއެވެ.
