ވޯލްޑްކަޕް ކޮލިފައިންގައި އޮސްޓްރޭލިޔާއިން ބަނގްލަދޭޝް ކޮޅަށް ހަތް ލަނޑު ޖަހައިގެން ކޮލިފައިން މެޗުތައް ފެށިއިރު އިންޑީޔާއިން ކުވޭތު ބަލިކޮށްފި އެވެ.

ޕްލޭއޯފްގައި ދިވެހިރާއްޖެ ބަލިކޮށް، ގްރޫޕް ސްޓޭޖަށް ދަތުރުކުރި ބަނގްލަދޭޝް ކޮޅަށް އަމިއްލަ ދަނޑުގައި އޮސްޓްރޭލިޔާއިން ގޯލު ޖަހަން ފެށީ ހަތަރު ވަނަ މިނިޓުން ފެށިގެންނެވެ.

ދެކުނު އޭޝިޔާގެ ގިނަ ޓީމުތައް ވަނީ އޭޝިޔާގެ ގަދަ ޓީމުތައް އަތުން ބަލިވެފަ އެވެ. މި ގޮތުން ޔޫއޭއީ އަތުން ނޭޕާލް ބަލިވީ 4-0އިންނެވެ. ލުބުނާނާއި ފަލަސްތީން ކުޅުނު މެޗު ނިމުނީ 0-0އިން އެއްވަރުވެގެންނެވެ. ބަހުރޭން މޮޅުވީ ޔަމަން އަތުން 2-0އިންނެވެ. ޕާކިސްތާން ބަލިވީ ސައޫދީ އަރަބިއާ އަތުން 4-0އިންނެވެ. އިރާގު މޮޅުވީ އިންޑޮނީޝިއާ އަތުން 5-1އިންނެވެ. އަފްގާނިސްތާން ބަލިވީ ގަތަރު އަތުން 8-1އިންނެވެ.

އިންޑިޔާއިން ގައުމުން ބޭރުގައި ކުވޭތު ބަލިކުރީ 1-0އިންނެވެ. މެޗުގެ ހަމައެކަނި ލަނޑު ޖެހީ 75 ވަނަ މިނިޓްގައި މަންވީރު ސިންގެވެ.