ވެނެޒުއޭލާ އަތުން މޮޅުނުވެވުމުން، ބްރެޒިލް ދެވަނައަށް ސޮއްސާލައިފި

ވަރލްޑްކަޕް ކޮލިފައިންގެ ދެކުނު އެމެރިކާ ގްރޫޕްގައި ވެނެޒުއެލާ އަތުން މޮޅުނުވެވުމުން ބްރެޒިލް ދެވަނައަށް ސޮއްސާލައިފިއެވެ.

މެޗުން މޮޅުވެގެން ގްރޫޕްގެ އެއްވަނާގައި ދެމިއޮތުމުގެ ފުރުޞަތު އޮތަސް, ވެނެޒުއެލާއިން ބްރެޒިލް ހުއްޓުވުމުން އެފުރުޞަތު ގެއްލުނީއެވެ. މެޗު އެއްވަރުވީ 1-1 ނެވެ. މެޗުގައި ބްރެޒިލްއަށް ލަނޑުޖަހައިދިނީ އާސެނަލްއަށް ކުޅެމުން އަންނަ ޑިފެންޑަރ ގަބްރިއެލް މަގާޅައެސް އެވެ. ނޭމާ ނެގި ކޯނަރު އޭނާ ގޯލަކަށް ބަދަލުކޮށްލީ ބޮލުން ފޮނުވާލައިގެންނެވެ. މެޗުން ބްރެޒިލް މޮޅުވިޔަ ނުދީ ހިފެހެއްޓީ ވެނެޒުއޭލާގެ ފޯވާޑް އެޑުއާޑް ބެލޯ އޯވަރހެޑުން ފޮނުވާލި ބޯޅަ ގޯލަށް ވައްދާލައިގެންނެވެ.

މިނަތީޖާއާއެކު ތިން މެޗުން ބްރެޒިލް ދެވަނައަށް ސޮއްސާލީ ހަތް ޕޮއިންޓާއެކުއެވެ. އެއްވަނާގައި އޮތީ ތިން މެޗުންވެސް މޮޅުވެ އާޖެންޓީނާއެވެ. އާޖެންޓީނާ އެންމެ ފަހުން ކުޅުނު މެޗު ކާމިޔާބުކުރީ ޕެރަގުއޭއާ ވާދަކޮށް 1-0 ނެވެ. މެޗުގައި އާޖެންޓީނާގެ ލަނޑު ޖެހީ ކުރިން މެންޗެސްޓަރ ސިޓީއަށް ކުޅުނު 35 އަހަރުގެ ޑިފެންޑަރ ނިކޮލަސް އޮޓަމެންޑީއެވެ. މިގޯލްގައި މެސީގެ ދައުރު ބޮޑެވެ. އަނިޔާއަށްފަހު ފިޓްވަމުން އަންނަ މެސީ މެޗުގައި ކުޅެން ނިކުތީ 53 ވަނަ މިނިޓްގައެވެ. މިއީ އޮޓަމެންޑީ 106 މެޗުން ޤައުމީ ޓީމަށް ޖަހައިދިން ފަސްވަނަ ލަނޑެވެ.

މިގްރޫޕްގެ ތިންވަނާގައި އޮތީ 2-2 ން އުރުގުއޭއާ އެއްވަރުކުރި ކޮލަމްބިޔާއެވެ. އެއީ ފަސް ޕޮއިންޓާއެކުއެވެ. އުރުގުއޭ އޮތީ ހަތަރު ޕޮއިންޓާއެކުއެވެ.