ގާދޫގައި ޓްރާންސްޝިޕްމަންޓް ބަނދަރަކާ އެކު، ބަންކަރިންގެ ޚިދުމަތް ތައާރަފް ކުރަން މުއިއްޒު ނިންމަވައިިފި
16 ނޮވެމްބަރު 2023 | ބުރާސްފަތި 17:48ގާދޫ އަކީ އެންވަރަމެންޓް މިނިސްޓްރީން ހިމާޔަތްކޮށްފައިވާ ރަށެއް
ލ. ގާދޫ
ލ. އަތޮޅު ގާދޫގައި ޓްރާންސްޝިޕްމަންޓް ބަނދަރަކާއެކު، ބަންކަރިންގެ ޚިދުމަތް ތައާރަފްކުރެއްވުމަށް އިންތިޚާބީ ރައީސް ޑރ. މުހައްމަދު މުއިއްޒު ނިންމަވައިފި އެވެ.
ޑރ. މުއިއްޒު މިފަދައިން ނިންމަވާފައިވަނީ ބުރާސްފަތި ދުވަހުގެ ރޭ ބޭއްވި، އެމަނިކުފާނުގެ ފުރަތަމަ 100 ދުވަހުގެ ޕްލޭން، "ހަފުތާ 14" ލޯންޗުކުރުމަށް ބޭއްވި ޙަފުލާގައެވެ.
އެ ޖަލްސާގެ ކުރިން ވެސް، ކެމްޕޭނުގެ ތެރޭގައި ލ.ފޮނަދޫއަށް ވަޑައިގެން ވެސް މުއިއްޒު އެފަދައިން ވިދާޅުވި އެވެ. އެގޮތުން އެ ދުވަހުގެ ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ ގާދޫ އަކީ ޓްރާންސްޝިޕްމަންޓް ބަނދަރަކާއި، ބަންކަރިންގެ ފެސިލިޓީ ހިމެނޭ ތަނަކަށް ހަދައިދެއްވާނެ ކަމަށެވެ.
މުއިއްޒު އެފަދައިން ނިންމެވިއިރު، ލ. ގާދޫ އަކީ އެންވަރަމެންޓް މިނިސްޓްރީން ހިމާޔަތްކޮށްފައިވާ ސަރަހައްދެކެވެ. އެގޮތުން ހިމާޔަތްކޮށްފައިވާ ސަރަހައްދެއްގައި އެފަދަ ބަނދަރެއް ތަރައްގީ ކުރަން ނިންމެވުމާ ގުޅިގެން ތިމާވެށި ރައްކާތެރިކުރުމަށް ވަކާލާތުކުރާ ޖަމިއްޔާއެއް ކަމަށްވާ އީކޯކެއާ މޯލްޑިވްސް އިން ވެސް ވަނީ ކަންބޮޑުވުން ފާޅުކޮށްފަ އެވެ.
އެގޮތުން އެ ރަށަކީ ވެލާ އަދި ކަހަނބުގެ ބާވަތްތައް ގިނައިން ބިސްއަޅާ ރަށެއް ކަމަށާ އަދި އެ ރަށަކީ ނެތުމުގެ ނުރައްކަލަށް ހުށަހެޅިފައިވާ ތަފާތު ގިނަ ބާވަތްތަކެއްގެ ދިރޭ ތަކެތި ދިރިއުޅޭ ސަރަޙައްދެއް ކަމަށް އީކޯ ކެއާއިން ބުނެއެވެ.
