ޑރ. މުއިއްޒު ހުވާކުރައްވާ ޖަލްސާއަށް ރައީސް ޞާލިޙު ވަޑައިގަންނަވާނެ
ރައީސް ޞާލިހު މި ޖަލްސާގެ ދައުވަތު ޤަބޫލުކުރެއްވި ނަމަވެސް، ކުރީގެ ރައީސް ޔާމީން މި ޖަލްސާގައި ބައިވެރިވެވަޑައިނުގަންނަވާ
ރައީސް ޞާލިޙު އަދި ޑރ. މުހައްމަދު މުއިއްޒު
ހުކުރު ދުވަހުގެ ހަވީރު ޑރ. މުހައްމަދު މުއިއްޒު ރައީސުލްޖުމްހޫރިއްޔާކަމުގެ ހުވާ ކުރައްވާ ޖަލްސާއަށް، ރައީސް އިބްރާޙީމް މުހައްމަދު ޞާލިޙު ވަޑައިގަންނަވާނެކަމުގެ މައުލޫމާތު ލިބިއްޖެ އެވެ.
"ރާއްޖެ އެމްވީ" އަށް އެނގިފައިވާގޮތުން، ރާއްޖޭގެ އަށްވަނަ ރައީސުލްޖުމްހޫރިއްޔާ ކަމުގެ މަގާމަށް ޑރ. މުހައްމަދު މުއިއްޒު ހުވާކުރައްވާ ޖަލްސާގެ ދައުވަތު، ރައީސް ޞާލިޙު ވަނީ ގަބޫލުފުޅު ކުރައްވާފަ އެވެ. އެކަން ރައްޔިތުންގެ މަޖިލީހުގެ އިދާރާގެ ކޮމިއުނިކޭޝަންސް ޑިރެކްޓަރު ހަސަން ޒިޔާއު ވެސް ވަނީ ރާއްޖެއެމްވީއަށް ކަށަވަރުކޮށްދެއްވާފަ އެވެ.
ރައީސް ޞާލިހު މި ޖަލްސާގެ ދައުވަތު ޤަބޫލުކުރެއްވި ނަމަވެސް، އިންތިޚާބީ ރައީސްގެ ކެމްޕޭނުގެ ޕޯސްޓަރުތަކުގައި އެންމެ ގިނައިން ފޮޓޯ ހުންނެވި ކުރީގެ ރައީސް ޔާމީން މި ޖަލްސާގައި ބައިވެރިވެވަޑައިނުގަންނަވަ އެވެ.
ޑރ. މުއިއްޒާއި އިންތިޚާބީ ނާއިބުރައީސް ޙުސައިން މުޙައްމަދު ލަޠީފް މަޤާމުގެ ޤާނޫނީ ހުވައި ކުރައްވާނީ މިކަމަށްޓަކައި މިއަދު ހަވީރު 4:45 ގައި ޖުމްހޫރީ މައިދާނުގައި ބާއްވާ ރައްޔިތުންގެ މަޖިލީހުގެ ޚާއްސަ ޖަލްސާއެއްގަ އެވެ. މި ޖަލްސާގައި 46 ޤައުމެއްގެ 120 އަށް ވުރެ ގިނަ މަންދޫބުން ބައިވެރިވެވަޑައިގަންނަވަ އެވެ.
