ޣައްޒާއަށް އިންސާނީ އެހީތެރިކަން ފޯރުކޮށްދިނުމުގެ މަގު ހުޅުވުމަށް އދ.ގެ ސަލާމަތީ މަޖިލީހުން ޤަރާރެއް ފާސްކޮށްފި

ޣައްޒާއަށް އިންސާނީ އެހީތެރިކަން ފޯރުކޮށްދިނުމުގެ މަގު ހުޅުވުމަށް އދ.ގެ ސަލާމަތީ މަޖިލީހުން ޤަރާރެއް ފާސްކޮށްފި އެވެ.

މި ޤަރާރުގެ ދަށުން ޣައްޒާއަށް އިންސާނީ އެހީތެރިކަން ފޯރުކޮށްދޭނެ މަގެއް ތަނަވަސްކޮށްދޭންޖެހޭއިރު ޣައްޒާގައި ތިބި ބަލިމީހުން އެތަނުން ނެރެވޭނެ ސަލާމަތްތެރި މަގެއް ތަނަވަސްކުރުމަށް ވަނީ ގޮވާލާފައެވެ.

މަލްޓާއިން އދ.ގެ ސަލާމަތީ މަޖިލީހަށް ހުށަހެޅި މި ޤަރާރުގައި މުޅި ޣައްޒާގައި އިންސާނީ އެހީތެރިކަމަށް ބޭނުންވެފައިވާ ފަރާތްތަކަށް އެ އެހީތެރިކަން ފޯރުކޮށްދެވޭނެ މަގު ތަނަވަސްކޮށްދިނުމަށް ވަނީ ގޮވާލާފައެވެ.

އަދި އެކަމަށް އެކަށީގެންވާ މުއްދަތެއް ދިނުމަށް ގޮވާލާފައިވާއިރު ހަމާސްގެ އަތްދަށުގައި ތިބި އަސީރުން އެއްވެސް ޝަރުތެއްނެތި ދޫކޮށްލުމަށް ވެސް ޤަރާރުގައި ބުނެފައިވެއެވެ.

15 މެންބަރު ޤައުމު ހިމެނޭ ސަލާމަތީ މަޖިލީހުގެ 12 ޤައުމުން މި ޤަރާރާއި އެއްކޮޅަށް ވޯޓުދިންއިރު އެއްވެސް ޤައުމަކުން އެކަމާ ދެކޮޅަށް ވޯޓެއް ނުދެއެވެ. އެއްވެސް ކޮޅަކަށް ވޯޓު ނުދެނީ އެމެރިކާ، އިނގިރޭސިވިލާތް އަދި ރަޝިޔާއެވެ.

އދ.ގެ ސަލާމަތީ މަޖިލީހުން ބުދަ ދުވަހުގެރޭ ފާސްކުރި މި ޤަރާރަށް އިސްރާއީލުން ބޯލަނބާނެ ކަމާމެދު ވަނީ ސުވާލު އުފެދިފަ އެވެ.

އެގޮތުން އިސްރާއީލުން ވަނީ މި ޤަރާރާ ގުޅިގެން ކަންބޮޑުވުން ފާޅުކޮށް ބަޔާނެއް ނެރެފައެވެ. އިސްރާއީލުގެ ޚާރިޖީ ވުޒާރާއިން ނެރުނު މި ބަޔާނުގައި ވަނީ އިސްރާއީލުގެ އދ.ގެ ސަފީރު މި ޤަރާރާ ދެކޮޅަށް މީގެ ކުރިން ދެއްކި ވާހަކަތަކަށް އިޝާރާތްކޮށްފައެވެ. އެގޮތުން ޣައްޒާގައި ބަންދުކޮށްފައިވާ އިސްރާއީލުގެ ޤައިދީން ދޫކޮށްލުމަށް ހަމާސްއަށް ބައިނަލްއަޤްވާމީގޮތުން ޕްރެޝަރު ކުރުމަށް ގޮވާލާފައިވެއެވެ.

ޤާނޫނީ ގޮތުން އިސްރާއީލުން އަމަލުކުރުމަށް ލާޒިމުކުރާ މި ޤަރާރު ސީދާ ދޮގުކުރޭތޯ ނުވަތަ ޕްރެޝަރުގައި ވަގުތީ ހަމަނުޖެހުންތައް ތަންފީޒު ކުރެވިދާނެކަމާމެދު ވަނީ އިސްރާއީލްގެ ބަޔާނުގެ ސަބަބުން ސުވާލު އުފެދިފަ އެވެ. އިސްރާއީލުގެ ހަމަނުޖެހުންތަކާ ގުޅޭ ގޮތުން އދ.އިން މީގެ ކުރިން ހުށަހެޅި ޤަރާރުތަކަށް ވެސް އިސްރާއީލުން ތަބާވެފައެއް ނުވެއެވެ.

ހަނގުރާމަހުއްޓާލުމަށް އެމެރިކާއިން އިސްރާއީލަށް ޕްރެޝަރު ކުރާ މިންވަރު ވެސް އަދި ސާފެއް ނުވެއެވެ. އިސްރާއީލުން މި ޤަރާރަށް ފާޑުކިޔަމުން ދާއިރު، އެ ޤައުމުގެ އޮޕަރޭޝަންތައް ކުރު މުއްދަތަކަށްނަމަވެސް ހުއްޓުމަކަށް އަންނާނެ ކަމަށް ބުނެފައެއް ނުވެ އެވެ. އިސްރާއީލުން ބުނަމުން ދަނީ ހަމާސް އިން އިސްރާއީލުގެ ރައްޔިތުން ބަންދުކޮށްގެން ތިބޭހާ ހިނދަކު، ހަނގުރާމަ ހުއްޓައި ނުލެވޭނެ ކަމަށެވެ.

އިސްރާއީލްގެ ހަމަލާތަކުގައި ފަލަސްތީނުން ޝަހީދުވި މީހުންގެ އަދަދު މިހާތަނަށް 12،000 އަށް ވުރެ މައްޗަށް ގޮސްފައިވާއިރު، ބައިނަލްއަޤްވާމީ މުޖުތަމަޢުން އުއްމީދު ކުރަނީ އިސްރާއީލުން މި ޤަރާރަށް ބޯލެނބުމުގެ ގޮތުން ކޮންމެވެސް ވަރެއްގެ ލުޔެއްދޭނެކަމަށެވެ. ނަމަވެސް އިސްރާއީލުގެ ސާފުބުނުމެއް މިކަމުގައި އަދި ނެތުމުގެ ސަބަބުން އދ.ގެ ޤަރާރަކީ ހަޤީޤީ ބަދަލެއް ގެނެވޭނެ ޤަރާރެއްކަމާ މެދު ޝައްކު އުފެދެ އެވެ.