އަލް އިއްތިހާދުގެ ކޯޗަކަށް އާޖެންޓީނާގެ ގަލާޑޯ

ހުސްވެފައިވާ އަލް އިއްތިހާދުގެ ކޯޗުކަމުގެ މަގާމަށް އާޖެންޓީނާގެ މާސެލޯ ގަލާޑޯ ހަމަޖައްސަން ނިންމައިފި އެވެ.

އަލް އިއްތިހާދުގެ ކޯޗުކަމުގެ މަގާމު ހުސްވީ ކުރިން އެ މަގާމުގައި ހުރި ޕޯޗުގަލްގެ ނޫނޯ އެސްޕިރިޓޯ ސަންޓޯ މަގާމުން ވަކި ކުރުމާއެކު އެވެ. އޭގެ ފަހުން އަލް އިއްތިހާދުން ގެންނަން ބޭނުންވި ކޯޗުންގެ ލިސްޓުގައި އޮތީ ރެއާލް މެޑްރިޑުގެ ކުރީގެ ކޯޗު ޒިދާން، ރޯމާގެ މިހާރުގެ ކޯޗު މޮރީނިއޯ އަދި ސެވިއްޔާގެ ކުރީގެ ކޯޗު ލޮޕެޓެގީ އެވެ. މީގެ ތެރެއިން ލޮޕެޓެގީ އާއެކު އަލް އިއްތިހާދުން ފުޅާ ދާއިރާއެއްގައި މަޝްވަރާ ކުރި ނަމަވެސް، އޭނާ ވަނީ އެ ކުލަބާ ހަވާލުނުވާން ނިންމައިފަ އެވެ.

އެއާއެކު އަލް އިއްތިހާދުން ދެން މަޝްވަރާ ކުރީ އާޖެންޓީނާގެ، އުމުރުން 47 އަހަރުގެ ގަލާޑޯ އާއެވެ. އޭނާ އާއެކު އެކުލަބުން ކުރިއަށް ގެންދިޔަ މަޝްވަރާތަކުގައި މިހާރު ވަނީ އެއްބަސްވުމަކަށް އާދެވިފަ އެވެ. ބައިނަލްއަޤުވާމީ މީޑިއާ ތަކުގައި ބުނެފައިވާ ގޮތުން، ރަސްމީކޮށް އެކަން ނިންމައި، އަލް އިއްތިހާދުން ވަރަށް އަވަހަށް އެކަން އިއުލާން ކުރާނެ އެވެ. އަލް އިއްތިހާދާ އެކު ގަލާޑޯ ސޮއި ކުރާނީ ދެ އަހަރު ދުވަހުގެ އެއްބަސްވުމެއްގަ އެވެ. އެހެންކަމުން 2025 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަަބަށް އިރުޝާދު ދޭނެ އެވެ. މީގެ އިތުރުން އެ އެއްބަސްވުމުގެ މުއްދަތު ހަަމަވުމުން، އިތުރު 18 މަސް ދުވަހަށް އެއްބަސްވުން އައު ކުރުމުގެ ފުރުސަތު ވެސް އޮވެ އެވެ.

ގަލާޑޯ އޭނާގެ ކޯޗިން ކެރިއަރު ފެށީ 2011 ވަނަ އަހަރު އުރުގުއޭގެ ނަސިއޯނެލް އިންނެވެ. އެ ކުލަބަށް އެއް އަހަރު ދުވަހު އިރުޝާދު ދިނުމަށްފަހު، އޭނާ ވަނީ އެ ކުލަބު ދޫކޮށްލައިފަ އެވެ. އޭގެ ދެ އަހަރު ފަހުން 2014 ވަނަ އަހަރު ގަލާޑޯ ހަވާލުވީ އާޖެންޓީނާގެ ރިވާ ޕްލޭޓަށެވެ. އެ ކުލަބު އޭނާ ދޫކޮށްލީ މިދިޔަ އަހަރުގެ ނޮވެމްބަރު މަހު އެވެ. އޭގެ ފަހުން ގަލާޑޯ ހުރީ ދުވަސްކޮޅަކަށް ބްރޭކަށް ނަގަައިގެންނެވެ.