ސައުދީ ޕްރޯ ލީގުގެ އަލް އިއްތިހާދުގެ ކޯޗުކަމާ ހަވާލުވުމަށް ލިބުނު ހުށަހެޅުމަށް ސްޕެއިންގެ ހޫލިއަން ލޮޕެޓެގީ ނޫނެކޭ ބުނެފި އެވެ.

އަލް އިއްތިހާދުގެ ކޯޗުގެ މަގާމު ހުސްވީ އެންމެ ފަހުން އެ މަގާމުގައި ހުރި ޕޯޗުގަލްގެ ނޫނޯ އެސްޕިރިޓޯ ސަންޓޯ ވަކި ކުރުމުންނެވެ. އެ މަގާމުން އޭނާ ވަކި ކުރަން އަލް އިއްތިހާދުން ނިންމީ، މި ސީޒަންގެ ސައުދީ ލީގުގައި އެ ޓީމަށް އެކަށީގެންވާ ނަތީޖާއެއް ނުނެރެވޭތީ އެވެ.

އެކަމާ ގުޅިގެން އަލް އިއްތިހާދުން ވަނީލޮޕެޓެގީ އާއެކު މަޝްވަރާ ކުރުންތައް ކުރިއަށް ގެންގޮސް، އޭނާ އަށް ޕްރޮޕޯސަލެއް ހުށަހަޅައިފަ އެވެ. ނަމަވެސް، ލޮޕެޓެގީ ވަނީ އެ ހުށަހެޅުން ޤަބޫލު ނުކުރަން ނިންމައިފަ އެވެ. ސަބަބަކީ، އަދިވެސް އޭނާގެ ޝައުޤުވެރިކަން އޮތީ އިނގިރޭސި ޕްރިމިއާ ލީގުގެ ކުލަބަކަށް އިރުޝާދު ދިނުމަށް ކަމަށްވާތީ އެވެ. ސައުދީ ޕްރޯ ލީގުގެ ކުލަބުތަކުން ވަނީ މީގެ ކުރިން ވެސް ޔޫރަޕުގައި މަސައްކަތް ކޮށްފައިވާ، ތަޖުރިބާކާރު ގިނަ ކޯޗުން ހޯދުމަށް މަސައްކަތް ކޮށްފަ އެވެ. އެގޮތުން ލޮޕެޓެގީގެ އިތުރުން، ޕޯޗުގަލްގެ ހޯސޭ މޮރީނިއޯ އަދި އިޓަލީގެ އެންޓޯނިއޯ ކޮންޓޭ ހޯދުމަށް ވެސް އެ ކުލަބުތަކުން މަސައްކަތް ކުރި އެވެ. ނަމަވެސް، އެ ކޯޗުން ވެސް ވަނީ ހުށަހެޅުން ޤަބޫލު ނުކުރަން ނިންމައިފަ އެވެ.

ލޮޕެޓެގީ އެންމެ ފަހުން ހުރީ އިނގިރޭސި ޕްރިމިއާ ލީގުގެ ވުލްވްސްގެ ކޯޗުގެ މަގާމުގަ އެވެ. އެ މަގާމުން އޭނާ ވަކިވީ މިއަހަރުގެ އޯގަސްޓު މަހު އެވެ. އެއަށްފަހު ލޮޕެޓެގީ ހުރީ އެއްވެސް ވަޒީފާއެއްގައެއް ނޫނެވެ. އުމުރުން 57 އަހަރުގެ ލޮޕެޓެގީ ވަނީ މީގެ ކުރިން ޕޯޗުގަލްގެ ޕޯޓޯ، ސްޕެއިންގެ ރެއާލް މެޑްރިޑު އަދި ސެވިއްޔާ އަށް ވެސް އިރުޝާދު ދީފަ އެވެ. މީގެ އިތުރުން ސްޕެއިންގެ ޒުވާން އުމުރުފުރާތަކުގެ ޤައުމީ ޓީމަށް ވެސް އޭނާ ވަނީ އިރުޝާދު ދީފަ އެވެ.