ފަލަސްތީނުގައި ހާލުގައި ޖެހިފައިވާ ފަރާތްތަކަށް އެހީވުމަށް ދިވެހިންގެ ފަރާތުން ފޯރުކޮށްދޭ އެހީ އޭގެ ޙައްގުވެރި ފަރާތްތަކާ ހަމައަށް ފޯރާތޯ ޔަގީން ކުރުމަށް ހުރިހާ ދިވެހިންނަށް އެ ޤައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަލީދު އަބޫ އަލީ އިލްތިމާސް ކުރައްވައިފިއެވެ.

ފަލަސްތީނުގެ މިނިވަންދުވަހާ ގުޅިގެން "ރާއްޖެ ޓީވީ" އަށް ދެއްވި ހާއްސަ އިންޓަވިއުއެއްގައި އެ ޤައުމުގެ ސަފީރު ވިދާޅުވީ ދިވެހިންނަކީ އަބަދުވެސް ފަލަސްތީނުގެ ރައްޔިތުންނާއެކު ސާބިތުކަމާއެކުގައި ތިބޭ ބައެއް ކަމަށާއި ފަލަސްތީނާއި އެ ޤައުމުގެ ރައްޔިތުންނަށް މި ވަގުތު ދިވެހިންގެ ތާއީދާއި އެއްބާރުލުން ބޭނުންވާކަމަށެވެ. އަދި ފަލަސްތީނުގެ ރައްޔިތުންނާއެކުގައި އެގޮތުގައި ސާބިތުކަންމަތީ ތިބުމަށް އެމަނިކުފާނު އެދިވަޑައިގެންނެވިއެވެ.

ދިވެހިން ފަލަސްތީނާއެކު ތިބިކަމާމެދު ސުވާލު އުފައްދާނެ ޖާގައެއް ނޯންނާނެކަން ފާހަގަކުރައްވައި ސަފީރު ވިދާޅުވީ މިނިވަން ޖައްވެއްގައި ދިވެހިންނަށް ފަލަސްތީނުން މަރުހަބާ ކިޔާނެ ދުވަސް އަންނާނެ ކަމަށެވެ.

ދިވެހިންގެ ތެރެއިން ފަލަސްތީނުގެ ރައްޔިތުންނަށް އެހީތެރިކަން ފޯރުކޮށްދޭން ބޭނުންވާ ފަރާތްތަކަށް ފޮރިން މިނިސްޓްރީ މެދުވެރިކޮށް އެ އެހީ ފޯރުކޮށްދެވޭނެ ގޮތް ބަލައިލެވޭނެ ކަން ސަފީރު ފާހަގަކުރެއްވިއެވެ. އަދި އެހީ ފޯރުކޮށްދޭއިރު އެ އެހީ ޙައްގު ފަރާތްތަކަށް ފޯރުކޮށްދެވޭތޯ ޔަގީން ކުރުމަށް އެމަނިކުފާނު އިލްތިމާސްކުރެއްވިއެވެ.

މިގޮތަށް އެމަނިކުފާނު އިލްތިމާސްކުރެއްވީ ބައެއް ޤައުމުތަކުގައި އެހީ ފޯރުކޮށްދިނުމަށް ކަމަށް ބުނެ މިފަދަ ދަނޑިވަޅުތަކުގައި ފައިދާ ނަގަމުންދާކަން ފާހަގަކުރެވޭތީއެވެ.

އެމަނިކުފާނު ވަނީ މިހާރު ޔަހޫދީ އިސްރާއީލުން ފަލަސްތީނަށް ދެމުން އަންނަ ހަމަލާތަކުގެ މައްޗަށް ވެސް އަލިއަޅުއްވާލައްވާފައެވެ. އެގޮތުން، އިސްރާއީލުގެ ހަމަލާތަކުގެ ސަބަބުން ފަލަސްތީނުގެ މިލިއަނަކަށްވުރެ ގިނަ ރައްޔިތުން އަމިއްލަ ގެދޮރު ދޫކޮށް ޣައްޒާގެ ދެކުނަށް ދާން މަޖުބޫރުވެފައިވާ ކަމަށާއި އެގޮތަށް ބަދަލުވަމުންދިޔަ އާއްމުންނަށް ވެސް އިސްރާއީލުން ހަމަލާދެމުންދާކަން ފާހަގަކުރެއްވިއެވެ.

އެންމެ ފަހުގެ މައުލޫމާތު ހިއްސާކުރައްވައި ސަފީރު ވިދާޅުވީ ޣައްޒާގައި އިސްރާއީލުން މަރާލި މީހުންގެ އަދަދު 12،000 އަށްވުރެ މައްޗަށް އަރާ ކަމަށާއި 5،000 އެއްހާ ކުޑަކުދިން މީގެ ތެރޭގައި ހިމެނޭ ކަމަށެވެ. އަދި ހަމަލާތައް މިހާރުން މިހާރަށް ހުއްޓާލަން ޖެހޭ ކަމަށާއި އިސްރާއީލުން ހިންގަމުންދާ އެ ގަތުލުއާއްމު ހުއްޓުވުމަށް ބައިނަލްއަގުވާމީ މުޖުތަމައި ފެއިލްވެފައިވާ ކަމަށް ވެސް ވިދާޅުވިއެވެ.

އިސްރާއީލުން ހަމަލާ ދެނީ ހަމާސްގެ ހަނގުރާމަވެރިންނަށް އަމާޒުކޮށް ކަމަށް ބުނެ ދައްކާ ވާހަކަތަކަށް ރައްދު ދެއްވައި ސަފީރު ވަނީ މިހާތަނަށް ޝަހީދު ކޮށްލާފައިވާ ހުރިހާ ކުޑަކުދިންނަކީ ހަމާސްގެ މެމްބަރުންތޯ ސުވާލު އުުފައްދަވާފައެވެ. އިސްރާއީލުން ފަތުރަން އުޅޭ ޕްރޮޕެގެންޑާ މުސްލިމުން ގަބޫލު ނުކުރާނެ ކަމަށާއި ފަލަސްތީނުގެ ރައްޔިތުންނަށް ވެސް މިނިވަން ކަމާއެކު ދިރިއުޅުމުގެ ޙައްގު ލިބިދޭން ޖެހޭ ކަމަށް އެމަނިކުފާނު ވިދާޅުވިއެވެ.