ބަޖެޓު ކޮމިޓީގެ މުގައްރިރަކަށް ނާޝިޒް، ނާއިބަކަށް މުހައްމަދު ރަޝީދު
14 ނޮވެމްބަރު 2023 | އަންގާރަ 09:07މިއީ މި ދެ ބޭފުޅުން ބަޖެޓު ކޮމިޓީގެ މުގައްރިރުކަމާއި ނާއިބު މުގައްރިރުކަން އަދާކުރައްވާތާ ވިދިވިދިގެން ހަތަރު ވަނަ އަހަރު
ކިނބިދޫ ދާއިރާގެ އެމްޑީޕީ މެންބަރު މުޙައްމަދު ނާޝިޒާއި އަލިފުށީ ދާއިރާގެ އެމްޑީޕީގެ މެންބަރު މުހައްމަދު ރަޝީދު
2024 ވަނަ އަހަރުގެ ބަޖެޓު ދިރާސާ ކުރާ ކޮމިޓީގެ މުގައްރިރަކަށް ކިނބިދޫ ދާއިރާގެ އެމްޑީޕީ މެންބަރު މުޙައްމަދު ނާޝިޒު އަދި ކޮމިޓީގެ ނާއިބު މުގައްރިރަކަށް އަލިފުށީ ދާއިރާގެ އެމްޑީޕީގެ މެންބަރު މުހައްމަދު ރަޝީދު އައްޔަނުކުރައްވައިފިއެވެ.
އަންގާރަ ދުވަހު ބޭއްވި ކޮމިޓީ ބައްދަލުވުމުގައި ކޮމިޓީގެ މުގައްރިރުކަމަށް މެންބަރު ނާޝިޒްގެ ނަން ހުށަހަޅުއްވާފައި ވަނީ ދާންދޫ ދާއިރާގެ މެންބަރު ޔައުގޫބް އަބްދުﷲއެވެ. ކޮމިޓީގެ މުޤައްރިރުކަމަށް ނާޝިޒް އައްޔަނުކުރައްވާފައި ވަނީ ކޮމިޓީއަށް ވަޑައިގެން ތިއްބެވި 15 މެންބަރުންގެ އަޣުލަބިއްޔަތުންނެވެ. އެ ކޮމިޓީގެ ނާއިބު މުގައްރިރަކަށް މުހައްމަދު ރަޝީދުގެ ނަން ހުށަހެޅުއްވާފައި ވަނީ ނާޝިޒް އެވެ. އޭނާ އެ މަގާމަށް އައްޔަން ކުރެއްވީ ވެސް ކޮމިޓީއަށް ވަޑައިގެން ތިއްބެވި 15 މެންބަރުންގެ އަޣުލަބިއްޔަތުންނެވެ.
މިއީ މި ދެ ބޭފުޅުން ބަޖެޓު ކޮމިޓީގެ މުގައްރިރުކަމާއި ނާއިބު މުގައްރިރުކަން އަދާކުރައްވާތާ ވިދިވިދިގެން ހަތަރު ވަނަ އަހަރެވެ.
އަންނަ އަހަރަށް ލަފާކުރާ ބަޖެޓު މަޖިލީހަށް ހުށަހަޅާފައި ވަނީ އަންގާރަ ދުވަހުއެވެ. އަންނަ އަހަރަށް ލަފާކޮށް ހުށަހަޅާފައި ވަނީ 49.5 ބިލިއަން ރުފިޔާގެ ބަޖެޓެކެވެ.
ބަޖެޓް ދިރާސާ ކުރަނީ މަޖިލީހުގެ މާލިއްޔަތު ކޮމިޓީ އާއި އިގްތިސާދީ ކޮމިޓީ ގުޅިގެން އެކުލަވާލާ ހާއްސަ ކޮމިޓީއަކުންނެވެ.
