ޣައިރު ގާނޫނީ އަމުރަށް ތަބާވާނަމަ ކުރިއަށް އޮތް ޖީލު ސަލާމަތް ނުކުރެވޭނެ: ބިގޭ
މުޅި ގައުމުން އިވެމުންދަނީ އިހުމާލާއި، އަނިޔާގެ ވާހަކަ
އެމްޑީޕީ ކުއްލި އެއްވުމުގައި އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވާހަކަދައްކަވަނީ
ސަލާމަތީ ބާރުތަކުން ޣައިރު ގާނޫނީ އަމުރަށް ތަބާވާނަމަ ކުރިއަށް އޮތް ޖީލު ސަލާމަތް ނުކުރެވޭނެ ކަމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.
އާއްމު ރައްޔިތުންގެ ހައްގުތައް ގެއްލިގެންދާތީ އެމްޑީޕީން ބޭއްވި ކުއްލި ބައްދަލުވުމުގައި ބިގޭ ވިދާޅުވީ މުޅި ގައުމުން އިވެމުންދަނީ އިހުމާލާއި، އަނިޔާގެ ވާހަކަ ކަމަށާއި، އިންސާފު ހޯދުމަށް ނުކުންނަން ޖެހޭ ކަމަށެވެ.
ރައީސް ޑރ.މުހައްމަދު މުއިއްޒުގެ ސަރުކާރަށް އިޝާރާތް ކުރައްވައި ބިގޭ ވިދާޅުވީ މިއީ އަނިޔާވެރި ސަރުކާރެއް ކަމަށާއި، އިންސާފުން ނެއްޓިފައިވާ ސަރުކާރެއް ކަމަށެވެ. މި ސަރުކާރު ހަމަ މަގަށް އެޅުވުމަށް ރައްޔިތުން މަސައްކަތް ކުރަންޖެހޭ ކަމަށާއި، މަސައްކަތް ކުރެވޭނީ މަގުމަތިން ކަމަށް އޭނާ ވިދާޅުވިއެވެ. އަދި ވިދާޅުވީ އެ މަސައްކަތް ކުރުމަށް ގާނޫނޫ އިމުގެ ތެރެއިން ރައްޔިތުންނަށް ލިބިދީފައިވާ ހައްގު ބަސް ބުނުމުގެ ހައްގު އެންމެ ފުޅާ މިނުގައި ބޭނުންކުރުމުގެ ފުރުސަތު ފުލުހުންނާއި ސިފައިން ވެސް ފަހިކޮށްދޭން ޖެހޭ ކަމަށެވެ.
މީގެ އިތުރުން ބިގޭ ވިދާޅުވީ ސަރުކާރު ބަދަލުވާނެ ކަމަށާއި، އެއިރެއްގައި އޮންނަ ސަރުކާރެއްގެ ނުފޫޒު ފުލުހުންގެ އިދާރަށް ފޯރާނަމަ އެއީ ވަރަށް ބޮޑު މައްސަލައެއް ކަމަށެވެ. ފުލުހުންގެ އިދާރާ ހިންގަންޖެހޭނީ މިނިވަންކަމާއެކު ކަމަށާއި، އެކަން ކުރެވޭނީ ފުލުހުންނަށް ކަމަށް އޭނާ ވިދާޅުވިއެވެ. ގައިރު ގާނޫނީ އަމުރުތަކަށް ނޫނެކޭ ބުނަންޖެހޭ ކަމަށާއި، ގައިރު ގާނޫނީ އަމުރަށް ތަބާވާނަމަ ކުރިއަށް އޮތް ޖީލު ސަލާމަތް ނުކުރެވޭނެ ކަމަށް ބިގޭ ވިދާޅުވިއެވެ.
އަޅުގަނޑުމެން ނުކުމެ މިތިބީ ދިވެހި ޒުވާނުންގެ ހައްގުގައި. އަޅުގަނޑުމެން ނުކުމެ މިތިބީ ބަލި އެދުގައި އޮތް މީހާގެ ހައްގު ކަށަވަރުކުރުމަށް. އަޅޫގަނޑުމެން ނުކުމެ މިތިބީ ދިވެހި ފުލުހުންގެ ތެރޭގައި އޮތް ޒުވާން އާބާދީގައި އޮތް ހައްގުގައި. އަޅުގަނޑުމެން ނުކުމެ މިތިބީ ދިވެހި ތޮބުވެތި އެންމެހާ ރައްޔިތުންގެ ހައްގުގައި. އަޅުގަނޑުމެން މިކުރާ މަސައްކަތަކީ އަޅުގަނޑުމެންގެ ހައްގުތައް ގެއްލިގެން ގޮސްފައިވާތީ އެކަން ކަށަވަރު ކުރުމަށް ހައްގުތަށް ހޯދުމަށް މަސައްކަތް. އަޅުގަނޑު ދިވެހި އާބާދީގެ ބޮޑު ބައެއް ހިމެނޭ އެންމެ ގިނަ ޒުވާނުންނަށް ދަންނަވާލަން ބޭނުން ޒުވާނުންގެ ހައްގުގައި ދިވެހި ރާއްޖެއަކީ ޒުވާނުންގެ މުސްތުގުބަލަށްޓަކައި އެބޭފުޅުންގެ ހައްގެއް ޒިންމާއެއް އޮތް ކަމެއްގައި ދިވެހި ރައްޔިތުންގެ އަންނަން އޮތް ޖީލުތަކުގެ ހައްގުގައި ޒުވާނުން ތެދުވަންވީ ވަގުތު މިއީ.އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ)
ބިގޭ ވިދާޅުވީ ބާރު އޮތީ ރައްޔިތުންގެ އަތުގައި ކަމަށާއި، ވެރިކަން ފެށިގެން އަންނަނީ ވެސް ރައްޔިތުންނާ ހިސާބުން ކަމަށެވެ. ރައްޔިތުންގެ ހައްގުތައް ކަށަވަރުނުވެ ހުދުމުހުތާރު ވެރިކަމެއް ކުރަމުންދާނަމަ އެގައުމު ހުރިހާ ދާއިރާއަކުން ވެސް ދާނީ ފަހަތަށް ކަމަށް އޭނާ ވިދާޅުވިއެވެ. އަދި ސަލާމަތީ ބާރުތަކުން ރާއްޖެ ފަހަތަށް ދިއުމުގެ ފުރުސަތު ނުދިނުމަށް ބިގޭ ގޮވާލެއްވިއެވެ.
