2024 ވަނަ އަހަރުގެ ބަޖެޓުން ކައުންސިލްތަކަށް ބްލޮކް ގްރާންޓުގެ ގޮތުގައި ޖުމްލަ 2.2 ބިލިއަން ރުފިޔާ ދޫކުރެވޭނެ ކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ.

އަންނަ އަހަރަށް ލަފާކުރާ ދައުލަތުގެ ބަޖެޓް ހުށަހަޅުއްވަމުން ފިނޭންސް މިނިސްޓަރު އަމީރު ވިދާޅުވީ ކައުންސިލްތަކަކީ ދައުލަތް ހިންގުމުގައި ރައްޔިތުންނާ ގާތުން ޚިދުމަތްދިނުމުގައި އިސް ދައުރެއް އަދާކުރާ ފަރާތްތަކެއް ކަމަށެވެ.

އަދި ލާމަރުކަޒީ އުސޫލުން ހިންގުމުގެ އިތުރުން، މާލީ ބާރުވެރިކަން ކައުންސިލްތަކަށް ދިނުމަށް 2020 ވަނަ އަހަރުގެ ބަޖެޓުން ފެށިގެން ކައުންސިލްތަކަށް ދޫކުރަމުން އަންނަނީ ބްލޮކް ގްރާންޓް ކަމަށާއި، ބްލޮކް ގްރާންޓް ކަނޑައަޅަނީ ފިސްކަލް ފޯމިއުލާއެއް މެދުވެރިކޮށް، އާބާދީ އާއި ރަށުގެ ބޮޑުމިނާއި، މާލެ އާއި ރަށާއި ހުރި ދުރުމިނާއި، އަތޮޅުގެ ވެރިކަން ކުރާ ރަށާހުރި ދުރުމިނާއި ކައުންސިލްގެ އިދާރީ ޕާރފޯމަންސާއި މާލީ ޕާރފޯމަންސަށް ބަލައިގެން، އިންސާފުވެރި ގޮތެއްގައި ކަމަށެވެ.

މިނިސްޓަރު ވިދާޅުވީ އަންނަ އަހަރުގެ ބަޖެޓުގައި މި ފޯމިއުލާއަށް ކައުންސިލްތަކުން އާމްދަނީ ހޯދާ ނިސްބަތް އިތުރުކުރެވިފައިވާނެ ކަމަށެވެ. އަދި މީގެ ބޭނުމަކީ އެންމެ ފުރަތަމަ ކައުންސިލުން އާމްދަނީ ހޯދުމަށް ބާރުއެޅުން ކަމަށެވެ.

އަދި ކައުންސިލްތައް މެދުވެރިކޮށް ފޯރުކޮށްދޭ ހިދުމަތްތަކަށް ނަގާ ފީގެ ގޮތުގައި ލިބޭ އާމްދަނީ އާއި ކައުންސިލްގެ އިޙްތިސާސް ހިނގާ ބިންބިމުގެ ކުލި، ސީދާ ކައުންސިލްތަކަށް ލިބޭނެ ގޮތަށް ހަމަޖެހިފައިވާ ކަމަށް ވެސް މިނިސްޓަރު ވިދާޅުވިއެވެ.

މިނިސްޓަރު އަމީރު ވިދާޅުވީ އެއްގަމު އުޅަނދުތަކާއި ކަނޑު އުޅަނދުތަކުގެ އަހަރީ ފީން ލިބޭ އާމްދަނީ ވެސް އެ އުޅަނދެއް ދުއްވާ ރަށެއްގެ ކައުންސިލަށް ލިބުމުގެ އިންތިޒާމް ހަމަޖައްސާފައިވާ ކަމަށެވެ. އަދި ކައުންސިލްތަކުން ދަރަންޏަށް ފައިސާ ނަގައިގެން މަޝްރޫޢުތަކާއި ހަރަކާތްތައް ހިންގުމުގެ އުސޫލުތަކާއި ގަވާއިދުތައް އެކުލަވާލުމުގެ މަސައްކަތް ކުރެވެމުންދާކަން މިނިސްޓަރު ފާހަގަކުރެއްވިއެވެ.