އިސްރާއީލުގެ އަސްކަރީ ހަމަލާތަކުގެ ސަބަބުން ހަތް ލައްކައަށް ވުރެ ގިނަ ކުޑަކުދިން ގެދޮރު ގެއްލިފައިވާތީ ޣައްޒާގައި އިންސާނީ ކާރިސާ އިތުރަށް ގޯސްވަމުން އަންނަ ކަމަށް އދ.ގެ ކުޑަކުދިންގެ އިދާރާ ޔުނިސެފުން ބުނެފި އެވެ.
ޣައްޒާގެ އުތުރުގެ ޖަބާލިއާ ރެފިއުޖީ ކޭމްޕުގައި ބުދަ ދުވަހު އިސްރާއީލުން ދިން ވައިގެ ހަމަލާތަކުގައި ކުޑަކުދިންނާއެކު 30 އަށް ވުރެ ގިނަ މީހުން މަރުވެފައިވާ ކަމަށް ޔުނިސެފުން ބުނެ އެވެ. ކެނޑިނޭޅި ދެމުންދާ ބޮމުގެ ހަމަލާތަކަށް އާއިލާތަކުން ފިލައިގެން ދާއިރު ބިރުވެރިކަމާއި ނާމާންކަމުގެ މަންޒަރުތައް ދަނީ ފެންނަމުންނެވެ.
ފަލަސްތީނު ރެފިއުޖީންނާ ބެހޭ އދގެ އެޖެންސީން އިންޒާރު ދީފައި ވަނީ ޣައްޒާއަށް ތެޔޮ ސަޕްލައި ކުރުން ހުއްޓިއްޖެ ނަމަ ބުދަ ދުވަހުގެ ނިޔަލަށް ޣައްޒާގައި ހިންގަމުންދާ މުހިންމު އޮޕަރޭޝަންތައް މުޅިން ހުއްޓިގެން ދާނެ ކަމަށެވެ. މެޑިކަލް އިންފްރާސްޓްރަކްޗާއަށް ދިން ހަމަލާތަކުގެ ސަބަބުން ޣައްޒާގެ އުތުރުގެ ހޮސްޕިޓަލްތައް މިހާރުވެސް ވަނީ ބަންދުކުރަން މަޖުބޫރުވެފައެވެ.
އޮކްޓޯބަރު މަހުގެ ކުރީކޮޅު އިސްރާއީލުން ހަމަލާދޭން ފެށި ފަހުން ފަލަސްތީނުގެ 11،200 އަށް ވުރެ ގިނަ މީހުން ޝަހީދުވެފައިވާ އިރު އޭގެ ތެރޭގައި އެތައް ހާސް އަންހެނުންނާއި ކުޑަކުދިން ވެސް ހިމެނޭ ކަމަށް ސިއްހީ އޮފިޝަލުން ބުނެ އެވެ.
ޣައްޒާގެ އިންސާނީ ޙާލަތު ވަރަށް ބޮޑަށް ގޯސްވެފައިވާއިރު، އދއިން ދަނީ ހަނގުރާމަ ހުއްޓާލުމަށް ވަރަށް ބޮޑަށް އިލްތިމާސްކުރަމުންނެވެ. ޔުނިސެފުން ބުނީ އިސްރާއީލުގެ ވައިގެ ހަމަލާތަކާއި އާޓިލަރީ ހަމަލާތަކުގެ ތެރޭގައި ހަތް ލައްކައަށް ވުރެ ގިނަ ކުޑަކުދިންނާއި އެކުދިންގެ ޢާއިލާތަކުގެ ގެދޮރު ގެއްލިފައިވާ ކަމަށެވެ.
އިސްރާއިލުން ދަނީ ޣައްޒާގެ ސިއްހީ ފަރުވާދޭ ތަންތަނަށާއި ހޮސްޕިޓަލްތަކަށް އަމާޒުކޮށް ހަމަލާތައް ދެމުންނެވެ. އަދި ޣައްޒާއަށް ތެޔޮ އެތެރެކުރުން މަނާކޮށްފައި އޮތުމުގެ ސަބަބުންނާއި ތެޔޮ ނެތުމުގެ ސަބަބުން، ކަރަންޓުކެނޑި ހޮސްޕިޓަލްތައް ބަންދުކުރަން ދަނީ މަޖުބޫރުކުރުވަމުންނެވެ.
އދ. އާއި ސިއްހީ ޚިދުމަތްދޭ ޖަމާއަތްތަކުން ވެސް ވަނީ ޣައްޒާގެ ހޮސްޕިޓަލްތައް އޮތީ އެކީއެކަށް ހުއްޓުމަކަށް އައުމުގެ މަގުމަތީގައި ކަމަށްބުނެ އިންޒާރު ދީފައެވެ.
