ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ އަނެއްކާވެސް މިއަދު 04:00 ޖަހާއިރަށް އެޖެންޑާކޮށްފިއެވެ.
ނަޝީދުގެ އިތުބާރު ނެތްކަމުގެ މައްސަލަ ދެވަނަ ފަހަރަށް އެމްޑީޕީ ޕީޖީ ގްރޫޕުން އޮކްޓޯބަރު މަހު މަޖިލީހަށް ވައްދާފައިވަނީ 49 މެމްބަރުންގެ ސޮޔާއެކުގައެވެ. އެމަނިކުފާނުގެ އިތުބާރު ނެތްކަމަށް ކަނޑައަޅަން ބޭނުންވާނީ 43 މެމްބަރުންގެ ވޯޓެވެ.
މަޖިލީހުގައި މިއަދު ހެނދުނު ވަނީ ދެ ޖަލްސާއެއް ތާވަލުކޮށްފައެވެ. އެއީ ސަޕްލިމެންޓަރީ ބަޖެޓު ހުށަހަޅަން އޮތް ޖަލްސާ އާއި ރައީސް ނަޝީދުގެ އިތުބާރު ނެތްކަމުގެ މައްސަލައިގެ ޖަލްސާއެވެ.
11:00 އަށް ތާވަލުކޮށްފައި އޮތް ޖަލްސާ ފަށްޓަވައި، އީވާ އެޖެންޑާ އިއުލާނު ކުރެއްވިއިރު މަޖިލީހުގެ މެޖޯރިޓީ އޮންނަ އެމްޑީޕީގެ މެމްބަރުން ގެންދެވީ ނުރުހުން ފާޅުކުރައްވަމުންނެވެ. އެ މެމްބަރުންނާ ދެކޮޅަަށް ދަ ޑިމޮކްރެޓްސްގެ މެމްބަރުން ވެސް ގެންދެވީ އަޑު ގަދަކުރައްވަމުންނެވެ. އީވާ ވަނީ ޖަލްސާ އެތައް ފަހަރެއްގެ މަތިން މެދުކަނޑާލައްވާފައެވެ. އަދި އެންމެ ފަހުން ވަގުތު ހަމަވި ކަމަށް ވިދާޅުވެ ޖަލްސާ ވަނީ ނިންމަވާލައްވާފައެވެ.
