ނަޝީދުގެ އިތުބާރު ނެތްކަމުގެ މައްސަލައަކީ އީވާގެ މަސްލަހަތާ ފުށުއަރާ ކަމެއް: ޤާސިމް

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ އަކީ މަޖިލީހުގެ ނާއިބުރައީސް އީވާ އަބްދުﷲ ގެ މަސްލަހަތާ ފުށުއަރާ ކަމެއް ކަމަށް ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ޤާސިމް އިބްރާހީމް ވިދާޅުވެއްޖެއެވެ.

އާދިއްތަ ދުވަހުގެ ޖަލްސާގައި ޤާސިމް ވަނީ މަޖިލީހުގެ ރައީސް އިތުބާރު ނެތްކަމުގެ މައްސަލަ ކުރިއަށް ގެންދެވުމަށް ފުރުސަތު ނުދެއްވާ ޑިމޮކްރެޓްސްގެ މެންބަރުން ނުކުމެ މުޅި މަޖިލީސް ތެރޭގައި ހަޅުތާލުކުރާ ކަމަށް ތުހުމަތު ކުރައްވާފައެވެ.

ރައްޔިތުންގެ މަޖިލީހުގެ ނައިބުރައީސް އީވާ އަބްދުﷲ ރިޔާސަތުން ފައިބައި ވަޑައިގެން، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދިޔުުމަށް ފުރުސަތު ދެއްވުމަށް ވެސް ހޯމަ ދުވަހުގެ ޖަލްސާގައި ޤާސިމް އެދިވަޑައިގަތެވެ.

އާދިއްތަ ދުވަހުގެ ޖަލްސާ ރަނގަޅަށް ކުރިއަށް ގެންގޮސްފައެއް ނުވެއެވެ. މަޖިލީހުގެ ދެ ޖަލްސާއެއް ބޭއްވުމަށް އެޖެންޑާ ކުރިއެވެ. އެއީ ބަޖެޓު ހުށަހެޅުމާއި ރައީސް މުޙައްމަދު ނަޝީދުގެ އިތުބާރު ނެތް ކަމުގެ މައްސަލައެވެ.

މަޖިލީހުގެ ކޯރަމް ހަމަނުވާތީ ބަޖެޓު ހުށަހެޅުމުގެ ޖަލްސާ ކުރިއަށް ނުގެންދެވުނެވެ. ނަޝީދުގެ ގަރާރު އެޖެންޑާ ކުރި ޖަލްސާ ފެއްޓުމާއެކު އެތައް ފަހަރެއްގެ މަތިން އީވާ ވަނީ ޖަލްސާ މެދުކަނޑާލައްވާފައެވެ. އެންމެ ފަހުން ވަގުތު ހަމަވިކަމަށް ވިދާޅުވެ 14:30 ގައި އީވާ ވަނީ ޖަލްސާ ނިންމަވާލައްވާފައެވެ. އަދި އަންގާރަ  ދުވަހުގެ ޖަލްސާގައި ވެސް ބަޖެޓު ހުށަހެޅުމާއި ރައީސް މުޙައްމަދު ނަޝީދުގެ އިތުބާރު ނެތް ކަމުގެ މައްސަލަ ކުރިއަށްދާނެ ކަމަށް ވިދާޅުވިއެވެ.

އެމްޑީޕީން މިހާރު ވަނީ އީވާގެވެސް އިތުބާރު ނެތް ކަމަށް ބުނެ މަޖިލީހަށް، 50 މެންބަރުންގެ ސޮޔާއެކު މައްސަލަ ހުށަހަޅާފައެވެ.