ދިވެހިންނަށް ގަރުދިޔަ ކާން ޖެއްސީ ކުރީ ސަރުކާރުން ކަމަށް ވިދާޅުވުމުން، ގާސިމް އަކީ ވެސް އެ ސަރުކާރުގެ ބައިވެރިއެއްކަން އާންމުން ހަނދާން ކޮށްދީފި
ގާސިމްގެ މި ވާހަކަ އަށް ގިނަ ބަޔަކު ވަނީ ސޯޝަލް މީޑިއާގައި ފާޑު ކިޔާފަ
ޤާސިމް އިބްރާހީމްގެ ޖުމްހޫރީ ޕާޓީ އަކީ ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގައި ސަރުކާރު ކޯލިޝަންގައި ހިމެނުނު ޕާޓީއެއް
ރައްޔިތުން އިނދަ ޖައްސާލައި ގަރުދިޔަ އާއި ބަތް ކާން ޖެހޭ ނިކަމެތި ހާލަތަށް ގެންދިޔައީ ކުރީގެ ރައީސް އިބްރާހިމް މުހައްމަދު ސާލިޙްގެ ސަރުކާރުން ކަމަށް މާމިގިލީ ދާއިރާގެ މެންބަރު ގާސިމް އިބްރާހިމް ހޯމަ ދުވަހު މަޖިލީހުގައި ވިދާޅުވުމުން ގާސިމް އަކީ ކުރީ ސަރުކާރުގެ ބައިވެރި އެއް ކަން ގިނަ ބަޔަކު ގާސިމް އަށް ހަނދާން ކޮށްދީފިއެވެ.
ގާސިމްގެ މި ވާހަކަ އަށް ގިނަ ބަޔަކު ވަނީ ސޯޝަލް މީޑިއާގައި ފާޑު ކިޔާފައެވެ.
ގިނަ ބަޔެއްގެ ކޮމެންޓްގައި ގާސިމް އަށް ހަނދާން ކޮށްދީފައިވަނީ ގާސިމް އަކީ ކުރީ ސަރުކާރުގެ ކޯލިޝަން ބައިވެރިއެއް ކަމަށާއި، ސަރުކާރުން އެންމެ ގިނަ ފައިދާ ހޯއްދެވި ފަރާތަކީ ގާސިމް ކަމުގައެވެ. އެގޮތުން ގާސިމްގެ ވަޒީރުން ސަރުކާރުގައި ތިއްބެވި ކަމަށާއި، އޭގެ ތެރޭގައި ޚުދު ގާސިމްގެ އަނބިކަނބަލުން ހިމެނޭ ކަމަށް ވެސް ފާޑުކީ މީހުން ބުނެފައިވެއެވެ.
ރައީސް ސާލިހްގެ ސަރުކާރުގެ ކޯލިޝަންގެ ބައިވެރި އެއްގެ ގޮތުން ވެރިކަމުގެ ދައުރު ނިމެންދެން ޖުމްހޫރީ ޕާޓީ ގެ ވަޒީރުން އެ ސަރުކާރުގައި ތިބި އިރު، ރައީސް ސާލިހްގެ ސަރުކާރު ގައި ނުރަނގަޅު ކަމެއް ހިނގި ނަމަވެސް އަކަމުގެ ޒިންމާ ގާސިމް ވެސް އުފުއްލަވަން ޖެހޭނެ ކަމަށް ސޯޝަލް މީޑިއާ ގައި އެތައް ބަޔަކު ބުނެފައިވެއެވެ.
ރާއްޖޭން މެލޭޝިއާ އަށް ކަނޑައަޅުއްވާފައި ހުންނެވި ކުރީގެ ސަފީރު ދާތޯ ޒަކީ އެކްސް ގައި ވިދާޅުވީ، ގާސިމް އަކީ ކުރީ ސަރުކާރުން ގިނަ އަދަދެއްގެ ފައިސާ ހޯއްދެވި ފަރާތެއް ކަމަށާއި، ކޮންމެ ސަރުކާރަކުން ޙިއްސާ ގަނެ ފައިދާ ހޯދުމަށް ފަހު އައު ސަރުކާރާއި ގުޅި، ގޮވާނީ ގުދޯ ގުދޯ ކަމަށް ޒަކީ ލިޔުއްވާފައިވެއެވެ.
"ހިހޫތަނުން ކައިގެން ތަނަވަސްކަން ހޯދައިގެން އުޅޭމީހުން އަބަދުވެސް ތިބޭނީ އެއިރެއްގައި އޮންނަ ސަރުކާރަކަށް ސަނާ ކިޔަން،" ގާސިމްގެ ވާހަކަ އަށް ކޮމެންޓު ކުރަމުން ގާނޫނީ ވަކީލް ޝާހިދު އަބްދުއްސަމަދު އެކްސް ގައި ލިޔުއްވާފައިވެއެވެ.
ދިވެހިން ގަރުދިޔަ އާއި ބަތާ ކާން ޖެއްސީ ކުރީ ސަރުކާރުން ކަމަށް ވިދާޅުވެ ގާސިމް، ހޯމަ ދުވަހު، ވާހަކަ ދެއްކެވީ، ރާއްޖޭގެ އިގްތިސާދީ ހާލަތާ ގުޅޭ ގޮތުން ހަނިމާދޫ ދާއިރާގެ އެމްޑީޕީގެ މެންބަރު އަބްދުލް ގަފޫރު މޫސާ މަޖިލީހުގައި ދެއްކެވި ވާހަކަ އަށް ރައްދު ދެއްވުމުގެ ގޮތުން ނިޒާމީ ނުކުތާ ނަންގަވައިގެންނެވެ.
މެމްބަރު ގަފޫރު ވިދާޅުވީ، އެމްޑީޕީގެ ވެރިކަން ނިމިގެން ދިޔަ އިރު ގައުމުގެ އިގްތިސާދު އޮތީ ރަނގަޅަށް ކަމަށާއި، އަދި އިގްތިސާދަށް މި އަންނަ ބަދަލުތަކަކީ ކުރީގެ ސަރުކާރުތަކުން ޒިންމާވާން ޖެހޭނެ ބަދަލުތަކެއް ނޫން ކަމަށް އޭނާ ވިދާޅުވި އެވެ.
އެ ވާހަކައާ އެކު، ގާސިމް ވިދާޅުވީ ހަނިމާދޫ ދާއިރާގެ މެމްބަރު އެ ވިދާޅުވީ "ކަނޑައެޅިގެން ހަގީގަތާ ޚިލާފް" ވާހަކަ އެއް ކަމަށެވެ.
ވެރިކަމަށް ވަޑައިގަތުމުގެ ކުރިން ޑރ. މުއިއްޒުގެ އަމިއްލަ ގެކޮޅު ހެއްދެވި ގޮތާއި ތަނަވަސްކަން ހޯއްދެވި ގޮތާ ބެހޭ ގޮތުން ތުހުމަތު ތަކެއް ކުރައްވާ ވަރަށް ބޮޑަށް ފާޑު ވިދާޅުވި ގާސިމް، މިހާރު ހުންނެވީ ޑރ މުއިއްޒުގެ ސަރުކާރާ އެކުގައެވެ.
މަޖީލީހުގައި ޑރ. މުއިއްޒުގެ ސަރުކާރު ދިފާއު ކުރައްވާ ގާސިމް ވިދާޅުވީ، އިގްތިސާދަށް މި ހާލަތު ދިމާވީ މައިގނޑުގެ ގޮތެއްގައި އެމްޑީޕީގެ ސަރުކާރުގެ ސަބަބުން ކަމުގައެވެ.
