ރާއްޖޭގެ ސިފައިން ވަދެ ރައްޔިތުންގެ މަޖިލީހުގެ އިދާރާގައި ތަޅު އަޅުވާ އެ މަޖިލީސް ހިސޯރު ކުރީތީ މުޅި ދުނިޔެ މަލާމާތްކޮށް ހެމުންދާކަމަށް ގުޅިފައިވާ ޕާޓީތަކުގެ ޕީޖީ ގުރޫޕްގެ ސްޕޯކްސް ޕާސަން އަދި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަހުމަދު މަހްލޫފް ވިދާޅުވެއްޖެއެވެ.

ގުޅިފައިވާ ޕާޓީތަކުގެ ޕީޖީ ގުރޫޕްގެ ފަރާތުން ކުނޫޒްގައި މިއަދު ބޭއްވި ޕްރެސް ކޮންފަރެންސްގައި މަހްލޫފް ވިދާޅުވީ ރައްޔިތުންގެ މަޖިލީހަށް އެމެންބަރުން ވަޑައިގެންނެވީ އެއީ ރައްޔިތުންގެ ކަންކަން ކުރުމަށް އެމެންބަރުންނަށް ކަނޑައަޅާފައިވާ ތަންކަމަށާއި އެތަނަށް ވަޑައިގެންނެވީ މަޖިލީސްގެ ކާޑުވެސް ހިއްޕަވައިގެން މައްސަލަތަކެއް މަޖިލީހަށް ހުށަހެޅުމަށް ކަމަށެވެ. އަދި އެކަން މަޖިލީހުގެ އަމީން ޢާއްމަށްވެސް އެންގެވިން ކަމަށާއި މަޖިލީހުގެ މެންބަރުންނަށް ކޮންމެ ވަގުތަކުވެސް އެމަޖިލީހަށް ވަދެވޭނެ ކަމަށާއި މެންބަރުން ކަންކުރައްވަން އޮންނަ ތަނަކީ އެއީ ކަމަށް ވަޓީ މެންބަރުންނަށް ހުރަސް ނޭޅުއްވޭނެ ކަމަށެވެ.

ރައްޔިތުންގެ މަޖިލީހަކީ މަހްލޫފް ވިދާޅުވި ގޮތުގައި ފުލުހުންނަށް ވަދެވޭ ތަނެއް ނޫން ކަމަށާއި އެތަނުގައި ތަޅުއަޅުވައިގެން އެމަޖިލިސް ހިސޯރު ނުކުރެވޭނެ ކަމަށެވެ. އަދި މިލިޓްރީން އެތަން ހިސޯރުކޮފައިވާތީ މުޅި ދުނިޔޭގެ މީޑިޔާތަކަށް އަރާފައިވާ ކަމަށާއި މުޅި ދުނިޔެ ދަނީ އެކަމަށް މަލާމާތްކޮށް ހީހަދަމުން ކަމަށް މަހްލޫފް ވިދާޅުވިއެވެ.

މީގެ އިތުރުން ޤާނޫން އަސާސީއާ ޤާނޫންތަކާ ޚިލާފަށް ސަރުކާރުން ކުރަމުންދާ ޣައިރު ޤާނޫނީ މިފަދަ ކަންކަމުގެ ސަބަބުން ރާއްޖޭގެ އަގު އިތުރަށް ބޭރުދުނިޔޭގައި ވެއްޓި ރާއްޖޭގެ ފަތުރުވެރިކަމަށްވެސް އަސަރުކުރާނެ ކަމަށާއި އެއީ ގުޅިފައިވާ ޕާޓީތަކުންވެސް އެދޭގޮތް ނޫންކަމަށް މަހްލޫފް ވިދާޅުވިއެވެ.

މަހްލޫފް ވިދާޅުވީ މިއަދު މިކުރާ މަސައްކަތަކީ ޤާނޫނީ އިމުން ބޭރުވެ ޣައިރު ޤާނޫނީ ވެރިކަމެއް ހިންގާ ސަރުކާރު ޤާނޫނީ އިމަށް ސަރުކާރު ގެނައުމުގެ މަސައްކަތް ކަމަށާއި މަޖިލިސް ހިސޯރުކޮށްގެން މަޖިލީހުގެ އަގުވައްޓާލުމަށް ކުރާ މަސައްކަތް ހުއްޓުވާލުން ކަމަށެވެ.

މަޖިލީހަކީ މަހްލޫފް ވިދާޅުވި ގޮތުގައި ހަމައެކަނި ޖަލްސާ ކުރާތަނެއް ނޫން ކަމަށާއި މައްސަލަ ހުށަހެޅުމާއި މެންބަރުންގެ ދާއިރާތަކުގެ މަސައްކަތްވެސް ކުރާތަނަކީ އެއީ ކަމަށެވެ.

މަހްލޫފް ވިދާޅުވީ މަޖިލިސް ތެރެއަށް ވަދެވުން އެއީ ވަރަށް ބޮޑު ކާމިޔާބީއެއް ކަމަށާއި އެކަމަށް މެންބަރުންނަށް ހިތްވަރު ދެއްވި ޢާއމު ރައްޔިތުން ޕެޕަރސްޕްރޭއަށް ފަހަށް ނުޖެހި ދެއްކި ހިތްވަރަށް ފަށްފަށުން ޝުކުރު އަދާކުރައްވާކަމަށްވެސް މަހްލޫފް ވިދާޅުވިއެވެ.  

ޤާނޫނީ އިމުގެ ތެރެއިން މިކުރާ މަސައްކަތައް ކޯޓުތަކުންވެސް އެހީތެރިކަން ދެއްވާ އަދްލު އިންސާފް ޤާއިމްކޮށްދެއްވުން އެދިވަޑައިގަންނަވާކަމަށް ވިދާޅުވަމުން މަހްލޫފް ވިދާޅުވީ މަޖިލީހުގެ 4 މެންބަރަކު ހައްޔަރު ކުރަން ފުލުހުންނަށް އަންގާފައި އޮތްކަމާ އެކަން ކުރަން އެފުލުހުން ދެކޮޅު ހެދިކަންވެސް އޮތީ އެނގިފައި ކަމަށެވެ.

މިރޭ 9:30 ގައިވެސް ގުޅިފައިވާ ޕާޓީތަކުގެ ޖަލްސާއެއް ކުނޫޒްގައި ބޭއްވުމަށް ވަނީ ހަމަޖެހިފައެވެ.