މިދައުރުގެ ތެރޭގައި ގެނެވުނު އިގުތިސާދީ ހެޔޮ ބަދަލުތަކުން، ދައުލަތުގެ އާމްދަނީ ދެގުނަ ކުރެވޭނެ ކަމަށް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، ޖުމްހޫރީ ދުވަހުގެ މުނާސަބަތުގައި ހޮނިހިރު ދުވަހުގެ ހެނދުނު ދިވެހި ގައުމާ މުޚާތަބުކުރައްވައި ދެއްކެވި ވާހަކަފުޅުގައެވެ. އެމަނިކުފާނުގެ ވާހަކަފުޅުގައި، ރިޔާސީ ދައުރުގައި މުޅި ދުނިޔެއަށް ކުރިމަތިވި ކޮވިޑް-19ގެ އާލަމީ ވަބާއާއި، އެކަމާ ގުޅިގެން މުޅި ދުނިޔެއަށް ކުރިމަތިވެގެންދިޔަ އިގުތިސާދީ ދަތިތަކުގެ މައްޗަށް އަލިއަޅުއްވާލެއްވިއެވެ. އެގޮތުން ކޮވިޑުގެ ތެރޭގައި، ރައްޔިތުންނަށް ބޭނުންވާ އަސާސީ އެންމެހައި ކަންކަން ފުރިހަމަކޮށްދީ، ތަރައްގީގެ މަޝްރޫއުތައްވެސް ހުއްޓާނުލައި ކުރިޔަށް ގެންދެވުނުކަން އެމަނިކުފާނު ފާހަގަކުރެއްވިއެވެ.

އެންމެ ފުރަތަމަ އާބާދީގެ އެންމެން ވެކްސިން ފުރިހަމަކުރި މަދު ގައުމުތަކުގެ ތެރޭގައި ރާއްޖެ ހިމެނުމާއި، އެންމެ ފުރަތަމަ ބޯޑަރު ހުޅުވާލެވުނު އެއް ގައުމަކަށް ރާއްޖެ ވެގެން ދިޔަކަންވެސް ރައީސް ފާހަގަކުރެއްވިއެވެ. އަދި ފަތުރުވެރިކަމާއި އިގުތިސާދު، ކޮވިޑުގެ ކުރިން އޮތް ހިސާބަށް ރުޖޫއަކުރުމުގައި ވެސް ބޮޑު ކާމިޔާބީއެއް ލިބިފައިވާކަން އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.

މި ދައުރުގެ ތެރޭގައި ރާއްޖޭގެ އިގުތިސާދު ހަރުދަނާކުރުވުމަށް ކުރެވުނު ބައެއް މުހިންމު މަސައްކަތްތަކުގެ މައްޗަށް އަލިއަޅުއްވާލައްވައި ރައީސް ވަނީ، ވެލާނާ އިންޓަރނޭޝަނަލް އެއާޕޯޓުގެ އައު ޓަރމިނަލް އެޅުމުގެ މަސައްކަތާއި، ހަނިމާދޫ އެއާޕޯޓުގެ މަސައްކަތާއި، ގަން އިންޓަރނޭޝަނަލް އެއާޕޯޓުގެ މަސައްކަތުގެ އިތުރުން، އައްޑޫގެ ބިންހިއްކުމުގެ މަޝްރޫއުގެ މަސައްކަތްތައް ފާހަގަކުރައްވާފައެވެ.

ރާއްޖޭގެ އިގުތިސާދުގެ މައި އެއް ސިނާއަތްކަމުގައިވާ މަސްވެރިކަމާ ގުޅޭގޮތުން، ރައީސް ވިދާޅުވީ، ދެމެހެއްޓެނިވި މަސްވެރިކަމުގެ ސިނާއަތެއް ކުރިއެރުވުމަށް މީގެ ކުރިން ދެވިފައި އޮތް ސަމާލުކަން ކުޑަކަމަށެވެ. ނަމަވެސް މި ދައުރުގެ ތެރޭގައި މަސްވެރިކަމުގެ ސިނާއަތް ކުރިއެރުވުމަށް ބޮޑެތި އިންވެސްޓްމެންޓްތަކެއް ކުރެވިފައިވާކަން އެމަނިކުފާނު ފާހަގަކުރެއްވިއެވެ.

ރައީސް ސާލިހުގެ ވެރިކަމުގައި، ރާއްޖޭގެ މީހުން ދިރިއުޅޭ ހުރިހާ ރަށްތަކެއްގައި ހަމަހަމަކަމާއެކު ތަރައްގީ ހޯދައިދިނުމުގައި ވަނީ ބޮޑެތި ކުރިއެރުންތަކެއް ހޯދާފައެވެ. އެގޮތުން، ރައްޔިތުންގެ ދިރިއުޅުމުގެ ފެންވަރު މަތިކުރުމާއި، ފަޚުރުވެރި، އަބުރުވެރި ދިރިއުޅުމަކަށް މަގުފަހިކޮށްދިނުމުގެ ގޮތުން ރައްޔިތުން ބާރުވެރިކުރުވުން ހިމެނެއެވެ.