ޣައްޒާގެ އުތުރުގައި އުޅޭ މީހުން ސަލާމަތްވާން އޮތް ހަމައެކަނި މަގު: ފުރާނަ އަތްމައްޗަށް ލައިގެން ފައިމަގުގައި ފަސްގަޑިއިރުގެ ދަތުރެއްކުރުން

އިސްރާއީލުން ޣައްޒާއަށް ދެމުންދާ ހަމަލާތަކުން ސަލާމަތްވުމަށް އެތައް ހާސް ރައްޔިތުންނެއް ފައިމަގުގައި ޣައްޒާގެ ދެކުނަށް ބަދަލުވެއްޖެއެވެ.

އިސްރާއީލުން ޣައްޒާ ހިފުމަށް ކުރާ މަސައްކަތުގައި މިހާރު އިސްރާއީލު ސިފައިންގެ ފައުޖުތައް އޮތީ ޣައްޒާ ސިޓީ ވަށާލާފައެވެ. އުތުރުގައި އިސްރާއީލު އަސްކަރިއްޔާ އޮތީ ޝާތީ ރެފިޔުޖީ ކޭމްޕުގައެވެ. އަދި އިރުމަތިން ޣައްޒާގެ މެދުގައި އޮންނަ ޣައްޒާ ސިޓީ އަށް ވަނުމަށް އަންނަނީ މަސައްކަތްކުރަމުންނެވެ.

މީހުން ދިރިއުޅެމުން އަންނަ ތަންތަނާއި އެތައް ހާސް ބަލި މީހުންނާއި ބޯހިޔާވަހިކަން ހޯދަމުން އަންނަ ހޮސްޕިޓަލުތައް އިސްރާއީލުގެ ޓޭންކަރުތަކުން ވަށާލާފައިވާއިރު އެތައް ހަމަލާތަކެއް އަންނަނީ ހޮސްޕިޓަލްތަކަށް ދެމުންނެވެ. ބައެއް ހޮސްޕިޓަލުތަކުގައި ތިބި އެތައް ސަތޭކަ ބަލި މީހުންނާއި ބޯހިޔާވަހިކަން ހޯދަމުން އަންނަ ކުޑަކުދިންނާއި އަންހެނުންނާއި އުމުރުން ދުވަސްވީ މީހުން އެތަން ދޫކޮށްދާން އިސްރާއީލުން އަންނަނީ އަންގަމުންނެވެ. އެއާއެކު ޣައްޒާގެ އުތުރުގައި ދިރިއުޅޭ ރައްޔިތުންނަށް މަޖުބޫރުވެފައިވަނީ ފުރާނަ ސަލާމަތްކުރުމަށް ޣައްޒާގެ ދެކުނަށް ބަދަލުވާށެވެ.

ހުކުރު ދުވަހު އިސްރާއީލުގެ އެއްގަމު މަގުގެ ހަމަލާތައް ވަރުގަދަ ވެފައިވާއިރު އެތައް ހާސް ރައްޔިތުންނެއް ވަނީ ޣައްޒާގެ ދެކުނަށް ފައިމަގުގައި ގޮސްފައެވެ. ޣަައްޒާގެ މައި މަގުން ފަސް ގަޑިއިރު ހިނގާފައި މީހުން ދަނީ ހުދަ ދިދަ ނަގައިގެން އަމާން ދިންކަން ހާމަކުރަމުންނެވެ. އުމުރުން ދުވަސްވީ މީހުންނާއި ބަލި މީހުންނާއި ކުޑަކުދިންނާއި އިސްރާއީލުން ދިން ހަމަލާތަކުގައި ބޮޑެތި ޒަޚަމްތައް ލިބިފައިވާ މީހުންވެސް އަންނަނީ ދެކުނަށް ބަދަލުވަމުންނެވެ.

ބޮޑެތި އޮޕަރޭޝަންތައް ކޮށްފައި ތިބި މީހުން ވީލް ޗެއަރގައި އެމީހުންގެ އާއިލާތަކުން ގެންދާއިރު މުސްކުޅިން އަތުލަފިކޮށްގެންނާއި ވީލް ޗެއަރގައި ގެންދާ މަންޒަރު ފެނެއެވެ. އެމީހުން ގެންދަނީ ހަމައެކަނި ކޮންމެހެން ބޭނުންވާ އެއްޗިއްސެވެ.

އިސްރާއީލު އަސްކަރިއްޔާއިން ބުނެފައިވާ ގޮތުގައި ހުކުރު ދުވަހު ޣައްޒާގެ އުތުރުން 100،000 އެއް ހާ މީހުން ވަނީ ދެކުނަށް ބަދަލުވެފައެވެ. އަނެއްކޮޅުން ފައިމަގުގައި ހިނގާފައިދިޔަ މީހުންނަށް އަމާޒުކޮށް އިސްރާއީލުން ވަނީ ހަމަލާދީފައެވެ. އަދި އިސްރާއީލުގެ ޗެކްޕޮއިންޓްތަކުން މީހުން ބަލާފާސްކުރަމުންދެއެވެ.

ޣައްޒާގެ މިހާރު ހާލަތާއި ގުޅޭގޮތުން އދ ގެ ހިޔުމަނިޓޭރިއަން އޮފީހުން ބުނެފައިވަނީ ޣައްޒާގެ އުތުރަށް އެހީގެ ތަކެތި ފޯރުކޮށް ނުދެވޭކަމަށެވެ. އަދި ޣައްޒާ އަކީ މިހާރު ދުނިޔެ މަތީގެ ނަރަކައިގެ ގޮތުގައި ވަނީ ސިފަކޮށްފައެވެ.

އދން ބުނެފައިވާ ގޮތުގައި ޣައްޒާގެ 2.3 މިލިއަން މީހުންގެ ތެރެއިން 1.5 މިލިއަން މީހުން ވަނީ ގެދޮރު ދޫކޮށް ގޮސްފައެވެ. ގިނަ އަދަދެއްގެ ބަޔަކު ޣައްޒާގެ ދެކުނަށް ބަދަލުވިނަމަވެސް އިސްރާއީލުން އަންނަނީ ޣައްޒާގެ ދެކުނަށް އަމާޒުކޮށްވެސް ހަމަލާދެމުންނެވެ.