ބަލިވުމަކީ ފުޓުބޯޅައިގެ ބައެއް: ޒަވީ

ބަލިވުމަކީ ފުޓުބޯޅައިގައި ހިމެނޭ ބައެއް ކަމަށް، ސްޕެއިންގެ ބާސެލޯނާގެ ކޯޗު ޒަވީ ހެނާންޑޭޒް ބުނެފި އެވެ.

ޒަވީ މިހެން ބުނީ ޔުއެފާ ޗެމްޕިއަންސް ލީގު ގްރޫޕް ސްޓޭޖުގައި ޝަޚްތަރު ޑޮނެސްކާ ވާދަކޮށް، ބާސެލޯނާ ބަލިވުމާ ގުޅިގެންނެވެ. އެ މެޗުން ބަލިވުމުން، މުބާރާތުގެ އަނެއް ބުރަށް ދިޔުމަށް ބާސެލޯނާ އިން އިތުރު އިންތިޒާރެއް ކުރަން ޖެހުނީ އެވެ.

އެ މެޗަށްފަހު ވާހަކަ ދައްކަމުން ޒަވީ ބުނީ، ބަލިވި ނަމަވެސް ޓީމަށް ގެއްލޭނެ އެއްޗެއް ނެތް ކަމަށެވެ. އޭނާ ބުނީ އަމިއްލަ އިތުބާރު ދަމަހައްޓައިގެން، މުބާރާތުގައި ކުރިއަށް ދިޔުމުގެ ފުރުސަތު އަދިވެސް އޮތް ކަމަށެވެ. އެކަން ފާހަގަކޮށް ޒަވީ ބުނީ، ބަލިވުމަކީ ފުޓުބޯޅައިގައި ހިމެނޭ ބައެއް ކަމަށެވެ. އެހެންކަމުން، ކުޅުންތެރިން ދެން ކުރަން އޮތް މަސައްކަތަކީ، ހިތްވަރު އެލުވާ ނުލައި ކުރިއަށް ދިޔުން ކަމަށް ވެސް އޭނާ ވަނީ ބުނެފަ އެވެ. ޒަވީ ދެކޭ ގޮތުގައި ބާސެލޯނާގެ ކުޅުންތެރިން އެކަން ވަރަށް ފުރިހަމަ އަށް ކުރާނެ އެވެ. އޭނާ ބުނީ މެޗުން ބަލިވުމަކީ އޭނާގެ އެންމެ ބޮޑު ކަންބޮޑުވުން ނޫން ކަމަށާއި، ކަންބޮޑު ވަނީ ކުޅުންތެރިންގެ އިތުބާރު ގެއްލިދާނެތީ ކަމަށެވެ.

މީގެ އިތުރުން ޒަވީ ބުނީ ދެން މަސައްކަތް ކުރަން ޖެހޭނީ ކުރިއަށް އޮތް މެޗަށް ކަމަށާއި، އެ މެޗަށް ނިކުންނައިރު މާޒީގެ ކަންކަން ހަނދާނުގައި ހުރެގެން ނުވާނެ ކަމަށެވެ. އޭނާ ބުނީ ޗެމްޕިއަންސް ލީގުގައި ޕޯޓޯއާ ދެކޮޅަށް ނިކުންނަ މެޗަކީ މުޅިން އައު މެޗެއް ކަމަށާއި، ހެދުނު ގޯސްތައް ރަނގަޅުކޮށްގެން ކުރިއަށް ދެވެނޭ ކަމަށެވެ.

ޗެމްޕިއަންސް ލީގުގައި ބާސެލޯނާ އަށް ދެން އޮންނާނީ މި މަހުގެ 29 ވަނަ ދުވަހު އަމިއްލަ ދަނޑުގައި ޕޯޓޯއާ ދެކޮޅަށް ކުޅޭ މެޗެވެ.