ޖަނަވަރީ ޓްރާންސްފާގައި ކުޅުންތެރިން ހޯދުމުގެ ވިސްނުމެއް ރެއާލްގެ ނެތް: އަންޗެލޮޓީ

ކުރިއަށް އޮތް ޖަނަވަރީ ޓްރާންސްފާ މާކެޓުގައި އައު ކުޅުންތެރިން ހޯދުމުގެ ވިސްނުމެއް ރެއާލް މެޑްރިޑުން ނުގެން ގުޅޭ ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.

އަންޗެލޮޓީ މިހެން ބުނީ، ކުރިއަށް އޮތް ޓްރާންސްފާ މާކެޓުގައި ސްކޮޑު ވަރުގަދަ ކުރުމަށް ރެއާލުން ކުރަމުން އަންނަ މަސައްކަތާ ގުޅޭ ގޮތުން ސުވާލު ކުރުމުންނެވެ. އޭނާ ބުނީ، އެ ޓްރާންސްފާ މާކެޓުގައި އެއްވެސް ކުޅުންތެރިޔަކު ހޯދުމުގެ ވިސްނުމެއް ނެތް ކަމަށެވެ. އަންޗެލޮޓީ ދެކޭ ގޮތުގައި ކުރިއަށް އޮތީ ރެއާލަށް ހަމަޖެހިލައިގެން އޮވެވޭނެ ޓްރާންސްފާ މާކެޓެކެވެ. ސަބަބެއްގެ ގޮތުގައި އޭނާ ބުނީ، މިހާރު ވެސް ރެއާލްގައި އެ ޓީމަށް ބޭނުންވާ ފެންވަރުގެ ކުޅުންތެރިން ތިބުން ކަމަށެވެ. ޓީމުގައި މިވަގުތު ކޮންމެ ވެސް ވަރަކަށް އަނިޔާގެ މައްސަލަތަކެއް އުޅުނު ނަމަވެސް، އެކަމަށް އަވަސް ޙައްލެއް ލިބޭނެ ކަމަށް އޭނާ ބުންޏެވެ.

އެގޮތުން އަނިޔާގެ ސަބަބުން މިހާރު ކުޅުމާ ދުރުގައި ހުރި އެއް ނަންބަރު ގޯލް ކީޕަރު، ބެލްޖިއަމްގެ ތިބައޫ ކޯޓުއާ އަދި ބްރެޒިލްގެ ޑިފެންޑަރު އެޑާ މިލިޓާއޯ ވެސް ސީޒަން ނިމުމުގެ ކުރިން އަނބުރާ ކުޅުމުގެ ތެރެއަށް އަންނާނެ ކަމަށް އޭނާ ބުންޏެވެ. އެހެންކަމުން ޖަނަވަރީ ޓްރާންސްފާގައި އައު ކުޅުންތެރިން ހޯދަން ޖެހޭ ސަބަބެއް ނެތް ކަމަށާއި، އެހެން ނަމަވެސް، ކަންތައް ވެގެންދާނެ ގޮތެއް ނޭންގޭ ކަމަށް އޭނާ ވަނީ ބުނެފަ އެވެ.

އިތުރަށް އަންޗެލޮޓީ ބުނީ، މިހާރު އޭނާ އަށް ލިބިފައި އޮތް ސްކޮޑާމެދު ހިތްހަމަ ޖެހޭ ކަމަށެވެ. އެ ކުޅުންތެރިންނާއެކު ކުރެވެމުން އަންނަ މަސައްކަތުގެ ތެރެއިން، ރެއާލުން ބޭނުންވާ އަމާޒަށް ވާސިލްވެވޭނެ ކަމަށް ވެސް އަންޗެލޮޓީ ޤަބޫލު ކުރެ އެވެ. އެކަމަށް އިޝާރާތްކޮށް އަންޗެލޮޓީ ބުނީ މިހާތަނަށް އައިއިރު، ރެއާލްގައި ތިބި ޒުވާން ކުޅުންތެރިން ދައްކަމުން އަންނަނީ ފާހަގަކޮށްލެވޭ ވަރުގެ ހުނަރުވެރި ކުޅުމެއް ކަމަށެވެ.

ރެއާލުން މިހާރު ތައްޔާރުވަމުން އަންނަނީ ޔުއެފާ ޗެމްޕިއަންސް ލީގު ގްރޫޕް ސްޓޭޖުގައި އެސްސީ ބަރަގާއާ ދެކޮޅަށް ކުޅޭ މެޗަށެވެ.