ޑިއާޒް އެދުނީ ބައްޕަ މިނިވަން ކޮށްދިނުމަށް
7 ނޮވެމްބަރު 2023 | އަންގާރަ 00:23ޑިއާޒްގެ ބައްޕަ ލުއިސް މެނުއެލް ޑިއާޒް، ރަހީނުކޮށްފައިވަނީ މިދިޔަ އޮކްޓޫބަރު މަހުގެ ފަހު ކޮޅު
ލަނޑު ޖެހުމަށްފަހު، ބައްޕަ މިނިވަންކުރުމަށް ގޮވާލާ ޑިއާޒް ދިން މެސެޖު
ރަހީނުކޮށްފައިވާ އޭނާގެ ބައްޕަ މިނިވަން ކޮށްދިނުމަށް އެދި ލިވަޕޫލަށް ކުޅެމުން އަންނަ ކޮލަމްބިއާގެ ފޯވާޑް ލުއިސް ޑިއާޒް މެސެޖެއް ދީފި އެވެ.
ޑިއާޒްގެ ބައްޕަ ލުއިސް މެނުއެލް ޑިއާޒް، ރަހީނުކޮށްފައި ވަނީ މިދިޔަ އޮކްޓޫބަރު މަހުގެ ފަހު ކޮޅު އެވެ. އެކަމާ ގުޅިގެން ކޮލަމްބިއާގެ ސިފައިން އަދި ފުލުހުން ގުޅިގެން އަންނަނީ ޑިއާޒްގެ ބައްޕަ ހޯދުމަށް ވަރުގަދަ އޮޕަރޭޝަނެއް ހިންގަމުންނެވެ. ޑިއާޒްގެ ބައްޕަ ރަހީނުކޮށްފައި ވަނީ އެ ޤައުމުގެ ޕެޓްރޯލް ވިއްކާ ތަނެއްގައި ހުއްޓަ އެވެ. ޑިއާޒްގެ ބައްޕަ ރަހީނު ކޮށްފައި ވަނީ ސައިކަލެއްގައި އައި ގުރޫޕަކުންނެވެ.
އޭގެ ފަހުން އިނގިރޭސި ޕްރިމިއާ ލީގުގައި ލިވަޕޫލުން ލޫޓަން ޓައުނާ ދެކޮޅަށް ކުޅުނު މެޗުގައި ޑިއާޒް ވަނީ ކުޅެފަ އެވެ. އޭގެ ކުރިން ކުޅުނު ދެ މެޗުގައި ވެސް ޑިއާޒް ކުޅެފައެއް ނުވެ އެވެ. އެ މެޗުގައި އޭނާ ކުޅެން ނިކުމެފައި ވަނީ ބަދަލު ކުޅުންތެރިޔެއްގެ ގޮތުގައި ބެންޗުންނެވެ. ޑިއާޒް ކުޅެން ނިކުތްއިރު ލިވަޕޫލް އޮތީ 1-0 އިން ބަލިވެފަ އެވެ. ނަމަވެސް މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި އޭނާ ވަނީ ލަނޑު ޖަހައި، ލިވަޕޫލް ސަލާމަތް ކޮށްދީފަ އެވެ. ލަނޑު ޖެހުމަށްފަހު އުފާ ފާޅު ކުރުމުގެ ތެރޭގައި ޑިއާޒް ވަނީ ރަހީނުކޮށްފައިވާ އޭނާގެ ބައްޕަ މިނިވަން ކުރުމަށް ގޮވާލައިފަ އެވެ.
ޑިއާޒްގެ ބައްޕަ ރަހީނުކޮށްފައިވާ ކަމަށް ރިޕޯޓުކޮށްފައި ވަނީ ކޮލަމްބިއާގެ ސަރުކާރާ ދެކޮޅު، ނިރުބަވެރި ޖަމާއަތަކުންނެވެ. އެ ޖަމާއަތުން އެކަމަށް މިހާރު އެއްބަސްވެފައިވާ ކަމަށް ވެސް ރިޕޯޓުތައް ބުނެ އެވެ. މީގެ އިތުރުން ވަރަށް އަވަހަަށް ޑިއާޒްގެ ބައްޕަ ދޫކޮށްލާނެ ކަމަށް އެ ޖަމާއަތުން ބުނެފައިވާ ކަމަށް ވެސް ރިޕޯޓުތައް ބުނެ އެވެ.
