ރައްޔިތުންގެ މަޖިލީސް ފެއިލްވެފައިވާ ކަމަށާއި އެކަން އެގޮތަށް ވީ މަޖިލީސް ހިންގަން ތިއްބެވި އިސްވެރިންގެ ސަބަބުން ކަމަށް ރައްޔިތުންގެ މަޖިލީހުގެ އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަފުޅު ދައްކަވަމުންނެވެ. 7 ނުވަތަ 8 މަސް ވަންދެން މުއައްސަސާއަކުން ޚިދުމަތް ނުދެވި އޮތުމަކީ އެ މުއައްސަސާއެއް ފެއިލްވުން ކަމަށް އޭނާ ސިފަކުރެއްވިއެވެ. އަދި އެ މުއައްސަސާގެ ބޭނުން ރައްޔިތުންނަށް ނެތް ކަމަށް ފާހަގަކުރައްވާ އޭނާ ވަނީ އެކަމާމެދު ކަންބޮޑުވުން ފާޅުކުރައްވާފައެވެ.
އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން ވިދާޅުވީ މިއަދު މަޖިލީހުގެ އަމީން ޢާއްމާއި ކައުންސެލް ޖެނެރަލް އަށް ވެސް އިތުބާރު ނެތް ކަމަށެވެ. އެކަން އެހެން ދިމާވެފައިވަނީ މިހާރު މަޖިލީހަށް ހުށަހަޅާފައިވާ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ނުގެންދަވާ، އެ މައްސަލަ ކުރިއަށް ނުގެންދެވޭނެ ގޮތަކަށް އެ ދެބޭފުޅުން މަޖިލީހުގެ ހިންގާ ޤަވާއިދާއި ޤާނޫނު އަސާސީ މާނަކުރައްވާތީ ކަމަށާއި އަދި އެ ދެ ބޭފުޅުން މަސައްކަތް ކުރައްވަނީ ވީ މިންވަރަކުން އުސޫލުގެ ތެރެއަށް ފައްތައިގެން މަޖިލީހުގެ ރިޔާސަތުން އެދޭ ގޮތަކަށް ކަންކަން ކޮށްދިނުމަށް ކަމަށް ވިދާޅުވިއެވެ.
މަޖިލީހުގެ ރައީސް ނަޝީދާއި މަޖިލީހުގެ ނާއިބު ރައީސް އީވާ ކަންކަން ކުރައްވަނީ އިންސާފުން ކަމަށް ތަންދޮރު ދަންނަ މީހުން ޤަބޫލު ނުކުރާނެ ކަމަށް ވެސް އޭނާ ވިދާޅުވިއެވެ. އުސޫލާއި އެއްގޮތަށް ކަންކަން ކުރާ ނަމަ އެ ދެ ބޭފުޅުން ތިއްބަވާނީ މިއަދުވެސް މެންބަރުންގެ ފުރިހަމަ އިތުބާރާއި އެކުގައި ކަމަށާއި މުއައްްސަސާ އެއް ފެއިލްވަނީ އެތަން ހިންގަން ތިއްވަބާ ބޭފުޅުންގެ ސަބަބުން ކަމަށާއި ދެން ވެސް މަސައްކަތް ކުރަންވީ ޤަވާއިދުގެ ތެރެއަށް ވީވަރަކުން ކަންކަން ފައްތަން ކަމަށް އޭނާ ވިދާޅުވިއެވެ. އަދި ޤަވާއިދާއި ޤާނޫނުތަކާއި ޚިލާފަށް ޢަމަލުކުރުމަކީ ޖަވާބުދާރީ ކުރުވޭނެ ކަމެއް ކަަމަށް އޭނާ ވިދާޅުވިއެވެ. އެކަން މިހާރު މަޑު ޖައްސާލައިގެން ތިބީ މި ވަގުތު ނަޝީދުގެ އިތުބާރު ނެތްކަމުގެ މައްސަލަ ސުޕްރީމް ކޯޓަށް ހުށަހެޅިފައި އޮތުމުން ކަމަށް މެންބަރު މުހައްމަދު ރަޝީދު ހުސެއިން ވިދާޅުވިއެވެ. އަދި އާއްމު ކޮމިޓީން ކަމެއް ނިންމި ނަމަވެސް، ކޮންމެވެސް އުޒުރެއް ދައްކައިގެން އެކަން އެޖެންޑާ ނުކޮށް ދޫކޮށްލައްވާތީ، މަޖިލީހަށް އޮތް އިތުބާރާއި އުންމީދު ގެއްލިފައިވާ ކަމަށް އޭނާ ވިދާޅުވިއެވެ.
