މި ސަރުކާރުން ވަގުތީ ނާޖާއިޒު މަންފާ ހޯދުމަށް އެވަގުތަކު ގެންނަންޖެހޭ ހުރިހާ ބަދަލެއް ގެންނާނެ: ބިގޭ
މި ސަރުކާރަށް ވަރަށް ބޮޑަށް ފާރަވެރި ވާންޖެހޭ
ފަލަސުރުހީ ޕްރޮގްރާމްގައި އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވާހަކަދައްކަވަނީ
މި ސަރުކާރުން ވަގުތީ ނާޖާއިޒު މަންފާ ހޯދުމަށް އެވަގުތަކު ގެންނަންޖެހޭ ހުރިހާ ބަދަލުތައް ގެނެސް، އެގޮތަށް މަސައްކަތްތައް ބައްޓަންކުރާނެ ކަމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.
ރާއްޖެޓީވީގައި ވާހަކަދައްކަވަމުން ބިގޭ ވިދާޅުވީ ކޮންމެއިރަކު ކޮންމެ ވަގުތަކު ވެސް އެ ވަގުތުތަކަށް ބޭނުންވާ ވަގުތީ ނާޖާއިޒް މަންފާ ހޯދުމަށް ގެންނަންޖެހޭ ބަދަލުތައް ގެންނާނެ ކަމަށާއި، މިސަރުކާރުގެ ދޮޅު އަހަރުގެ ތެރޭގައި އެމަންޒަރު ފެނިފައިވާ ކަމަށެވެ. އެއީ ގާނޫނު އަސާސީއަށް ގެންނަ ބަދަލެއް ވިޔަސް، ކުންފުނިތަކުގެ ހިންގުމަށް ވިޔަސް އެކަމަށް ކުރާނެ ކަމަށް ބިގޭ ވިދާޅުވިއެވެ.
މި ސަރުކާރަށް ވަރަށް ބޮޑަށް ފާރަވެރި ވާންޖެހޭކަން ފާހަގަކުރައްވައި ބިގޭ ވިދާޅުވީ އިންސާފުވެރިކަމާއެކު އިންތިޚާބެއް ކުރިއަށް ގެންދެވޭނެ ކަމާމެދު ސުވާލު އުފެދިފައިވާ ކަމަށެވެ. ނަމަވެސް ބޭނުންވާ ހުރިހާ ގޮތެއް ހެދުމުގެ ފުރުސަތު ސަރުކާރަށް ނުދޭނެ ކަމަށް އޭނާ ވިދާޅުވިއެވެ.
އަޅުގަނޑުމެންނަށް ކުރެވޭނެ ވަރަށް ގިނަ ކަންތައް ހުންނާނެ އެނގޭތޯ. ރައްޔިތުންނާ ހިސާބުން ވެރިކަން ފެށިގެން މިއަންނަނީ އެނގޭތޯ. ރައްޔިތުންގެ ބަސް ވަރުގަދަވާނީ. އެހެންވީމަ ރައްޔިތުން ރައްޔިތުންގެ ހައްގުތަކަށް އަރައިގަތީމަ އެކަމަށް ނުކުމެ އަޑު އުފުލީމަ އެކަންތަކެއް އެބޭފުޅުން ބޭނުންހާ ގޮތަކަށް ކުރެވޭނެ ކަމަކަށް ގަބޫލެއް ނުކުރަން. އެހިސާބަށް ދާއިރުގައި އަޅުގަނޑުމެން ތިބޭނީ މިފަދަ ކޮންމެ ދަނޑިވަޅެއްގައި ޖަވާބުދާރީ ކުރުމަށްޓަކައި އިންސާފު ހޯދުމަށްޓަކައި ކުރަންޖެހޭ ކަންތައްތައް ރައްޔިތުންނާއެކު ގޮސް ސަރުކާރަށް އަޑު އިއްވުމަށް މަސައްކަތް ކުރުމަށް. ހަމައެއާއެކު އަޅުގަނޑުމެން ފާރަވެރިވުމަށް އިންތިޚާބުތައް ހިނގަމުންދާ ގޮތް ބެލުމަށް އަބަދުވެސް ބައިނަލްއަގުވާމީ އޮބްޒާވަރުންނާ ބޭބޭފުޅުންގެ އެހީތެރިކަން ރާއްޖެއަށް ލިބިފައިހުރީ. އެމަގުން އަޅުގަނޑުމެން މަސައްކަތް ކުރަމުންދާނީ.އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ)
ވަކިވެފައިވާ ތިންބާރު އެއްކުރުމުގެ މަސައްކަތްތައް ރައީސް ޑރ.މުހައްމަދު މުއިއްޒު ކުރައްވަމުން ގެންދަވާކަން ފާހަގަކުރައްވައި ބިގޭ ވިދާޅުވީ ތާއަބަދު އެގޮތަށް މަސައްކަތް ނުކުރެވޭނެ ކަމަށާއި، ހާލަތު ބަދަލުވާނެ ކަމަށެވެ.
ކުރީގައި ރާއްޖެ އޮތް ހާލަތަށް ގައުމު ވައްޓާލުމުގެ ފުރުސަތު ނުދޭނެ ކަމަށް ބިގޭ ވިދާޅުވިއެވެ. އެ ޒަމާނަށް ވާސިލުވުމަށް ރައީސް މުއިއްޒު ކުރައްވާ މަސައްކަތްތަކުން ހަލާކުވެދާނީ އެމަނިކުފާނު ކަމަށް ބިގޭ ވިދާޅުވިއެވެ.
