ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށްނުދާތީ، މަޖިލީހުގެ ގަވައިދު މާނަކުރުމާ ގުޅޭގޮތުން ސުޕްރީމް ކޯޓަށް ހުށަހެޅި މައްސަލާގައި މަޖިލިސް ތަމްސީލްކުރައްވާނީ ދައުލަތު ބަންޑާރަ ނައިބު އިބްރާހީމް ރިފްއަތުކަމަށް އޭޖީ އޮފީހުން ބުނެފިއެވެ.
ނަޝީދު ވަކިކުރުމަށް ހުށަހަޅާފައިވާ ގަރާރު އެންމެ ފުރަތަމަ އެޖެންޑާކުރީ މިދިޔަ ހަފުތާގެ އާދިއްތަ ދުވަހަށެވެ. އޭގެ ފަހުން ހޯމަ ދުވަހަށްވެސް އެ މައްސަލަ އެޖެންޑާކުރިއެވެ. ޖެހިގެން އައި އަންގާރަ ދުވަހު ސަޕްލިމެންޓްރީ ބަޖެޓާއި، ބަޖެޓުގެ މަސައްކަތް ތާވަލްކުރިއެވެ. ނަމަވެސް ބަންޑާރަ ނައިބު ވަނީ އެ ޖަލްސާއަށް ވަޑައިނުގަތުމަށް ފިނޭންސް މިނިސްޓަރު އިބްރާހީމް އަމީރަށް ލަފާދެއްވާފައެވެ. އަދި އެ ލަފަޔާ އެއްގޮތަށް ފިނޭންސް މިނިސްޓަރު އެ ދުވަހު މަޖިލީހަށް ވަޑައެއްނުގަންނަވައެވެ.
ސުޕްރީމް ކޯޓަށް މި މައްސަލަ ހުށަހެޅީ މިދިޔަ ހަފުތާގެ އާދިއްތަ ދުވަހު ކަމަށް ވާއިރު، މި މައްސަލަ ކޯޓުގައި ތާވަލްކޮށްފައި ވަނީ ހޯމަ ދުވަހަށެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ އާދިއްތަ ދުވަހަށް ތާވަލްކޮށްފައި ވަނިކޮށް، އެ ޖަލްސާ ވަނީ ކެންސަލްކޮށްފައެވެ.
މިއީ މި މައްސަލަ އެޖެންޑާކުރި 5 ވަނަ ފަހަރެވެ. މި ޖަލްސާ ކެންސަލްކުރީ މަޖިލީހުގެ ނައިބު ރައީސް އީވާ އަބްދުﷲ ޖަލްސާއަށް ސަލާމް ފޮނުއްވާފައި ވާތީކަމަށް މަޖިލީހުގެ އިދާރާއިން ވަނީ މިއަދު ހެނދުނު މެންބަރުންނަށް އަންގާފައެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަގާމުން ވަކިކުރުމުގެ މައްސަލަ ކުރިއަށް ގެންދިޔުމަށް މިދިޔަ ހަފުތާގެ އާދިއްތަ، ހޯމަ، ބުދަ އަދި ބުރާސްފަތި ދުވަހަށް އެޖެންޑާކުރިއެވެ. ނަމަވެސް މަޖިލީހުގެ ނައިބު ރައީސް އީވާ އަބްދުﷲ އެ ދުވަސްތަކުގައިވެސް ސަލާމުގައި ހުންނެވުމުން، ޖަލްސާ ވަނީ ކެންސަލްކޮށްފައެވެ. މި މައްސަލަ ކުރިއަށްގެންދެވޭނެ ގޮތެއް ހޯދުމަށް އެމްޑީޕީން ވަނީ ސުޕްރީމް ކޯޓަށް މައްސަލަ ހުށަހަޅާފައެވެ. އެ ކޯޓުން މި މައްސަލަ ބަލައިގަނެ، ހޯމަ ދުވަހަށް ވަނީ ތާވަލުކޮށްފައެވެ.
ނަޝީދުގެ އިތުބާރު ނެތްކަމުގެ މައްސަލަ ދެވަނަ ފަހަރަށް އެމްޑީޕީ ޕީޖީ ގްރޫޕުން މިދިޔަ މަހު މަޖިލީހަށް ވައްދާފައިވަނީ 49 މެންބަރުންގެ ސޮޔާއެކުގައެވެ. އެމަނިކުފާނުގެ އިތުބާރު ނެތްކަމަށް ކަނޑައަޅަން ބޭނުންވާނީ 43 މެންބަރުންގެ ވޯޓެވެ.
