އައިއޭސީގެ ޣައްޒާގެ ޓީމު: ނުރައްކަލުގައި ނަމަވެސް ހޯދަނީ އެ ޒިންމާ އަދާކުރާނެ ގޮތެއް!
އައިއޭސީން ޣައްޒާއަށް ތަކެތި އެތެރެކުރާ ގޮތާ މެދު އާންމުން ސުވާލު ކުރޭ
ގްރައުންޑް ޓީމުން ކުރާ މަސައްކަތުން ފާހަގަ ކުރެވުނީ އެ މަސައްކަތް ކުރުމުގައި ޣައްޒާގައި ތިބި އައިއޭސީގެ މެންބަރުން ކުރާ ބުރަ މަސައްކަތް
އިންޓަނޭޝަނަލް އެއިޑް ކެމްޕެއިން (އައިއޭސީ) އިން ޣައްޒާގެ ހުންނަ އަލް އަޤްސާ މާޓިޔާސް ހޮސްޕިޓަލަށް ތެޔޮ ފޯރުކޮށްދިން ކަމަށް މީސް މީޑިޔާގެ ޒަރިއްޔާއިން ހާމަކުރުމާއެކު، މީސް މީޑިޔާގައި އެ ވާހަކަތައް ދައުރުވާން ފެށީ ގިނަ ރައްޔިތުން ސުވާލެއްގެ ތެރެއަށް ވައްޓާލުމަށްފަހު އެވެ. އެ ހާދިސާ ނޫނަސް، އައިއޭސީގެ ޣައްޒާގެ މަސައްކަތްތަކާ ގުޅުވައި، މުޅި ޣައްޒާ ބަންދުކޮށްފައިވާއިރު، އައިއޭސީން ތެލާއި ކާބޯތަކެތި ފޯރުކޮށްދެނީ ކިހިނަކުންތޯ އާންމުން ދިޔައީ ސުވާލު ކުރަމުންނެވެ.
އެ ސުވާލަށް އައިއޭސީން ދިނީ ސާދާ ޖަވާބެކެވެ. ތެލުގެ ހާދިސާއަށް އައިއޭސީން ބުނީ އެއީ "އެ ތެލަކީ އައިއޭސީގެ ގްރައުންޑް ޓީމުގެ ބުރަ މަސައްކަތުން ޣައްޒާގެ އެތެރޭން ހޯދުމަށްފަހު ރައްކާތެރިކަމާއެކު ހޮސްޕިޓަލަށް ފޯރުކޮށްދެވުނު ތެޔޮ" މި އެވެ. ބުނެލާ ބަހަކުން ނިންމާލުމަށް ވުރެ، އެކަން މާ ޝައުގުވެރިވީ އެހާ ހިސާބުންނެވެ. ގްރައުންޑް ޓީމުން ކުރާ މަސައްކަތުން ފާހަގަ ކުރެވުނީ އެ މަސައްކަތް ކުރުމުގައި ޣައްޒާގައި ތިބި އައިއޭސީގެ މެންބަރުން ކުރާ ބުރަ މަސައްކަތެވެ.
ހަމަ ޔަގީން އެއްކަމެއް އެބަ އޮތެވެ. އިސްރާއީލުން ފަލަސްތީނުގެ ޣައްޒާއަށް ދެމުންދާ ހަމަލާތަކުގައި އައިއޭސީއާއި އެހެން ޖަމިއްޔާއެއް ތަފާތެއް ނުކުރެ އެވެ. "ކަލެކްޓިވް ޕަނިޝްމެންޓް" އެއް އެންމެންނަށް ދެމުންދާއިރު، އޭގެ ތެރޭގައި އައިއޭސީ އަށް ވެސް ބޮޑެތި ގެއްލުންތަކެއް ލިބެ އެވެ.
މީގެ ސަބަބުން، ޣައްޒާގެ ރައްޔިތުންނަށް ބޭނުންވާ އެންމެ ޟަރޫރީ ކަންކަން ފުރިހަމަ ކުރުމަށް، ދިވެހި ރައްޔިތުން ހެޔޮހިތުން ދޭ ފައިސާ އިން، ޚިދުމަތް ދިނުމުގައި ބޮޑެތި ގޮންޖެހުންތަކާ އެ ޖަމިއްޔާއިން ކުރިމަތިލާން ޖެހެ އެވެ. ވަކިން ޚާއްސަކޮށް، އެ މަސައްކަތްތަކަކީ އެ ޓީމުގެ މެންބަރުންގެ އަމިއްލަ ނަފްސު، ނުރައްކަލަކަށް ހުށަހެޅޭ ކަމަކަށް ވީ ނަމަވެސް، އެ މަސައްކަތުގައި ފެޔަށް ޖެހުމަކީ އައިއޭސީން ބޭނުންވާ ގޮތެއް ނޫނެވެ.
ޣައްޒާގެ އަލް އަޤްސާ މާޓިޔާސް ހޮސްޕިޓަލަށް ތެޔޮ ފޯރުކޮށްދިނުމަކީ އޭގެ އެންމެ މިސާލެކެވެ. ރާއްޖެ އެމްވީ އިން ދެންނެވި ސުވާލަކަށް ޖަވާބު ދެއްވަމުން އައިއޭސީގެ މީޑިއާ އެންޑް ޕީއާރު ޑިރެކްޓަރު، އަޒްހަދު އަޙްމަދު ވިދާޅުވީ އެކަން ހިނގާ ގޮތެވެ. ތަފްސީލު ކޮށްލަދޭނަމެވެ.
އަޒްހަދު ވިދާޅުވި ގޮތުންނަމަ، ޣައްޒާގެ ތެރޭގައި ތެލާއި އެހެނިހެން ތަކެތީގެ ސްޓޮކް ވެސް އެބަހުއްޓެވެ. ނަމަވެސް ދިމާވާ އެންމެ ބޮޑު ގޮންޖެހުމަކީ އެތަކެތި ހޯދުމަށް ކުރަން ޖެހޭ މަސައްކަތާއި، ޙާލުގައި ޖެހިފައި ތިބި ފަރާތްތަކާ ހަމައަށް ވާސިލްކުރުމަށް ދިމާވާ ދަތިތަކެވެ.
އައިއޭސީގެ ޓީމަށް ބަލާއިރު، ޣައްޒާގެ ތެރޭގައި ތިބި އައިއޭސީގެ ޓީމަކީ ޣައްޒާއަށް ނިސްބަތްވާ އެ ގައުމުގެ ރައްޔިތުންނެވެ. އެއީ ހިލޭ ސާބަހަށް އައިއޭސީގެ މަސައްކަތްތަކުގައި އަވަދިނެތި އުޅޭ މީހުންނެވެ.
އައިއޭސީގެ ޓީމެއް ޣައްޒާގައި އޮތެއް ކަމަކު، ރައްޔިތުންނާ ހަމައަށް ޟަރުރީ ކަންކަން ފުރިހަމައަށް ގެނެސްދިނުމަށް އެޓީމުން ކުރަން ޖެހެނީ ނަފްސު ނުރައްކަލަށް ހުށަހެޅޭފަދަ ބިރުވެރި މަސައްކަތެކެވެ. އެއީ ޣައްޒާގައި ބައެއް ބޭރުގެ ޖަމިއްޔާތަކާއި އައިއޭސީއާ ތަފާތުވާ ހިސާބެވެ.
އައިއޭސީގެ މަގްސަދަކީ ނުރައްކަލަކަށް ހުށަހެޅިގެން ނަމަވެސް، އެ ކަންކަން އެ ރައްޔިތުންނަށް ފޯރުކޮށްދިނުމެވެ. ޣައްޒާގެ ތެރޭގައި ހުންނަ އެފަދަ ވަސީލަތްތައް ލިބެން ހުންނަ ތަންތަނަށް ދިޔުމަށް އިސްރާއީލުން ގަސްތުގައި ހުރަސްއެޅުމަށް އެކި މަސައްކަތް ކުރި ނަމަވެސް، އައިއޭސީގެ ޓީމުގެ މެންބަރުން އެ ޚިދުމަތް އަދާކޮށްދެ އެވެ. އެއީ ޣައްޒާގެ ތެރޭގައި ތިބި ގިނަ އެހެން ބޭރުގެ ޖަމިއްޔާތަކުގެ ކިބައިގައި ހުރި ގާބިލްކަމެއް ނޫނެވެ. އަދި އެއީ އެ ޖަމިއްޔާތަކުގެ މުވައްޒަފުންނާއި ވަސީލަތްތައް ބައްޓަން ކުރެވިފައި ހުރި ގޮތެއް ވެސް ނޫނެވެ.
އަޒްހަދު ވިދާޅުވީ ޣައްޒާގެ ބޭރުން އެތެރެވުމަކީ ބޭރުގެ އެހެން ޖަމިއްޔާތަކަށް ވެސް ކުރަން ވަރަށް ދަތި ކަމެއް ކަމެކެވެ. އެގޮތުން ޣައްޒާގެ ބޭރުން އެއްވެސް އެއްޗެއް އައިއޭސީއަށް ވެސް ނުވެއްދޭ ކަން އަޒްހަދު ފާހަގަ ކުރެއްވި އެވެ.
އެ ހުރިހާ ދައްޗަކާ އެކު ވެސް، އަޒްހަދު ފާހަގަ ކުރެއްވީ އައިއޭސީގެ ޣައްޒާގެ ޓީމުގެ މެންބަރުން ކުރާ ބުރަ މަސައްކަތެވެ.
ޣައްޒާގައި ހުންނަ އައިއޭސީގެ ގުދަނަކަށް ވެސް އިސްރާއީލުން މި ހަމަލާތަކުގެ ތެރޭގައި ބޮން އެޅި އެވެ. ނަމަވެސް އައިއޭސީގެ މެންބަރުންގެ އަޒުމަކީ އެ ޚިދުމަތް ފުރިހަމަ ކުރުމެވެ. ހޯދަނީ ނުރައްކަލުގައި ނަމަވެސް ބަލަނީ އެ ޒިންމާ އަދާކުރާނެ ގޮތެކެވެ.
