ރާއްޖޭގެ އެންމެ ފުރަތަމަ އައިޓީ "ކޮންސެޕްޓް ސްޓޯރ"ގެ ގޮތުގައި ޕަރސަނަލް ކޮމްޕިއުޓަރސްއިން ޝޯވރޫމެއް ހުޅުވައިފިއެވެ.
މާލޭ ލޮނުޒިޔާރަތް މަގުގައި ހުންނަ މި ޝޯވްރޫމަކީ ކޮމްޕިއުޓަރު، ލެޕްޓޮޕް އަދި ޑެސްކްޓޮޕް އުފެއްދުމުގެ ދުނިޔޭގެ އެންމެ ބޮޑު އެއް ކުންފުނި، "އޭސަރ"ގެ ފިހާރައެކެވެ. މި ޝޯވރޫމް ހުޅުވާފައިވަނީ ހޯމަ ދުވަހުގެ ރޭ، އެ ޝޯވރޫމް ކުރިމަތީގައި ބޭއްވި ކުލަގަދަ ހަފުލާއެއްގައެވެ.
އެތަނާ ގުޅޭގޮތުން ޕަރސަނަލް ކޮމްޕިއުޓަރސްގެ އޮފިޝަލަކު ވިދާޅުވީ، ޕަރސަނަލް ކޮމްޕިއުޓަރސްގެ އަބަދުގެވެސް މައިގަނޑު އަމާޒަކީ ބައިނަލްއަގުވާމީ އެކި ބްރޭންޑްތަކުގެ އުފެއްދުންތައް ރާއްޖެއަށް ގެނައުން ކަމަށެވެ.
އޭނާ ވިދާޅުވީ ރާއްޖެއަކީ އާބާދީގެ ގޮތުން ކިތަންމެ ކުޑަ ގައުމަކަށް ވީނަމަވެސް، ޕަރސަނަލް ކޮމްޕިއުޓަރސްއިން ރާއްޖެއަށް ތައާރަފްކުރި އެ ކޮންސެޕްޓް ސްޓޯރުގެ ސަބަބުން، ރާއްޖޭގެ އައިޓީގެ ވިޔަފާރީގެ މާކެޓަށް ބޮޑު އިންގިލާބެއް ގެނެވޭނެކަމަށެވެ.
ޕަރސަނަލް ކޮމްޕިއުޓަރސްއިން މާލޭގައި ހުޅުވި، އޭސަރ ބްރޭންޑުގެ އުފެއްދުންތަކަށް ޚާއްސަ މި ފިހާރައަކީ ރާއްޖޭގައި ހުޅުވި މިފަދަ ފުރަތަމަ ތަނެވެ. އެގޮތުން އެތަނުން އޭސަރ ބްރޭންޑުގެ އެކި މޮޑެލްތަކުގެ ލެޕްޓޮޕާއި ކޮމްޕިއުޓަރު ފަދަ އުފެއްދުންތައް ލިބޭނެއެވެ.
