ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވާގޮތުން ނަމަ، އެމަނިކުފާނަކީ ރާއްޖޭގެ ޑިމޮކްރަސީގެ ބައްޕަކަމަށާއި، އެހެންނަމަވެސް އެމަނިކުފާނު އުޅުއްވަނީ ވޯޓަށް ފިއްލަވައިގެން ކަމަށް، ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.

ރާއްޖެ ޓީވީގެ ފަލަސުރުޚީ ޕްރޮގްރާމުގައި ރޮޒައިނާ ވަނީ، އާދިއްތަ ދުވަހު ރައްޔިތުންގެ މަޖިލީހުގައި އެޖެންޑާކުރި، ރައީސް ނަޝީދުގެ އިތުބާރު ނެތްކަމުގެ މައްސަލައަށް އިޝާރާތްކުރައްވައި ވާހަކަފުޅުދައްކަވާފައެވެ. އެގޮތުން ރޮޒައިނާ ވިދާޅުވީ، މަޖިލީހުގެ ރައީސްކަމުގައި ހުންނަވާ ބޭފުޅަކު ވާންޖެހޭނީ މަޖިލީހުގެ މެމްބަރުންގެ އަޣުލަބިއްޔަތު އޮވެމެ، އިތުބާރު ހިފޭ ބޭފުޅަކަށް ކަމަށެވެ. އެހެންނަމަވެސް ރައީސް ނަޝީދު އެ މަގާމުގައި އިންނަވަނީ، މެމްބަރުންގެ އިތުބާރު ނެތްނަމަވެސް، ގަދަކަމުން ކަމަށް ރޮޒައިނާ ވިދާޅުވިއެވެ.

ރޮޒައިނާ ވިދާޅުވީ ޑިމޮކްރެޓިކް ވެއްޓެއްގައި، ޑިމޮކްރެސީގެ ބައްޕައޭ ކިޔުއްވައިގެން އުޅުއްވި ބޭފުޅަކު، ޑިމޮކްރެސީގެ އެންމެ އަސާސީ އެއް ކަންތައް ކަމުގައިވާ ވޯޓަށް ފިއްލަވައިގެން އުޅުއްވުމަށްވުރެ ހަޑި އަމަލެއް ނޯންނާނެ ކަމަށެވެ. އެގޮތުން މަޖިލީހުގެ ނައިބު ރައީސް އީވާއަށް އިޝާރާތްކުރައްވަމުން ރޮޒައިނާ ވިދާޅުވީ، އެއް ގެއެއްގެ ދެބޭފުޅުން މަޖިލީހުގެ ރިޔާސަތުގައި ތިއްބަވައިގެން މިއަދު ކުރައްވާ ކަމަކީ އެއް ބޭފުޅަކު އަނެއް ބޭފުޅެއްގެ މަސްލަހަތު ހިމާޔަތް ކުރެއްވުން ކަމަށެވެ. އެގޮތުން ގޭތެރެއިން މަޖިލީހުގެ ކަންކަން ނިންމަވައިގެން ރައީސް ނަޝީދާއި ނައިބު ރައީސް އީވާ، މަޖިލީހުގައި ކަންކަން ކުރައްވާކަމަށް ރޮޒައިނާ ވިދާޅުވިއެވެ.

ރޮޒައިނާ އިތުރަށް ވިދާޅުވީ، އެމްޑީޕީގެ ކުރީގެ ރައީސެއްގެގޮތުގައި ހުންނެވި ބޭފުޅަކު އެފަދައިން އަމަލުކުރައްވާތަން ފެނިވަޑައިގަތުމުން ލަދުފުޅުގެންވަޑައިގަންނަވާ ކަމަށެވެ.