އިސްރާއީލުގެ އައު ވާހަކައެއް: ހަމާސް އިން ފިލައިތިބީ ޣައްޒާގެ އަލް-ޝިފާ ހޮސްޕިޓަލުގެ އަޑީގައި

ފަލަސްތީނުގެ ޣައްޒާގައި ހަރަކާތްތެރިވާ ހަމާސްގެ މުޖާހިދުންގެ މައި ބޭސް ހުންނަނީ ޢައްޒާގައި ހުންނަ އަލް-ޝިފާ ހޮސްޕިޓަލުގެ އަޑީގައި ކަމަށް ބުނެ ޔަހޫދީ ނުލަފާ ޒަޔަނިސްޓު އިސްރާއީލުން އައު ވާހަކަތަކެއް ހާމަކޮށްފި އެވެ.

މި ވާހަކަތައް ހިއްސާކުރަމުން އެ ނުލަފާ ޒަޔަނިސްޓު އަސްކަރިއްޔާގެ ޗީފް ސްޕޯކްސްޕާސަން ޑެނިއަލް ހަގާރީ ބުނީ ހަމާސް އިން އެ ޖަމާއަތުގެ ޓަނަލްތަކާއި އޮޕަރޭޝަނަލް ސެންޓަރުތަކުގެ އައްޑަނައެއްގެ ގޮތުގައި އެ ހޮސްޕިޓަލް ބޭނުންކުރަމުންދާ ކަމަށެވެ.

ހަމާސް އިން ވަނީ ހަމާސްގެ ޓެރަރިސްޓުންނާއި ކޮމާންޑަރުން ތިބޭ ކޮމާންޑް އެންޑް ކޮންޓްރޯލް ސެންޓަރުތަކަށާއި ތަންތަނަށް ހޮސްޕިޓަލްތައް ހަދައިފައި ކަމަށް އޭނާ ބުންޏެވެ.

މިކަމުގެ ހެކި ދެއްކެމުގެ ގޮތުން އޭނާ ވަނީ އިސްރާއީލުން އެ ހޮސްޕިޓަލުގެ މަތިން ނަގާފައިވާ ފޮޓޯތަކާއި އަދި ތްރީޑީ ވީޑިއޯ އެއް ވެސް އާންމުކޮށްފަ އެވެ. އެގޮތުން އޭނާ ބުނީ އެ ފޮޓޯތަކާއި ޑައިގްރަމް ތަކާއި އޯޑިއޯ ރެކޯޑިންތަކުން ވެސް ހަމާސް އިން ހޮސްޕިޓަލް ސިސްޓަމާއި ވަކިން ހާއްސަކޮށް އަލް ޝިފާ ހޮސްޕިޓަލް ބޭނުންކޮށްގެން ޣައްޒާގެ ދަށުގައި ވާ ފުޅާ ޓަނަލް ނެޓްވޯކަށް އެކި ކަހަލަ ކޮމާންޑް ޕޯސްޓުތަކާއި އެންޓްރީ ޕޮއިންޓްތައް ފޮރުވަން މަސައްކަތް ކުރާ ގޮތް އިނގޭ ކަމަށެވެ.

"ހަމާސްގެ ޓެރަރިސްޓުން ހަރަކާތްތެރިވަނީ ޝިފާ ހޮސްޕިޓަލާއި ޣައްޒާގެ އެހެނިހެން ހޮސްޕިޓަލްތަކުގެ އެތެރެއާއި އަޑިން،" އޭނާ ބުންޏެވެ.

އޭނާ ބުނި ގޮތުގައިޣައްޒާގައި ހުންނަ އެންމެ ބޮޑު ހޮސްޕިޓަލް ކަމަށްވާ ޝިފާ ހޮސްޕިޓަލްގެ ވޯޑަކުން ވަދެގެން ގޮސް، ބިންގަރާސް ތެރެއަށް ދެވޭނެ މަގެއް ވެސް ހަދާފައިވެއެވެ.

އިސްރާއީލުން މިފަދަ ވާހަކަތަކެއް އާންމުމި ކުރީ އެ ޖަމާއަތުން ޣައްޒާގައި ހުންނަ އަލް-އަހްލީ ހޮސްޕިޓަލަށް ބޮން އަޅައި އެތައް ހާސް ބަޔަކު ޝަހީދުކޮށްލި ހާދިސާގެ ވާހަކަތަކަށް އެއްބަސްވެފައި، ފަހުން ދޮގު ކުރުމަށް ފަހު އެވެ. އޭގެ ފަހުން އެ ހާދިސާ އަކީ ހަމާސްގެ ފަރާތުން ހިނގި ކަމެއް ކަމަށް ބުނެ ބޮޑެތި ދޮގުތަކެއް އިސްރާއީލުން ދިޔައީ ހަދަމުންނެވެ.