މާދަމާރޭ ހަނދުކޭތަ ހިފާނެ، ކޭތަ ނަމާދު ކުރެވޭނެ އިންތިޒާމު ހަމަޖައްސަން އަންގައިފި
ރާއްޖޭގައި މީހުން ދިރިއުޅޭ ހުރިހާ ރަށެއްގައި ހުންނަ އެންމެ ބޮޑު މިސްކިތުގައި ހޮނިހިރު ދުވަހުގެ ރޭ މެންދަމުން އަލިވެ 1:15 ގައި ކޭތަ ނަމާދު ކުރާނެ
ހަނދުކޭތަ
ހޮނިހިރު ދުވަހުގެ ރޭ ހަނދުކޭތަ ހިފާނެ ކަމަށް އިސްލާމިކް މިނިސްޓްރީން ބުނެފިއެވެ.
އެ މިނިސްޓްރީން ހުކުރު ދުވަހުގެ ރޭ ނެރުނު ސާކިއުލާގައި ބުނީ މި ހަނދުކޭތަ ހިފަން ފަށާނީ ރާއްޖެ ގަޑިން ހޮނިހިރު ދުވަހުގެ ރޭ 11:01 ގައި ކަމަށެވެ. އަދި ކޭތަ އެންމެ ބޮޑަށް ހިފާފައި ހުންނާނީ އެ ރޭގެ މެންދަމުން އަލިވެ 1:14 ގައި ކަމަށް އެ މިނިސްޓްރީން ބުންޏެވެ.
މި ހަނދުކޭތަ ވީއްލާނެ ކަމަށް އިސްލާމިކް މިނިސްޓްރީން ބުނީ ރާއްޖެ ގަޑިން ހޮނިހިރު ދުވަހުގެ ރޭ ދަންވަރު 3:26 ހާއިރު ކަމަށެވެ.
ހަނދުކޭތަ ހިފާތީ ރާއްޖޭގައި މީހުން ދިރިއުޅޭ ހުރިހާ ރަށެއްގައި ހުންނަ އެންމެ ބޮޑު މިސްކިތުގައި ހޮނިހިރު ދުވަހުގެ ރޭ މެންދަމުން އަލިވެ 1:15 ގައި ކޭތަ ނަމާދު ކުރެވޭނެ އިންތިޒާމު ހަމަޖެއްސުމަށް ކައުންސިލް އިދާރާތަށް މިނިސްޓްރީން ވަނީ އަންގާފައެވެ.
ކޭތަ ނަމާދުގެ ޚުތުބާ ހޮނިހިރު ދުވަހު އިސްލާމިކް މިނިސްޓްރީގެ ވެބްސައިޓުގައި އާއްމު ކުރާނެއެވެ.
