އައިޓީބީ އޭޝިއާގައި ރާއްޖެއިން ބައިވެރިވެއްޖެ
ރާއްޖެ އިޝްތިހާރުކޮށް ރާއްޖޭގެ މަޤްބޫލުކަން އިތުރުކުރުމަށް އެމްއެމްޕީއާރްސީން މަސައްކަތް ކުރޭ
އައިޓީބީ އޭޝިއާ ފެއާގެ ތެރެއިން
ދިވެހިރާއްޖެއިން އައިޓީބީ އޭޝިއާގައި ބައިވެރިވެއްޖެއެވެ.
އައިޓީބީ ފެއަރ އަކީ ފަތުރުވެރިކަމުގެ ދާއިރާގައި އެންމެ މަގްބޫލް ފެއަރތަކުގެ ތެރޭގައި ހިމެނޭ ފެއަރއެކެވެ. އޭޝިއާ ޕެސިފިކް ސަރަހައްދާއި ޔޫރަޕާއި އެމެރިކާ އާއި އެފްރިކާ އިން ވެސް ބައިވެރިވާ އައިޓީބީ އޭޝިއާ ފެއަރ އަކީ މި ސަރަހައްދުގެ ލީޑިންގ ޓްރެވަލް ޓްރޭޑް ޝޯތަކުގެ ތެރެއިން އެއް ޝޯކަން ފާހަގަކޮށްލެވެއެވެ.
މިމަހުގެ 25 އިން 27 އަށް ކުރިއަށްގެންދިޔަ މި ފެއަރ ބާއްވާފައިވަނީ ސިންގަޕޫރުގެ ސޭންޑްސް އެކްސްޕޯ އެންޑް ކޮންވެންޝަން ސެންޓަރުގައެވެ.
މި ފެއަރގައި މޯލްޑިވްސް މަރކެޓިންގ އެންޑް ޕަބްލިކް ރިލޭޝަންސް ކޯރަޕަރޭޝަން، އެމް.އެމް.ޕީ.އާރް.ސީއާ އެކު ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވަ 27 ކުންފުންޏަކުން 45 މީހުން ވަނީ ބައިވެރިވެފައެވެ. މި ފެއަރގެ ރާއްޖޭގެ ސްޓޭންޑަށް ޒިޔާރަތްކުރާ ފަރާތްތަކަށް ވަނީ ރާއްޖެއާއި ގުޅޭ މައުލޫމާތުތައް ދިނުމަށް ގިނަ ހަރަކާތްތަކެއް ކުރިއަށް ގެންގޮސްފައެވެ.
މި ފެއަރގައި ރާއްޖެ އިޝްތިހާރުކުރުމަށް ރާއްޖޭގެ ސަޤާފަތް ތަޖުރިބާކޮށްލެވޭނެ މަގު ފަހިކޮށްދީފައިވެއެވެ. ރާއްޖޭގެ ސަޤާފީ ލިބާސް، ފޭލި ފަދަ ސަޤާފީ ހެދުންތަކުގެ އިތުރުން ރާއްޖޭގެ ސަޤާފީ މީރު ކެއުންތައް ތަޖުރިބާ ކުރުމުގެ ފުރުސަތު ވެސް ފެއަރގެ ތެރެއިން ވަނީ ހުޅުވާލާފައެވެ. މީގެ އިތުރުން ދިވެހި ބަހުގެ ކެލިގްރަފީ ބުކްމާކް ހެދުމުގެ ހަރަކާތްތައް ބާއްވާފައިވެއެވެ.
ދުނިޔޭގެ އެކި ކަންކޮޅުތަކުގައި ރާއްޖެ އިޝްތިހާރުކޮށް ރާއްޖޭގެ މަޤްބޫލުކަން އިތުރުކުރުމަށް އެމްއެމްޕީއާރްސީން ދަނީ ކެނޑިނޭޅި މަސައްކަތްކުރަމުންނެވެ.
