އެމްޑީޕީގެ ގިނި މަޑުވެއްޖެކަމުގެ މަންޒަރު ދެއްކުމަށް ބަޔަކު މީހުން މަސައްކަތް ކުރި ނަމަވެސް އެކަން ކާމިޔާބެއްނުވާނެ: މެންބަރު ޔާސިރު
27 އޮކްޓޯބަރު 2023 | ހުކުރު 07:13ކުރިއަށް އޮތްތަނުގައި ޕާޓީން މަސައްކަތްކުރާނެ ގޮތްތަކާއިގުޅޭ ގޮތުން މަޝްވަރާތައް ކުރޭ
ރައްޔިތުން މަޖިލީހުގެ ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުލް ލަޠީފް
ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ ގިނި މަޑުވެއްޖެކަމުގެ މަންޒަރު ދެއްކުމަށް ބަޔަކު މީހުން މަސައްކަތް ކުރި ނަމަވެސް އެކަން ކާމިޔާބުނުވާނެ ކަމަށާއި، ޕާޓީ އޮތީ ގަދަކޮށް ކަމަށް ރައްޔިތުން މަޖިލީހުގެ ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުލް ލަޠީފް ވިދާޅުވެއްޖެއެވެ.
ރާއްޖެޓީވީގައި ވާހަކަފުޅު ދައްކަވަމުން މެންބަރު ޔާސިރު ވިދާޅުވީ އެމްޑީޕީއަކީ ރާއްޖޭގައި އޮތް އެންމެ ބޮޑު ޕާޓީ ކަމަށާއި، ކުރިއަށް އޮތްތަނުގައި ޕާޓީ ރައްޔިތުންނަށް ފެނިގެންދާނީ ވެސް ވަރަށް ވަރުގަދަ ޕާޓީއެއްގެ ގޮތުގައި ކަމަށެވެ.
މެންބަރު ޔާސިރު ވިދާޅުވީ މިހާރު ވެސް ޕާޓީގެ މަސައްކަތްތައް ކުރިއަށްދާ ކަމަށާއި، ގައުމީ މަޖިލީހުގެ ބައްދަލުވުންތައް ބާއްވާ ކުރިއަށް އޮތްތަނުގައި ޕާޓީން މަސައްކަތްކުރާނެ ގޮތްތަކާއިގުޅޭ ގޮތުން މަޝްވަރާތައް ކުރަމުންދާ ކަމަށެވެ.
އެގޮތުން ޕާޓީން ކުރިއަށް އޮތް އިންތިޚާބުތަކުގައި މަސައްކަތް ކުރާނެ ގޮތާއި، އިންތިޚާބުތައް ކާމިޔާބު ކުރުމަށް އޮތް ރޫހު ވަރަށް ބޮޑު ކަމަށް މެންބަރު ޔާސިރު ވިދާޅުވިއެވެ. ނަމަވެސް މިވަގުތު އެންމެ ބޮޑު ފޯކަސްއެއް ދެނީ ޓްރާންސިޝަން މަސައްކަތްތައް ކުރުމަށް ކަމަށާއި، ޕާޓީގެ ފަރާތުން އެއްބާރުލުން ދެމުންދާ ކަމަށެވެ. އަމާންއޮމާންކަމާއެކު އައު ސަރުކާރާއި ގައުމު ހަވާލުކުރަން ބޭނުންވާ ކަމަށާއި، އެކަމުގައި މިސާލު ދައްކަމުންދާ ކަމަށް ވެސް މެންބަރު ޔާސިރު ވިދާޅުވިއެވެ.
މީގެ އިތުރުން މެންބަރު ޔާސިރު ވިދާޅުވީ ބައެއް މީހުން އެމްޑީޕީ މަސައްކަތެއް ނުކުރާ މަންޒަރު ދައްކަން އުޅޭ ކަމަށާއި، އެއީ ހަގީގަތް ނޫން ކަމަށެވެ. ދަ ޑިމޮކްރެޓްސްއަށް އިޝާރާތް ކުރައްވައި މެންބަރު ޔާސިރު ވިދާޅުވީ އެއީ އެމްޑީޕީގެ ތެރެއިން އުފެދުނު ޕާޓީއެއް ކަމުން މިފާއިތުވި އަހަރުތަކުގައި އެކްޓިވް އޮޕަޒިޝަނެތް ކަމަށެވެ. އަދި ވިދާޅުވީ ޕީޕީއެމް/ޕީއެންސީއަށް ނިސްބަތްވާ މެންބަރުން ވެސް ރައްޔިތުންގެ މަޖިލީހުގެ ޖަލްސާތަކަށް ގިނައިން ވަޑައިނުގަންނަވާ ކަމަށެވެ. ނަމަވެސް ކުރިއަށް އޮތްތަނުގައި އެމްޑީޕީ ވަރުގަދަ އެކްޓިވް އޮޕަޒިޝަން ޕާޓީއެއްގެ ގޮތުގައި ރައްޔިތުންނަށް ފެންނާނެ ކަމަށް އޭނާ ވިދާޅުވިއެވެ.
މެންބަރު ޔާސިރު ވިދާޅުވީ އެމްޑީޕީ ހީނަރުވެގެން ނުދާނެ ކަމަށާއި، 2024 ވަނަ އަހަރު ބާއްވާ ރައްޔިތުން މަޖިލީހުގެ މެޖޯރިޓީ ހޯދުމަށް ވެސް އެމްޑީޕީން ގިނަ މަސައްކަތްތައް ކުރާނެ ކަމަށެވެ. އަދި މެޖޯރިޓީ ލިބޭނެ ކަމުގެ އުންމީދު ވަރަށް ބޮޑަށް އެބައޮތް ކަމަށް މެންބަރު ޔާސިރު ވިދާޅުވިއެވެ.
