ބައްސާމް، އިންފަންޓީނޯއާ ބައްދަލުކުރައްވައިފި
މި ބައްދަލުވުމުގައި އެފްއޭއެމްގެ ޖެނަރަލް ސެކްރެޓަރީ ޙުސެއިން ޖަވާޒަ (ޖަވާ) ވެސް ވަނީ ބައިވެރިވެވަޑައިގެންފައި
އެފްއޭއެމްގެ ރައީސް ބައްސާމް، ފީފާގެ ރައީސް އިންފަންޓީނޯ އާއެކު
ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް ބައްސާމް އަދީލް ޖަލީލް، ދުނިޔޭގެ ފުޓުބޯޅައިގެ މައި އިދާރާ (ފީފާ) ގެ ރައީސް ޖިއާނީ އިންފަންޓީނޯއާ ބައްދަލު ކުރައްވައިފި އެވެ.
މައުލޫމާތު ލިބިފައިވާ ގޮތުގައި ބައްސާމް އިންފަންޓީނޯއާ ބައްދަލު ކުރެއްވީ ފްރާންސްގެ ވެރި ރަށް ޕެރިހުގަ އެވެ. މި ބައްދަލުވުމުގައި އެފްއޭއެމްގެ ޖެނަރަލް ސެކްރެޓަރީ ޙުސެއިން ޖަވާޒަ (ޖަވާ) ވެސް ވަނީ ބައިވެރިވެފަ އެވެ.
ބައްސާމް އިންފަންޓީނޯއާ ބައްދަލުކުރައްވާފައިވާއިރު، އެފްއޭއެމް އަށް އެކި ގޮތްގޮތުން ލިބެމުން އަންނަ ފައިސާ އަށް، އެ އިދާރާގެ އިސްވެރިން ޚިޔާނާތްތެރިވާ މައްސަލައެއް ވަނީ ފެންމަތިވެފަ އެވެ. އެގޮތުން އެ ފައިސާތައް އެ އިދާރާގެ އިސްވެރިންނާއި، ވެރިންގެ ގާތް ފަރާތްތަކުގެ އިތުރުން ބައެއް ކުންފުނިތަކަށް ޖަމާކޮށްފައިވާ މައްސަލަ ފެންމަތިވި އެވެ. އެ މައްސަލައާ ގުަޅިގެން ދިވެހި ފުލުހުން ވަނީ މި ހަފްތާގެ އާދީއްތަ ދުވަހު އެފްއޭއެމް ބަަލައި ފާސްކޮށްފަ އެވެ.
ނަމަވެސް މިހާތަނަށް މި މައްސަލައިގައި އެފްއޭއެމުން އެއްވެސް ބަހެއް ބުނެފައެއް ނުވެ އެވެ.
