ހާލަންޑްގެ ދެ ލަނޑާއެކު މޮޅުވެ، ސިޓީގެ ރެކޯޑް ކުރިއަށް!

ނޯވޭގެ ފޯވާޑް ހާލަންޑްގެ ދެ ލަނޑާއެކު މޮޅުވެ, ޗެމްޕިއަންސް ލީގުގައި ސިޓީން ދަމަހައްޓަމުން އަންނަ މޮޅުވުމުގެ ސިލްސިލާ ދަމަހައްޓައިފިއެވެ.

މިސީޒަންގެ ޗެމްޕިއަންސް ލީގުގައި ސިޓީން ކުޅުނު ތިންވަނަ މެޗު ކާމިޔާބުކުރީ ސްވިޒަރލެންޑްގެ ޔަންގް ބޯއީސްއާ ވާދަކޮށް 3--1 ނެވެ. މެޗުގެ ދެވަނަ ހާފް ފަށައިގެން ތިންވަނަ މިނެޓުގައި ސިޓީއަށް ލީޑް ނަގައިދިނީ ސްވިޒަރލެންޑްގެ ޑިފެންޑަރ އަކަންޖީއެވެ. އެކަމަކު އޭގެ ތިން މިނެޓު ފަހުން އެލިއާ ލަނޑެއް ޖަހާ ޔަންގް ބޯއީސް އަށް ނަތީޖާ ހަމަހަމަކޮށްދިނެވެ. ސިޓީން ދެވަނަ ފަހަރަށް ކުރިހޯދީ ހާލަންޑް 67 ވަނަ މިނެޓުގައި ޖެހި ޕެނަލްޓީންނެވެ. މިއީ މިސީޒަންގެ ޗެމްޕިއަންސް ލީގުގައި ހާލަންދްގެ ފުރަތަމަ ލަނޑެވެ. ސިޓީގެ ލީޑް ހާލަންޑް ފުޅާކޮށްދިނީ މެޗު ނިމެން ހަތަރު މިނެޓަށް ވެފައިވަނިކޮށް ރޮޑްރީ ތަނަވަސްކޮށްދިން ފުރުޞަތެއްގައެވެ.

މޮޅާއެކު ސިޓީ އެއްވަނާގައި އޮތީ ތިން މެޗުން ނުވަ ޕޮއިންޓާއެކުއެވެ. ސިޓީ ޗެމްޕިއަންސް ލީގުގައި އެންމެ ފަހުން ކުޅުނު 16 މެޗުންވެސް ބައްޔެއް ނުވެއެވެ. މިގްރޫޕްގެ ދެވަނާގައި އޮތީ ޖަރުމަނުގެ އާރުބީ ލެއިޕްޒިގްއެވެ. އެޓީމުން ވަނީ ބުދަ ދުވަހުގެރޭ 3-1 ން ރެޑް ސްޓާ ބެލްގްރޭޑް ބަލިކޮށްފައެވެ.