ގައުމީ އެމްބިއުލާންސްގެ ޚިދުމަތް ފަށައިފި، ގުޅޭނެ ނަންބަރަކީ 100!
އެންބިއުލާންސްގެ ހިދުމަތް މާލެ ސަރަހައްދަށް ދިނުމަށްޓަކައި 24 ގަޑިއިރު ހިދުމަތްދޭ ކޯލް ސެންޓަރެއް ގާއިމްކޮށްފައިވޭ
ގައުމީ އެމްބިއުލާންސްގެ ހިދުމަތް ފެށުން - ފޮޓޯ/ ސަން އޮންލައިން
ގައުމީ އެމްބިއުލާންސްގެ ހިދުމަތް ތައާރަފްކޮށް، މާލެ ސަރަހައްދުގައި އެ ޚިދުމަތް ފަށައިފި އެވެ.
ޖުމްހޫރީ މައިދާނުގައި ބުދަ ދުވަހު ބޭއްވި ރަސްމިއްޔާތެއްގައި މި ޚިދުމަތް ފައްޓަވައިދެއްވީ ހެލްތު މިނިސްޓަރު އަހްމަދު ނަސީމެވެ.
މި ރަސްމިއްޔާތުގައި ވާހަކަ ދައްކަވަމުން ހެލްތު މިނިސްޓަރު ނަސީމު ވިދާޅުވީ މި ޚިދުމަތުގެ ސަބަބުން އިމަޖެންސީ ހާލަތެއްގައި ފޯނު ކޯލެއް އައުމާ އެކު ސިއްހީ ފަރުވާދެވޭ ތަނަކަށް ބަލި މީހާ ގެންދެވޭނެ ކަމަށާއި، މި ހިދުމަތުގެ ސަބަބުން ހޮސްޕިޓަލުތަކުގެ މަސައްކަތްތައް ލުއިވާނެ ކަމަށެވެ.
މީގެ އިތުރުން އޭނަ ވިދާޅުވީ މި ޚިދުމަތަކީ ރައްޔިތުން އިތުބާރުކުރާ ބަލައިގަންނަ ހިދުމަތަކަށް ހެދުމާ އެކު ރާއްޖޭގެ ހުރިހާ ކަންކޮޅުތަކެއްގައިވެސް ދޭ ހިދުމަތަކަށް ހެދުމަކީ އަމާޒެއް ކަމަށެވެ. އަދި މިކަމުގެ އިތުރުން ސީއެމްބިއުލާންސާއި އެއާ އެމްބިއުލާންސް ވެސް ތައާރަފްކުރުމަކީ އަމާޒެއް ކަމަށް ނަސީމު ވިދާޅުވި އެވެ.
މި ގައުމީ އެންބިއުލާންސްގެ ހިދުމަތް މާލެ ސަރަހައްދަށް ދިނުމަށްޓަކައި 24 ގަޑިއިރު ހިދުމަތްދޭ ކޯލް ސެންޓަރެއް ގާއިމްކޮށް މިކަމަށް ޚާއްސަ ނަންބަރެއް ވަނީ ކަނޑައަޅާފައެވެ. މިގޮތުން ކަނޑައަޅާފައިވާ ނަންބަރަކީ 100 ނުވަތަ އެކެއްސުމެއްސުމެއް އެވެ.
މި ހިދުމަތް ތައާރަފު ކުރުމުގެ މައިގަނޑު މަގްސަދެއް ކަމުގައި ހެލްތް މިނިސްޓްރީ އިން ބުނީ މެޑިކަލް އިމަޖެންސީތަކާއި އެކްސިޑެންޓުތަކުގައި އަވަހަށް އެޓެންޑުވެ، ސިއްހީ ހިދުމަތްދޭ ތަނަކަށް ގެންދެވެންދެން ފަރުވާގެ ހިދުމަތް ފޯރުކޮށްދީ ބަލިމީހާގެ ފުރާނަ ސަލާމަތްކުރުމަށް ކުރަންޖެހޭ މަސައްކަތް ކުރުން ކަމަށެވެ.
