ރާއްޖޭގެ ހުރިހާ އަތޮޅެއްގައި ޑައިލިސިސް ހިދުމަތް ފެށޭވަރުވާނީ މި އަހަރުގެ ސެޕްޓެމްބަރާ ހަމައަށް ކަމަށް ވިދާޅުވެ، ސަރުކާރުން އަނެއްކާ ވެސް އައު ތާރީހެއް ކަނޑައަޅައިފި އެވެ.

ޑައިލިސިސް ޚިދުމަތް ފަސޭހަކޮށް ދެއްވުމަކީ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ މުހިންމު ސިޔާސަތެކެވެ. ސަރުކާރުން ކުރިން ބުނެފައި ވަނީ މިދިޔަ އަހަރުގެ ނިޔަލަށް ހުރިހާ އަތޮޅަކުން ޑައިލިސިސް ހިދުމަތް ދެވޭނެ ކަމަށެވެ.

މިއަހަރުގެ ސެޕްޓެމްބަރު މަހާ ހަމައަށް ދާންވާއިރަށް، ކޮންމެ އަތޮޅެއްގައި މަދުވެގެން ޑައިލިސިސް ސެންޓަރެއް ތަރައްގީކޮށް ޚިދުމަތް ދޭން ފަށާނެ ކަމަށް އައު ތާރީޚެއް ޞިއްހީ ވަޒީރު އަބްދުﷲ ނާޒިމް އިބްރާހީމް ދެއްވީ ދައުލަތުގެ މީޑިއާގައި ވާހަކަ ދައްކަވަމުން ހޮނިހިރު ދުވަހު އެވެ.

ވަޒީރު ވިދާޅުވީ ރާއްޖޭގެ ހުރިހާ އޮތޮޅެއްގައި ވެސް މަދުވެގެން ޑައިލިސިސްގެ ސެންޓަރެއް ތަރައްގީ ކުރައްވާނެ ކަމަށާއި، ސެޕްޓެމްބަރު މަހާ ހަމައަށް ދާންވާއިރު ކޮންމެ އަތޮޅަކުން ވެސް ޑައިލިސިސްގެ ހިދުމަތް ލިބޭނެ ކަމަށެވެ. މިއީ މި ސަރުކާރުން ޑައިލިސިސް ހިދުމަތާ ގުޅޭ ގޮތުން ހެލްތު މިނިސްޓަރު އަނެއްކާވެސް ދެއްވި އައު ތާރީހެކެވެ.

ހޮނިހިރު ދުވަހު މިހާރުގެ ވަޒީރު އެހެން ވިދާޅުވިއިރު، ކުރިން ސިއްހީ ވަޒީރުކަން ކުރައްވައި އަދި މިހާރު ފޮރިން މިނިސްޓަރުގެ މަގާމުގައި ހުންނެވި، މި ސަރުކާރުގެ ފުރަތަމަ ހެލްތު މިނިސްޓަރު ޑޮކްޓަރު އަބްދުﷲ ޚަލީލް، މިދިޔަ އަހަރުގެ ކުރީކޮޅު މަޖިލީހު ގައި ވިދާޅުވީ މިދިޔަ އަހަރުގެ ނިޔަލަށް ހުރިހާ އަތޮޅެއްގައި ޑައިލިސިސްގެ ހިދުމަތް ފެށޭނެ ކަމަށެވެ.

ޑައިލިސިސްގެ ޚިދުމަތަކީ ކިޑްނީ ބަލި ތަހަންމަލު ކުރަމުންދާ މީހުންގެ ތެރެއިން ކިޑްނީ ފަންކްޝަން ވަކި ވަރަކަށް ވުރެ ދަށްވުމުން ކޮންމެ ހަފްތާއަކުވެސް 2 ނުވަތަ 3 ދުވަހު ހަށިގަނޑުގައި ލޭ ސާފުކުރުމަށް ހިދުމަތް ހޯދައި، ކޮންމެ ދުވަހަކު ވެސް 4 ގަޑިއިރަށްދޭ ހިދުމަތެކެވެ.