ޖެނެރޭޝަނަލް ބޭން ތަންފީޒުކުރުމުގެ ބޭނުމަކީ ބަޔަކު ކުށްވެރިކޮށް، ފިޔަވަޅު އެޅުމެއް ނޫން. ބޭނުމަކީ ހޭލުންތެރިކަން އިތުރުކުރުމަށް: ރައީސް
21 މެއި 2025 | ބުދަ 12:41'ޖެނެރޭޝަނަލް ބޭން'ގެ ދަށުން 2007 ވަނަ އަހަރުން ފެށިގެން އުފަންވާ އެންމެންނަށް އަންނަ ނޮވެންބަރުން ފެށިގެން ސިނގިރޭޓު މަނާ ކުރާ ބިލު ރައީސް ތަސްދީގުކުރެއްވީ ބުދަ ދުވަހު
ދުންފަތް ކޮންޓްރޯލް ކުރުމާއި ބެހޭ ޤާނޫނަށް 2 ވަނަ އިސްލާހު ގެނައުމުގެ ބިލް ތަސްދީގު ކުރުން
ޖެނެރޭޝަނަލް ބޭން ތަންފީޒުކުރުމުގެ ބޭނުމަކީ ބަޔަކު ކުށްވެރިކޮށް، ފިޔަވަޅު އެޅުން ނޫންކަމަށާއި ބޭނުމަކީ މުޖުތަމައު އަށް ހޭލުންތެރިކަން އިތުރުކުރުން ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
'ޖެނެރޭޝަނަލް ބޭން'ގެ ދަށުން 2007 ވަނަ އަހަރުން ފެށިގެން އުފަންވާ އެންމެންނަށް އަންނަ ނޮވެންބަރުން ފެށިގެން ސިނގިރޭޓު މަނާ ކުރާ ބިލު ބުދަ ދުވަހު ރައީސް ވަނީ ތަސްދީގުކުރައްވާފައެވެ.
މީގެ ކުރިންވެސް ރާއްޖޭގައި ދުންފަތާއި ގުޅިގެން ހެދިފައި ހުރި ގާނޫނުތަކާއި ގަވައިދުތައް އެބަހުއްޓެވެ. އެހެން ނަމަވެސް އެކަށިގެންވާ މިންވަރަކަށް އެ ގާނޫނުތަކާއި ގަވައިދުތައް ތަންފީޒުނުކުރެވޭކަން ފާހަކަކޮށްލެވެއެވެ. ރައީސް ބުދަ ދުވަހު ތަސްދީގުކުރެއްވި މި ގާނޫނާއި މެދުވެސް ގިނަ ބަޔަކު ސުވާލުއުފައްދަމުން އަންނައިރު، އެފަރާތްތަކުން ބުނަމުންދަނީ މި ގާނޫނަށް ވެސް އަމަލުނުކުރެވޭނޭ ކަމަށެވެ.
މިކަމާއި ގުޅުވައި އެ ބިލު ތަސްދީގުކުރެއްވުމަށް ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ ތަންފީޒީ އިދާރާތައް ކިތަންމެ ވަރުގަދަ ކުރިޔަސް އަބަދުވެސް ކުށްކުރާ ބަޔަކު ތިބޭނެ ކަމަށެވެ. އެހެންވެ، ހެލްތު ޕްރޮޓެކްޝަން އެޖެންސީ (އެޗްޕީއޭ)އާއި ފުލުހުންނާއި ކަސްޓަމްސް މިހާރަށް ވުރެ ހަރުދަނާކުރުމުގެ ކަންކަން ކުރާނެ ކަމަށް ރައީސް ވިދާޅުވިއެވެ.
އެގޮތުން އަންނަ އަހަރަށް ބަޖެޓު ހަދާއިރު ވެސް، އެ އިދާރާތަކުން މަސައްކަތްތައް ތަންފީޒުކުރުމަށް ބޭނުންވާ މާލީ އެހީތެރިކަން ހިމަނަން ނިންމާފައިވާކަން އެމަނިކުފާނު ފާހަގަކުރެއްވިއެވެ.
ބޭނުމަކީ ފިޔަވަޅު އެޅުމެއް ނޫން. ބަޔަކު ކުށްވެރިކުރުމެއް ވެސް ނޫން. އަޅުގަނޑު ބޭނުންވަނީ މުޖުތަމައު ހޭލުންތެރިކުރަން. ހޭލުންތެރިކަމަށް ވެސް ވަރަށް ބޮޑު ޚަރަދެއް ކުރާނަން. ޕަބްލިކް އެވެއާނަސްއަށް އެންމެ ބޮޑު ޚަރަދެއް ކުރާނީރައީސް ޑރ. މުޙައްމަދު މުއިއްޒު
އޭގެއިތުރުން، މި ޖީލަށް ދުންފަތް މަނާކޮށް، ބިލު ތަންފީޒުކުރަން ފެށުމަށް އަންނަ އަހަރުގެ ބަޖެޓުގައި ހޭލުންތެރިކަން އިތުރުކުރުމުގެ ޕްރޮގްރާމުތަކަށް ބޮޑު އިންސައްތައެއް ޚަރަދުކުރާނެކަމަށް ވެސް ރައީސް ވިދާޅުވި އެވެ.
ރައީސް ވިދާޅުވީ ބޭނުންވަނީ ކިތެންމެ ބޮޑު އިންސައްތައެއް މިކަމަށް ޚަރަދުކޮށްގެން ނަމަވެސް ދުންފަތާ ދުރުވުމަށް ހިތްވަރުދީގެން އެކަމާ އަމިއްލައަށް ދުރުވުމަށް މަސައްކަތް ކޮށްދިނުން ކަމަށެވެ. ނަމަވެސް މިފަދަ މައްސަލަތަކުގައި ފިޔަވަޅު އަޅަން ބޭނުންނުވިއަސް އިސްތިސްނާ ހާލަތްތަކުގައި އެކަން ކުރައްވާނެ ކަމަށް އެ މަނިކުފާނު ވިދާޅުވިއެވެ.
އިތުރަށް ރައީސް ވިދާޅުވީ، ދުންފަތުގެ ދާއިރާއިން އާމްދަނީ ހޯދަން ވިސްނާފައި ނެތް ކަމަށާއި މި ދާއިރާއިން ލިބޭ އާމްދަނީ ޚަރަދުކުރާނީ ސިއްހީ ދާއިރާ ތަރައްގީކޮށް، ހޭލުންތެރިކަން އިތުރުކުރުމުގެ ޕްރޮގްރާމުތަކަށް ކަމަށެވެ.
ރައީސް ވިދާޅުވީ ރަނގަޅީ ދުންފަތުގެ ބާވަތްތައް އެތެރެކުރުމުގެ އެއްވެސް ކަމެއް ނުހިނގިއްޔާ ކަމަށާއި އެފަދަ ވިޔަފާރިތައް ކުރާ ފަރާތްތަކުން އެކަން ދޫކޮށް، އެހެން ވިޔަފާރިތަކަށް ބަދަލުވުމަށް ރައީސް ވަނީ އިލްތިމާސްކުރައްވާފަ އެވެ.
ރައީސް ވިދާޅުވީ ދުންފަތުގެ މި މައްސަލައަށް ހައްލެއް ލިބޭނީ މުޅި މުޖުތަމައުގެ އެންމެން ގުޅިގެން މަސައްކަތް ކުރުމުން ކަމަށާއި އެގޮތަށް މަސައްކަތް ކޮށްފިނަމަ ރަނގަޅު ކާމިޔާބީއެއް ހޯދޭނެ ކަމުގެ ޔަގީންކަން އެބަ އޮތް ކަަމަށް ރައީސް ވިދާޅުވިއެވެ.
ދުންފަތުގެ އިސްތިއުމާލުކުރުމާ ދެކޮޅަށް މި ސަރުކާރުން އަޅާ ފިޔަވަޅުތަކުގެ ތެރެއިން ރާއްޖޭގައި ވޭޕް ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، އިޝްތިހާރުކުރުމާއި ހިލޭބެހުން ވަނީ މަނާކޮށްފައެވެ. ދުންފަތުގެ ބާވަތްތަކުން ނަގާ ޑިއުޓީ ބޮޑުކޮށްފައި ވަނީ ވެސް އެ ފިޔަވަޅުތަކުގެ ދަށުންނެވެ.
ޖެނެރޭޝަނަލް ބޭން އެއް ގެނައުމުގެ ގޮތުން ގާނޫނަށް ގެނައި މި އިސްލާހާއެކު އަންނާނެ ބަދަލުތަކުގެ ތެރޭގައި 1 ޖެނުއަރީ 2007 އިން ފެށިގެން، އޭގެ ފަހަށް ރާއްޖޭގައި އުފަންވެފައިވާ ހުރިހާ ކުދީންނަށް، އަދި މީގެ ފަހުން އުފަންވާނެ ހުރިހާ ކުދީންނަށްވެސް، ދުންފަތުގެ އިސްތިއުމާލު ކުރުމާއި ދުންފަތް ގަނެވިއްކުންވެސް މަނާވާނެ އެވެ.
އަދި ދުންފަތް، އިލެކްޓްރޯނިކް ސިނގިރޭޓް، ވޭޕް ފަދަ ތަކެތި އުފެއްދުމަށް ބޭނުންކުރާ ހުރިހާ މެޝިނަރީއާއި އާލާތްތަކާއި، އެފަދަ ތަކެއްޗާއެކު ބޭނުންކުރާ ހުރިހާ ބާވަތެއް، ރާއްޖެ އެތެރެކުރުމާ ގެންގުޅުން ވެސް މި ގާނޫނުގެ ދަށުން މަނާވާނެ އެވެ.
