ނަޝީދުގެ އިތުބާރުނެތްކަމުގެ ވޯޓު ނުނަގައި މަޖިލީހުގެ މަސައްކަތްތަކުގައި އެއްބާރުލުން ނުލިބޭނެ: އެމްޑީޕީ ޕީޖީ ގްރޫޕް

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައިގައި ވޯޓު ނުނަގައި މަޖިލީހުގެ އެއްވެސް މަސައްކަތެއް ކުރިއަށްގެންދިއުމުގައި އެއްބާރުލުން ނުދިނުމަށް އެމްޑީޕީ ޕީޖީ ގްރޫޕުން ނިންމައިފިއެވެ.

ނަޝީދުގެ އިތުބާރު ނެތް ކަމަށް ފާސްކުރުމަށް އެމްޑީޕީ ޕީޖީ ގްރޫޕުން ވަނީ ތްރީލައިން ވިޕެއް ވެސް ނެރެފައެވެ. މިއާއެކު ކަންކަން ހިނގާނެގޮތާ ގުޅޭގޮތުން ބުދަ ދުވަހު އެ ގްރޫޕުގެ މެމްބަރުން ވަނީ މަޝްވަރާ ކޮށްފައެވެ.

މި މަޝްވަރާތަކަށްފަހު މީޑިއާތަކަށް މައުލޫމާތު ދެއްވަމުން ޕީޖީ ގްރޫޕުގެ ލީޑަރުު އަދި ހިތަދޫ އުތުރު ދާއިރާގެ މެމްބަރު މުޙައްމަދު އަސްލަމް ވިދާޅުވީ މަޖިލީހުގެ 205 ވަނަ މާއްދާގައި ބަޔާންކޮށްފައިވާ ގޮތުގައި އިތުބާރު ނެތްކަމުގެ މައްސަލައިގެ ނޯޓިސް އައުމަށްފަހު ބާއްވާ ޖަލްސާގައި އެ މައްސަލައެއް ހުށަހެޅެން ޖެހޭނެ ކަމަށެވެ. އަދި ޖަލްސާ ބާއްވަން ވެސް ޖެހޭނެ ކަމަށާއި އެ ޖަލްސާ ނުބާއްވައި މަޖިލީހުގެ އިތުރު އެއްވެސް ކަމެއް ކުރެވިގެން ނުވާނެ ކަމަށް ވެސް އޭނާ ވިދާޅުވިއެވެ.

މަޖިލީހުގެ ގަވާއިދުގައި މިގޮތަށް ބަޔާންކޮށްފައިވާއިރު މަޖިލީހުގެ ރައީސްގެ އިތުބާރު ނެތްކަމަށް ފާސްކުރުމުގެ ޖަލްސާ ނުބާއްވައި މަޖިލީހުގެ އެއްވެސް ކަމެއްގައި އެއްބާރުލުން އެމްޑީޕީ ޕީޖީ ގްރޫޕުން ނުދޭނެ ކަމަށް ވެސް އަސްލަމް ވިދާޅުވިއެވެ.

އަސްލަމް ވަނީ ގަދަބާރުން ރިޔާސަތުގައި އިންނަވައިގެން އެއްވެސް ކަމެއް ނުކުރެއްވުމަށް ނަޝީދުގެ ކިބައިން އެދިވަޑައިގެންފައެވެ. އަދި 49 މެމްބަރުންގެ ސޮޔާއެކު އެމަނިކުފާނުގެ އިތުބާރު ނެތްކަމުގެ މައްސަލަ ހުށަހަޅާފައިވާއިރު އިތުބާރު ނެތް ވެރިޔަކާއެކު މަސައްކަތް ނުކުރެވޭނެ ކަމަށާއި އެމަނިކުފާނަށް އިތުބާރު ނެތްކަން ގަބޫލުފުޅުކުރައްވައި ފަހަތަށްޖެހިވަޑައިގަތުމަކީ ޤައުމަށް ވެސް އެންމެ ރަނގަޅު ގޮތް ކަމުގައި އޭނާ ވިދާޅުވިއެވެ.

މި ނޫސްވެރިންގެ ބައްދަލުވުމުގައި މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވީ ނަޝީދުގެ އިތުބާރު ނެތްކަމުގެ މައްސަލައިގެ ޖަލްސާ ނުބާއްވައި ދެން ކުރާ ކަންކަމަކީ ގަވާއިދާ ޚިލާފަށް ކުރާ ކަންކަންކަމުގައި ދެކޭ ކަމަށެވެ. މީގެ ތެރޭގައި ނޮވެމްބަރު މަހުގެ 17 ވަނަ ދުވަހު ބާއްވާ އިންތިޚާބީ ރައީސް ޑރ. މުޙައްމަދު މުއިއްޒުގެ ހުވާކުރުމުގެ ރަސްމިއްޔާތުވެސް ހިމެނޭއިރު އެ ރަސްމިއްޔާތު ކުރިއަށްގެންދަންވާނީ މަޖިލީހުގެ އިތުބާރު އޮތް ރައީސަކާއެކުގައި ކަމަށް އޭނާ ވިދާޅުވިއެވެ.

މީގެ އިތުރުން އިތުބާރު ގެއްލިފައިވާ ރައީސަކު ގަދަކަމުން އެ މަގާމުގައި ހުންނަވައިގެން ހުވާކުރުމުގެ ރަސްމިއްޔާތު ބާއްވައިފިނަމަ އިންތިޚާބީ ރައީސް ހުށަހަޅުއްވާ ކެބިނެޓަށް ވެސް ބުނާނީ ނޫނެކޭ ކަމަށް ރޮޒައިނާ ވިދާޅުވިއެވެ.

ނަޝީދު މަޖިލީހުގެ ރައީސްކަމުން ވަކިކުރުމަށް، އެމަނިކުފާނަށް ނޯޓިސް ފޮނުވާފައިވަނީ 12 އޮކްޓޯބަރުގައެވެ. 49 މެންބަރުންގެ ސޮޔާއެކު، ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅާފައިވަނީ މި މަހުއެވެ.

އެމްޑީޕީ ޕީޖީން ގްރޫޕުން ބުނެފައިވާ ގޮތުގައި މަޖިލީހުގެ ނައިބު ރައިސް އީވާގެ އިތުބާރު ނެތް ކަމުގެ މައްސަލައަކާ ގުޅޭގޮތުން ވަކި ގޮތެއް އެ ގްރޫޕުން މިހާތަނަށް ނުނިންމައެވެ، އަދި ރިޔާސަތާ ހަވާލުވުމާ ގުޅޭގޮތުން ވެސް އަދި މަޝްވަރާ ނުކުރާ ކަމަށް އެ ގްރޫޕުގެ ލީޑަރު ވިދާޅުވިއެވެ.