ނަޝީދުގެ މައްސަލާގައި ކުރިއަށްދާނެ ގޮތަކާމެދު ބަންޑާރަ ނައިބާ މަޝްވަރާކުރަނީ
12 ނޮވެމްބަރު 2023 | އާދީއްތަ 12:33މަޖިލީހުގެ އިމްތިޔާޒަށް "އަރައިގެންނެވި" ކަމަށް ވިދާޅުވެ، ސުލޫކީ ކޮމިޓީއަށްވެސް އެމްޑީޕީގެ ފަރާތުން މައްސަލައެއް ހުށަހަޅާފައިވޭ
އޭޖީ ރިފްއަތު
ރައްޔިތުން މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައާ ގުޅިގެން އެ މައްސަލަ ކުރިއަށްގެންދާނެ ގޮތަކާމެދު ބަންޑާރަ ނައިބާ މަޝްވަރާކުރުމަށް މަޖިލީހުގެ އާންމު ކޮމިޓީން ނިންމައިފިއެވެ.
އާދިއްތަ ދުވަހުގެ ޖަލްސާއަށް އެޖެންޑާކޮށްފައި އޮތީ، މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައެވެ. ހެނދުނުގެ ޖަލްސާގެ ރިޔާސަތު ބެލެހެއްޓެވީ ވިލުފުށީ ދާއިރާގެ މެންބަރު ހަސަން އަފީފެވެ. ޖަލްސާގައި މަޖިލީހުގެ މެދުހެންވޭރު ދާއިރާގެ މެންބަރު އަލީ އާޒިމް ވަނީ، މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލާގައި ގަރާރެއްގެ ސިފަ ހަމަނުވާކަމަށް ވިދާޅުވެ ނިޒާމީ ނުކުތާއެއް ނަންގަވާފައެވެ. އެ ނިޒާމީ ނުކުތާ ބަލައިގަންނަވައި، އަފީފް ވިދާޅުވީ އެ މައްސަލަ ހުށަހަޅާފައިވަނީ ގަވާއިދާ ޚިލާފަށް ކަމަށާއި، އެ މައްސަލަ ކުރިއަށްނުގެންދެވޭނެ ކަަމަށެވެ. އެހެން ވިދާޅުވުމަށްފަހު އަފީފް ވަނީ ޖަލްސާ ނިންމަވާލައްވާފައެވެ.
މެންދުރު ބޭއްވި ޖަލްސާ ނިންމަވާލައްވަމުން އީވާ ވިދާޅުވީ، ނަޝީދުގެ އިތުބާރު ނެތްކަމުގެ މައްސަލައާމެދު ރިޔާސަތުން ގޮތެއް ކަނޑައަޅުއްވާފައިވާތީ މަޖިލީހުގައި ދެން އިތުރަށް އެ މައްސަލަ ކުރިއަށް ގެންދެވިދާނެ ކަމަށް ގަބޫލުނުކުރައްވާ ކަމަށެވެ. އެފަދައިން ވިދާޅުވުމަށްފަހު އީވާ ވަނީ ޖަލްސާ ނިންމަވާލައްވާފައެވެ. އީވާ ޖަލްސާ ނިންމަވާލެއްވީ މެންބަރުން އިހުތިޖާޖު ކުރައްވަމުން ދަނިކޮށެވެ.
މިކަމާ ގުޅިގެން އެމްޑީޕީ ޕީޖީ ގްރޫޕުގެ ފަރާތުން އަލިފުށީ ދާއިރާގެ މެމްބަރު މުހައްމަދު ރަޝީދު ވަނީ، ރިޔާސަތުން މަޖިލީސް ހުއްޓުވާފައި ވާކަމަށް ވިދާޅުވެ، އެ މައްސަލަ މަޖިލީހުގެ އާންމު ކޮމިޓީއަށް ހުށަހަޅާފައެވެ. އެގޮތުން އެ ކޮމިޓީގައި އެކަމުގެ ކަންބޮޑުވުން ފާޅުކުރައްވަމުން މެމްބަރު ރަޝީދު ވިދާޅުވީ، އާންމު ކޮމިޓީއަށް ލިބިފައިވާ މެންޑޭޓްގެ ތެރެއިން މި މައްސަލައިގެ ހައްލެއް ހޯދުމަށާއި، މަޖިލީހުގެ އަމީންއާންމަށް އެހީތެރިކަން ފޯރުކޮށްދިނުމަށް ބަންޑާރަ ނައިބުގެ ލަފައެއް ހޯދަންޖެހޭކަމަށެވެ.
މެމްބަރު ރަޝީދުގެ ހުށަހެޅުމާ އެއްކޮޅަށް ކޮމިޓީގައި ބައިވެރިވެވަޑައިގެންނެވި 7 މެމްބަރުން ވޯޓު ދެއްވިއެވެ.
މެމްބަރު ރަޝީދު މިހެން ވިދާޅުވެފައިވާއިރު، އާދިއްތަ ދުވަހު ހެނދުނުގެ ޖަލްސާވެސް، ރިޔާސަތުގައި އިންނެވި ވިލުފުށީ ދާއިރާގެ މެމްބަރު ހަސަން އަފީފް ނިންމާލެއްވީ، އަމީންއާންމު އެކަމާ ދެކޮޅަށް ލަފާއަރުވަނިކޮށެވެ.
އެމްޑީޕީގެ އިސްނެގުމުގެ މަތިން މަޖިލީހުގެ އާންމު ކޮމިޓީއަށް މައްސަލައެއް ހުށަހެޅިއިރު، އާދިއްތަ ދުވަހުގެ ދެ ޖަލްސާގެ ރިޔާސަތު ބެލެހެއްޓެވި އަފީފް އަދި އީވާ، މަޖިލީހުގެ އިމްތިޔާޒަށް "އަރައިގަންނަވާފައި" ވާކަމަށް ވިދާޅުވެ، އެ ބޭފުޅުންގެ މައްސަލައެއް ސުލޫކީ ކޮމިޓީއަށްވެސް ހުށަހެޅިއެވެ.
އެގޮތުން، އެ ދެބޭފުޅުންގެ ސުލޫކީ މައްސަލަ ކޮމިޓީއަށް ހުށަހެޅުއްވީ އެމްޑީޕީ ޕީޖީ ލީޑަރު، މުހައްމަދު އަސްލަމެވެ.
އަސްލަމް ހުށަހެޅުއްވި މައްސަލާގައި ވިދާޅުވެފައިވަނީ، ނަޝީދުގެ އިތުބާރު ނެތްކަމުގެ ގަރާރު ކުރިއަށްނުގެންދެވޭނެ ކަމަށް ނިންމަވައި އަފީފް ޖަލްސާ ނިންމަވާލެއްވީ މަޖިލީހުގެ ގަވައިދާ ޚިލާފަށް، މުޅި މަޖިލީހުގެ ހައްގަށް އުނިކަން އަންނަގޮތަށް ކަމަށެވެ.
އެ ކޮމެޓީގައި ދެ ކަމެއް ހުށަހެޅިއިރު، އެއީ ދެ މެންބަރުން މަޖިލީހުގެ އިމްތިޔާޒަށް "އަރައިގަންނަވާފައި" ވާކަމަށް ފާސްކުރުމަށާއި، އަދި މަސްލަހަތު ފުށުއަރާތީކަމަށް ވިދާޅުވެ، ނަޝީދުގެ އިތުބާރު ނެތްކަމުގެ ގަރާރު އެޖެންޑާކުރާ ޖަލްސާތަކުގައި (އަފީފާއި އީވާ ހިމެނޭގޮތުން) ދަ ޑިމޮކްރެޓްސްގެ މެންބަރުންނަށް ނުބެލެހެއްޓެވޭނެ ކަމަށް ނިންމައި އެކަން މަޖިލީހުގެ އިދާރާއަށް އެންގުމަށެވެ.
އެގޮތުން އެ ކޮމިޓީއަށް ހުށަހެޅި ދެ ކަންތައްވެސް ކޮމިޓީގެ ބައްދަލުވުމުގައި ފާސްކުރުމަށް ނިންމެވީ މެންބަރުންގެ އިއްތިފާގުންނެވެ.
