ސުޕްރީމް ކޯޓުން ގޮތެއް ނިންމެންދެން ރިޔާސަތުގައި އިންނަވަން އުޒުރުވެރިވެވަޑައިގަންނަވާކަމަށް މަޖިލީހުގެ ނާއިބުރައީސް އީވާ އަބްދުﷲ ވިދާޅުވުމުން، ރައްޔިތުންގެ މަޖިލީހުގެ މީދޫ ދާއިރާގެ މެންބަރު ރޮޒައިނާ އާދަމް ފާޑުވިދާޅުވެއްޖެއެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ އާދިއްތަ ދުވަހަށް ތާވަލްކޮށްފައި ވަނިކޮށް އެ ޖަލްސާ ވެސް ވަނީ ކެންސަލްކޮށްފައެވެ. މިއީ މި މައްސަލަ ތާވަލުކުރި 5 ވަނަ ފަހަރެވެ. އަދި ޖަލްސާ ނުބޭއްވެނީ މަޖިލީހުގެ ނައިބުރައީސާ އީވާ އަބްދުﷲ ސަލާމް ފޮނުއްވާތީއެވެ.

މީދޫ ދާއިރާގެ މެންބަރު ރޮޒައިނާ އާދަމް، މަޖިލީހުގެ ރައީސް އީވާއަށް ފާޑުވިދާޅުވެފައިވަނީ، މަޖިލީހުގެ ރައީސް، މުހައްމަދު ނަޝީދުގެ އިތުބާރު ނެތްކަމުގެ ގަރާރާ ގުޅިގެން އުފެދިފައިވާ މައްސަލަތަކުގައި ޖަލްސާތަކުގެ ރިޔާސަތު ބަލަހައްޓަވަން އީވާ ދެކޮޅު ހައްދަވާ، ސުޕްރީމް ކޯޓަށް ހުށަހަޅާފައިވާ މައްސަލައިގައި ގޮތެއް ނުނިމެނީސް ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާ ކަމަށް ވިދާޅުވުމާއި ގުޅިގެންނެވެ.

މިކަމާއި ގުޅިގެން ރޮޒައިނާ ކުރެއްވި ޓްވީޓުގައި ވަނީ އީވާ މި ދެއްކަވާ ވާހަކަފުޅަކީ ޖޯކެއްތޯ ސުވާލުކުރައްވާފައެވެ. އަދި ސުޕްރީމް ކޯޓަށް މައްސަލަ ހުށަހަޅަންޖެހުނީ މަޖިލީހުގެ ރައީސްގެ އިތުބާރު ނެތްކަމުގެ މައްސަލައިގެ ރިޔާސަތު ބަލަހައްޓަން އީވާ އުޒުރުވެރިވެވަޑައިގަތުމުން ކަމުން، މިހާރު ވިދާޅުވަނީ ސުޕްރީމް ކޯޓުން ގޮތެއް ނިންމަންދެން ރިޔާސަތު ނުބަލަހައްޓަވާނެ ކަމަށް ރޮޒައިނާ ވިދާޅުވިއެވެ. އެއީ ޖޯކެއްގެ ގޮތުގައި ސިފަކުރައްވާ ރޮޒައިނާ ވިދާޅުވީ ތިޔަ އަމަލުކުރައްވަނީ ޑިމޮކްރަސީގެ އެންމެ ރަނގަޅުގޮތުގައި ކަމަށެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ ގަރާރާ ގުޅިގެން އުފެދިފައިވާ މައްސަލަތަކުގައި ޖަލްސާތަކުގެ ރިޔާސަތު ބަލަހައްޓަވަން ދެކޮޅު ހައްދަވައި މަޖިލީހުގެ ނައިބު ރައީސް އީވާ އަބްދުﷲ ދެއްކެވި އުޒުރު ގަބޫލުނުކޮށް ޖަލްސާ ކުރިއަށް ގެންގޮސްދޭން މަޖިލީހުގެ އިދާރާއިން ވަނީ އެދިފައެވެ.

ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާ ކަމަށް ވިދާޅުވެ އީވާ މަޖިލީހަށް ފޮނުއްވި ސިޓީގައި ވިދާޅުވެފައިވަނީ ރައްޔިތުންގެ މަޖިލީހުން ވަކި ގޮތެއް އިހްތިޔާރު ކޮށްގެން ކުރިއަށް ގެންދިޔުމަކީ، ސުޕްރީމް ކޯޓުގައި ބަލަމުންދާ މައްސަލައަކަށް ނުފޫޒަކަށް ވާނެ ކަމެއްކަމަށް ދެކެވަޑައިގަންނަވާ ކަމަށެވެ.

ނަޝީދުގެ އިތުބާރު ނެތް ކަމަށް އެމްޑީޕީގެ 49 މެންބަރުން ސޮއިކުރައްވައި ހުށަހެޅި މައްސަލައިގެ ނޯޓިސް މުއްދަތު ހަމަވުމަށް ފަހު މަޖިލީހުގައި ހުރި އެހެން މަސައްކަތްތައް ހުއްޓާލާ އެ މައްސަލަ 5 ފަހަރެއްގެ މަތިން ވަނީ އެޖެންޑާކޮށްފައެވެ. ނަމަވެސް ޑެންގޫ ޖެހިގެން ކަމަށް ވިދާޅުވެ އެއިން އެއްވެސް ޖަލްސާއެއްގެ ރިޔާސަތު އީވާ ބަލަހައްޓަވާފައެއް ނުވެއެވެ.