ބަންގްލަދޭޝްގައި ހިނގި ރޭލު އެކްސިޑެންޓާއި ގުޅިގެން މިނިސްޓަރު ޝާހިދު ތައުޒިޔާ ވިދާޅުވެއްޖެ
ރާއްޖޭން ބަންގްލަދޭޝްއާއެކު ތިބިކަމުގެ ޔަގީންކަން ދެއްވި
ފޮރިން މިނިސްޓަރ އަބްދުﷲ ޝާހިދު
ބަންގްލަދޭޝްގައި ދެ ރޭލު ޖެހި ހިނގި ނުރައްކާތެރި އެކްސިޑެންޓްގައި ގިނަ އަދަދެއްގެ މީހުން މަރުވުމާއި ގުޅިގެން ރާއްޖޭގެ ފޮރިން މިނިސްޓަރު އަބްދުﷲ ޝާހިދު ތައުޒިޔާ ވިދާޅުވެއްޖެއެވެ.
މިނިސްޓަރު ޝާހިދު ވިދާޅުވީ ބަންގްލަދޭޝްގައި ހިނގި ރޭލު އެކްސިޑެންޓްގައި 17 މީހުން މަރުވެ، 100 އަށް ވުރެ ގިނަ މީހުން ޒަޚަމްވި ޚަބަރު އެއްސެވީ ފުން ހިތާމައާއެކު ކަމަށެވެ. މި ދަތި ދަނޑިވަޅުގައި ދިވެހިރާއްޖޭން ބަންގްލަދޭޝްއާއެކު ތިބިކަމުގެ ޔަގީންކަން މިނިސްޓަރު ޝާހިދު ދެއްވިއެވެ.
މީގެ އިތުރުން މިނިސްޓަރު ޝާހިދު ވަނީ މަރުވި މީހުންގެ އާއިލާތަކަށް ތައުޒިޔާ ވިދާޅުވެފައެވެ.
ބަންގްލަދޭޝްގެ އިރުއުތުރުގައިވާ ރަށެއްގައި ދަތުރު ކުރަމުން ދިޔަ ދެ ރޭލު ޖެހި ހިނގި އެކްސިޑެންޓެއްގައި 17 މީހުން މަރުވެފައިވާ ކަމަށް ރިޕޯޓުތަކުން ބުނެއެވެ. އަދި އިތުރު މީހުންގެ ހަށިގަނޑުތައް ހޯދުމަށް މަސައްކަތް ކުރަމުންދާ ކަމަށާއި، މަރުވި މީހުންގެ އަދަދު އިތުރުވާނެ ކަމަށް ބެލެވެއެވެ. އަދި 100 ށްވުރެ ގިނަ މީހުން ވަނީ ޒަހަމްވެފައެވެ.
މި އެކްސިޑެންޓް ހިނގާފައިވަނީ ބަންގްލަދޭޝްގެ ވެރިރަށް ޑާކާގެ އިރު އުތުރުން 80 ކިލޯމީޓަރު ދުރުގައި އޮންނަ ބައިރާބުގައި މުދާ އުފުލާ ރޭލެއް ފަސިންޖަރު ރޭލެއްގައި ޖެހިގެންނެވެ. މިހާދިސާ ހިނގަން މެދުވެރިވި ސަބަބު އަދި މިހާތަނަށް ދެނެގަނެވިފައި ނުވާއިރު، ކަމާބެހޭ ފަރާތްތަކުން ދަނީ މި އެކްސިޑެންްޓް އިތުރަށް ތަހުގީގު ކުރަމުންނެވެ.
