ހަމާސްއަށް ބަދަލުހިފުމުގެ ގޮތުން ޣައްޒާގެ ރައްޔިތުންނަށް އަދަބު ދިނުމަކީ އިންސާފެއްނޫން: އދ.ގެ ސެކްރެޓަރީ ޖެނެރަލް

ހަމާސްއިން ދިން ހަމަލާތަކުގެ ބަދަލު ހިފުމުގެ ގޮތުން ޣައްޒާގެ ޢާއްމު ހުރިހާ ރައްޔިތުންނަށް އަދަބު ދިނުމަކީ އިންސާފެއްނޫންކަމަށް އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވިދާޅުވެއްޖެއެވެ.

އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް މިހެން ވިދާޅުވީ ސަލާމަތީ މަޖިލީހުގައި މެދުއިރުމަތީގެ ހަމަނުޖެހުންތަކާ ބެހޭގޮތުން ދެއްކެވި ވާހަކަފުޅުގައެވެ.

ހަމާސް ޖަމާއަތުން އިސްރާއީލަށް ދިން ހަމަލާތަކަށް މުހާތަބު ކުރައްވައި ވިދާޅުވީ، އެ އަމަލުތައް ހިނގާފައިވަނީ ހުސްކަމެއްގެ ތެރޭގައި ނޫން ކަމަށެވެ. އެތައް ޒަމާނެއް ވަންދެން ފަލަސްތީނުގެ ވެރިކަމާއި، ބިމުގެ މައްސަލަތަކާއި، ހަމަނުޖެހުންތައް ތަހައްމަލު ކުރަމުން އަންނަ ފަލަސްތީނުގެ ރައްޔިތުންގެ ޒަމާންވީ ޝަކުވާތައް ގުޓަރޭޒް ވަނީ ގަބޫލުކުރައްވައިފަ އެވެ. ނަމަވެސް އެ ޝަކުވާތަކުން ހަމާސްގެ ހަމަލާތައް ޖަސްޓިފައި ނުކުރާ ކަމަށާއި އެއީ ބިރުވެރި ހަމަލާތަކެއް ކަމަށް އޭނާ ސިފަކުރެއްވި އެވެ.

ގުޓެރޭޒް ވަނީ ފަލަސްތީނުގެ ރައްޔިތުންގެ ތެރެއިން ވަކި ބައެއްގެ އަމަލުތަކެއްގެ ސަބަބުން ޢާއްމުންނަށް އަދަބު ދީގެން ނުވާނެ ކަމުގެ އުސޫލަށް ވެސް އަލިއަޅުއްވާލައްވާފައެވެ.

ސެކްރެޓަރީ ޖެނެރަލް ވަނީ ހަމަނުޖެހުންތަކުގައި ބައިވެރިވާ ހުރިހާ ފަރާތްތަކަކުން ވެސް އަސްކަރީ އޮޕަރޭޝަންތަކުގައި ސަމާލުވެ، އާންމުންގެ ހިމާޔަތަށް ސަމާލުކަން ދިނުމަށް ގޮވާލައްވާފަ އެވެ. އަދި ހޮސްޕިޓަލްތަކަށް އިހުތިރާމް ކުރުމަށާއި ފަލަސްތީނުގެ ހަ ލައްކައަށްވުރެ ގިނަ މީހުންނަށް މިހާރު ބޯހިޔާވަހިކަން ފޯރުކޮށްދެމުން އަންނަ އދ.ގެ ފެސިލިޓީތަކާ ގެއްލުން ދިނުން ފަދަ ކަންކަން ނުކުރުމަށް އޭނާ ވަނީ އިލްތިމާސްކުރައްވާފައެވެ.

އިސްރާއީލުން ޣައްޒާއަށް ދެމުން ގެންދާ ހަމަލާތައް އިތުރަށް ވަރުގަދަވަމުންދާތީ ގުޓެރޭޒް ވަނީ އާންމުން މަރުވާ މިންވަރު އިތުރުވެ އަވަށްތަކަށް ބޮޑެތި ގެއްލުންތަކެއް ލިބެމުންދާތީ ކަންބޮޑުވުން ފާޅުކުރައްވާފައެވެ. އޭނާ ވިދާޅުވީ ދާދި ފަހުން ޣައްޒާއަށް ދިން ބޮމުގެ ހަމަލާތަކުގައި ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ފަލަސްތީން ރެފިއުޖީސްގައި މަސައްކަތް ކުރާ އދގެ 35 ބައިވެރިންގެ ފުރާނަ ގެއްލިފައިވާ ކަމަށެވެ.

މީގެ އިތުރުން ގުޓަރޭޒް ވަނީ ޣައްޒާގައި ހިނގަމުންދާ އަމަލުތައް، ބައިނަލްއަގްވާމީ އިންސާނީ ގާނޫނާ ހިލާފުކަން ފާހަގަކުރައްވައި، އެއް މިލިއަނަށް ވުރެ ގިނަ މީހުން ޣައްޒާއިން ބޭރަށް ގެންދިއުމަށް އިސްރާއީލުން ނެރުނު އަމުރު ވެސް ފާހަގަކުރައްވާފަ އެވެ. އަދި ޣައްޒާއަށް ބޭނުންވާ އެހީ ނުލިބުމުގެ އިތުރުން ތެޔޮ ސަޕްލައި މަދުވުން ވެސް އޭނާ ފާހަގަކުރެއްވި އެވެ.

ސެކްރެޓަރީ ޖެނެރަލް ވަނީ މިހާރުން މިހާރަށް އިންސާނީ ހަނގުރާމަ ހުއްޓާލުމަށާއި ފަލަސްތީނާއި އިސްރާއީލުގެ މައްސަލައަށް ދެ ދައުލަތުގެ ހައްލެއް ގެނައުމަށާއި ހާލުގައި އަސީރުންގެ ގޮތުގައި ހައްޔަރުކޮށްފައިވާ އެންމެން ޝަރުތުތަކަކާ ނުލައި ވަގުތުން ދޫކޮށްލުމަށް ގޮވާލައްވާކަން ތަކުރާރުކުރައްވާފައެވެ.

މެދުއިރުމަތީގެ ހަމަނުޖެހުންތަކަކީ ބައިނަލްއަގްވާމީ މުޖުތަމައުގެ ވަރަށް ބޮޑު ކަންބޮޑުވުމެއް ކަމަށާއި، މި ސަރަހައްދުގައި ސުލްހަ މަސަލަސްކަން ގާއިމުކުރުމަށް ގިނަ މަސައްކަތްތަކެއް ކުރަމުންދާ ކަމަށް އޭނާގެ ތަޤްރީރުގައި ވިދާޅުވިއެވެ.