ހަމާސްގެ ބެލުމުގެ ދަށުގައި ތިބި އަސީރުން ތިބި ތަންތަނާގުޅޭ މައުލޫމާތު ދޭ ޣައްޒާ ރައްޔިތުންނަށް ސެކިޔުރިޓީއާއި ފައިސާ ދިނުމަށް އިސްރާއީލުން ހުށަހަޅައިފިއެވެ.

އަލްޖަޒީރާއިން ރިޕޯޓްކޮށްފައި ވާގޮތުގައި އިސްރާއީލުގެ އަސްކަރިއްޔާއިން ވަނީ، ހަމާސްގެ ބެލުމުގެ ދަށުގައި ތިބި ފަރާތްތައް ތިބި ތަންތަނާގުޅޭ މައުލޫމާތު ދޭ ފަރާތްތަކަށް ބަދަލެއްގެ ގޮތުގައި ރައްކާތެރިކަމާއި، ގެއްލުމުގެ ބަދަލު ދޭނެކަމަށް ބުނެފައެވެ.

އިސްރާއީލުގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ އެމީހަކާއި އެމީހެއްގެ ދަރިންނަށް ރަނގަޅު މުސްތަގުބަލެއް ބޭނުންވާ މީހަކު، ވީ އެންމެ އަވަހަކަށް އެމީހަކު ދިރިއުޅޭ ސަރަހައްދުގައި ހަމާސްއިން އަސީރުން ގެންގުޅޭ ތަންތަނގުޅޭ ބޭނުންތެރި ސައްހަ މައުލޫމާތު ފޯރުކޮށްދިނުމަށެވެ.

އަދި އެފަދަ މައުލޫމާތެއް ދޭ މީހަކަށާއި އެމީހަކު ދިރިއުޅޭ ގެއަށް، ސަލާމަތާއި ރައްކާތެރިކަން ދިނުމުގައި އިސްރާއީލު އަސްކަރިއްޔާއަށް ކުރެވެންހުރި ހުރިހާ މަސައްކަތެއް ކުރާނެކަމަށާއި، މީގެއިތުރުން އިނާމެއްގެ ގޮތުގައި ފައިސާ ދޭނެކަމަށްވެސް ބަޔާނުގައި ބުނެފައިވެއެވެ. މައުލޫމާތު ދޭ މީހުން ހާމަނުކުރާނެކަމުގެ ޔަގީންކަން އިސްރާއީލުން ދީފައިވާއިރު، އަސްކަރިއްޔާއަށް އެކަމުގެ މައުލޫމާތު ދޭންވީ ކޮންޓެކްޓްވެސް ވަނީ ހިމަނާފައެވެ.

ހަނގުރާމައަށް 17 ދުވަސް ވެފައިވާއިރު، އިސްރާއީލުން އަންނަނީ ފަލަސްތީނަށް މެދުކެނޑުމެއްނެތި ބޮން އަޅަމުންނެވެ. ޣައްޒާގެ އުތުރުގައި ދިރިއުޅޭ މީހުން އެސަރަހައްދު ދޫކޮށް ދާން ތަކުރާރުކޮށް އިސްރާއީލުން އަންގަމުންދާއިރު، މުޅި ޣައްޒާ އެއްކޮށް ވަނީ ބަންދުކޮށްފައެވެ. ރަފާހް ބޯޑަރު ސަރަހައްދުން މަދު އަދަދެއްގެ އެހީ ޣައްޒާއަށް އެތެރެވަމުންދާއިރު، އިސްރާއީލުން މަސައްކަތްކުރަމުން އަންނަނީ ޣައްޒާއަށް އެއްގަމު މަގުން އެރުމަށެވެ. ނަމަވެސް މިހާތަނަށް އެއްގަމު މަގުން އަދި ހަމަލާތައް ދޭން ފަށާފައެއްނުވެއެވެ.

އަނެއްކޮޅުން ހަމާސްއިން ހައްޔަރުކޮށްގެން އިސްރާއީލުން ގެންދިޔަ އަސީރުންގެ އަދަދު 200އަށްވުރެ މަތިއިރު، މިހާތަނަށް 4 މީހަކު ވަނީ ދޫކޮށްލާފައެވެ. އިސްރާއީލުން ގޮވާލަމުން އަންނަނީ އެއްވެސް ޝަރުތެއްނެތި އަސީރުން ދޫކޮށްލުމަށެވެ. މިހާތަނަށް އެއްވެސް ޝަރުތެއްނެތި 4 އަސީރުން ހަމާސްއިން ވަނީ ދޫކޮށްލާފައެވެ.

މީގެއިތުރުން އިސްރާއީލުން އަންނަނީ ހުޅަނގު އައްސޭރިން ގިނަ އަދަދެއްގެ ހަމާސްގެ ހަނގުރާމަވެރިން ހައްޔަރުކުރަމުންނެވެ. ހަނގުރާމަ ފެށުނުފަހުން ހައްޔަރުކުރި މީހުންގެ އަދަދު ވަނީ ވަރަށް ބޮޑުތަން އިތުރުވެފައެވެ. އިސްރާއީލު އަސްކަރިއްޔާއިން ހޯމަ ދުވަހު ބުނެފައިވަނީ، އޮކްޓޯބަރު މަހުގެ 7 ވަނަ ދުވަހުގެ ފަހުން، ޝައްކުކުރެވޭ 800 މީހުން ހައްޔަރުކޮށްފައި ވާކަމަށާއި އޭގެތެރޭގައި ހަމާސްއާ ގުޅުންހުރި 500 މީހުން ހިމެނޭކަމަށެވެ.

އިސްރާއީލުން ފަލަސްތީނަށް ދެމުންދާ ހަމަލާތަކުގައި ޝަހީދުވެފައިވާ މީހުންގެ އަދަދު 5000ން މައްޗަށް އަރާފައިވާއިރު، އޭގެތެރޭގައި 2000ށްވުރެ ގިނައީ ކުޑަކުދިންނެވެ.