ނަޝީދަށް ދިން ބޮމުގެ ހަމަލާ: އައްބާސްގެ ކަންބޮޑުވެވަޑައިގަތުމަކީ ކޯޓުގައި މައްސަލަ ކުރިއަށްދާލެއް ލަސްވުން

2021 ވަނަ އަހަރުގެ މެއި މަހުގެ 6ގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ހަމަލައާ ގުޅިގެން ކަންބޮޑުވެވަޑައިގަންނަވާ އެންމެ ބޮޑު މައްސަލައަކީ ކްރިމިނަލް ކޯޓުގައި ޝަރީއަތް ކުރިއަށްދިޔުން ލަސްވުން ކަމަށް، އެ ހަމަލާގެ ތަހުގީގު ކުރިއަށްދާގޮތް ބެއްލެވުމަށް ރައީސުލްޖުމްހޫރިއްޔާ އައްޔަންކުރެއްވި މަންދޫބު އައްބާސް ފާއިޒް ވިދާޅުވެއްޖެއެވެ.

އެ ހަމަލާގެ ތަހުގީގާ ގުޅުންހުރި އެންމެ ފަހުގެ މައުލޫމާތު ދެއްވުމަށް އަންގާރަ ދުވަހު ރައީސް އޮފީހުގައި ބޭއްވެވި ނޫސްވެރިންގެ ބައްދަލުވުމުގައި އައްބާސް ވިދާޅުވީ އެ މައްސަލައަކީ ސީރިއަސް މައްސަލައެއް ކަމަށާއި، އެފަދަ މައްސަލައެއްގެ ޝަރީއަތް ކުރިއަށްދާލެއް ލަސްވުމަކީ ކަންބޮޑުވެވަޑައިގަތުން އޮތް މައްސަލައެއް ކަމަށެވެ.

އަދި އެކަން އުއްތަމަ ފަނޑިޔާރަށާއި، ޖުޑީޝަލް ސަރވިސް ކޮމިޝަނަށާއި، ރައްޔިތުންގެ މަޖިލީހުގެ ޖުޑީޝަރީ ކޮމިޓީއާ ހިއްސާކުރެއްވުމުން، އެކި އިދާރާތަކުން ޝަރީއަތްތައް ލަސްވި ގިނަ ސަބަބުތަކެއް ބަޔާންކުރިކަމަށެވެ.

އައްބާސް ވިދާޅުވީ އެ މައްސަލަ ކުރިއަށްދިޔުން ލަސްވުމުގެ މައިގަނޑު ސަބަބަކީ ކްރިމިނަލް ކޯޓު ހިންގަމުން އަންނަ އިމާރާތުގެ ދަތިކަން ކަމަށް މައުލޫމާތު ލިބިވަޑައިގެންފައި ވާކަމަށެވެ. އަދި ކްރިމިނަލް ކޯޓު ހިންގަމުން އައި އިމާރާތް ހަލާކުވެ، މިހާރު މަސައްކަތް ކުރެވެނީ އެންމެ 10 ފަނޑިޔާރުންނަށްކަން އޭނާ ފާހަގަ ކުރެއްވިއެވެ.

އައްބާސްގެ އިތުރުން ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވީ، އެ މައްސަލައިގެ ޝަރީއަތް ކުރިއަށް ގެންދިޔުމުގައި ދިމާވާ އެންމެ ބޮޑު ދައްޗަކީ ކްރިމިނަލް ކޯޓުގެ ޖާގައިގެ ދަތިކަން ކަމަށެވެ. އެގޮތުން އެހެން ބައެއް އިދާރާތަކަށް ސަރުކާރުން ކުއްޔަށް ހިފާފައި ތަންތަން ދޫކުރާ ކަމަށާއި، އެހެން ނަމަވެސް ކްރިމިނަލް ކޯޓުގެ މަސައްކަތްތައް ދަތިކޮށް ހުންނައިރު އެފަދައިން އަމަލު ނުކުރާ ކަމަށެވެ.

ރައީސް ނަޝީދަށް ދިން ހަމަލާގެ މައްސަލާގައި ކުރިޔަށްދާ ތަހުގީގާއި އެންމެހާ ކޯޓު މަރުހަލާތައް ގާތުން ބެއްލެވުމަށްޓަކައި، ރައީސުލްޖުމްހޫރިއްޔާގެ ޚާއްސަ މަންދޫބެއްގެ ގޮތުން، އިނގިރޭސިވިލާތުގެ ރައްޔިތެއްކަމަށްވާ އައްބާސް ފާއިޒް ހަމަޖައްސަވާފައިވަނީ 2021 މެއި 19 ވަނަ ދުވަހުއެވެ.