ރާއްޖޭގެ ކުރިމަގަށް ކުރީގެ ރައީސް ސާލިހާއި ކުރީގެ ރައީސް ނަޝީދު އެކުގައި މަސައްކަތް ކުރައްވަންޖެހޭ: މެންބަރު އާޒިމް

ދިވެހިރާއްޖޭގެ ކުރިމަގަށް ކުރީގެ ރައީސް އިބްރާހިމް މުހައްމަދު ސާލިހާއި، ކުރީގެ ރައީސް މުހައްމަދު ނަޝީދު އެކުގައި މަސައްކަތް ކުރައްވަންޖެހޭ ކަމަށް މެދުހެންވޭރު ދާއިރާގެ މެންބަރު އަލީ އާޒިމް ވިދާޅުވެއްޖެއެވެ.

ރާއްޖެޓީވީގެ ފަށާއިރު ޕްރޮގްރާމްގައި މެންބަރު އާޒިމް ވިދާޅުވީ، ރައީސް ސާލިހާއި ރައީސް ނަޝީދު އަދިވެސް އެހައި ބޮޑަށް ރުޅިވެރިވެގެން އުޅުއްވާ ސަބަބާއި ގުޅޭގޮތުން ބައެއް މީހުން ސުވާލު އުފައްދަމުންދާ ކަމަށެވެ. އަދިވެސް ދެބޭފުޅުން ވާހަކަފުޅު ދައްކަވާހެން ޔަގީންނުކުރެއްވޭ ކަމަށާއި އަދި ވާހަކަފުޅު ނުދައްކަވާ ސަބަބުވެސް ޔަގީންނުކުރެއްވޭ ކަމަށް އާޒިމް ވިދާޅުވިއެވެ. އާޒިމް ވިދާޅުވީ އެ ދެބޭފުޅުންގެ ދެމެދުގައި އޮތް މި ނުތަނަވަސްކަމަކީ އާއިލީ މައްސަލައެއް ސަބަބުން ދިމާވެގެން އުޅޭ މައްސަލައެއް ކަމަށް ބެލެވޭކަމުގައެވެ.

Advertisement

ދެބޭފުޅުންގެ މައްސަލަތައް ހައްލުކޮށް، އެކުގައި އިށީންދެ ވަޑައިގެން މަޝްވަރާ މޭޒަށް ގެންނެވުމަށް މަސައްކަތްކުރެއްވި ނަމަވެސް، އެދެވޭ ނަތީޖާއެއް ނުނިކުންނަ ކަމަށް މެންބަރު އާޒިމް ވިދާޅުއެވެ.

މެންބަރު އާޒިމް ވިދާޅުވީ ކުރިއަށް އޮތްތަނުގައި ވެސް ދެބޭފުޅުން އެކުގައި މަސައްކަތް ކުރެވޭނެ ހާލަތެއް ގެނައުމަށް މަސައްކަތް ކުރާނެ ކަމަށެވެ. މިއީ ރާއްޖޭގެ ކުރިމަގަަށް ކޮންމެހެން ވެސް ކުރަންޖެހޭ ކަމެއް ކަމަށް އާޒިމް ވިދާޅުވިއެވެ.

މިސަރުކާރަށް އިޝާރާތް ކުރައްވައި އާޒިމް ވިދާޅުވީ މިހާރު ވެސް 200އެއްހައި ގާނޫނު ހަދާ ވާހަކަ މިސަރުކާރުން ދައްކަމުންދާ ކަމަށެވެ. ރައީސް ޑރ.މުހައްމަދު މުއިއްޒު ވެރިކަމަށް ވަޑައިގެންނެވީ ހުރިހާ މައުލޫމާތެއް އަދި ރައްޔިތުންނަށް ނުދައްކާނެ އެއްޗެއް ނޯންނާނެ ކަމަށް ވިދާޅުވުމަށްފަހު ކަމަށެވެ. ނަމަވެސް މައުލޫމާތު ހާމަނުކޮށް، ނޫސްވެރިންނަށް ދަތިކޮށް ކަންކަން ސިއްރުކުރަމުންދާ ކަމަށް އާޒިމް ވިދާޅުވިއެވެ.

އާޒިމް ވިދާޅުވީ ރާއްޖޭގެ އިގްތިސާދުގެ ހާލަތު ވެސް ރަނގަޅު ނޫން ކަމަށާއި، މިހާރު ވެސް އުޅެނީ ސަރުކާރުގެ މުވައްޒަފުންނަށް މުސާރަ ދޭނެ ގޮތް ނެތިގެން ކަމަށެވެ. އަދި މިސަރުކާރުގެ ކަންކަން ދާ ގޮތުން މިހާރު ފެނިގެންދަނީ ވަރަށް ނުރައްކާތެރި ހާލަތެއް ކަމަށް އާޒިމް ވިދާޅުވިއެވެ.