މެންބަރެއްގެ ހައިސިއްޔަތުން ލިބިވަޑައިގަންނަވާ މުސާރައިން ބައެއް އުނިކޮށްދެއްވުމަށް ނަޝީދު އެދިވަޑައިގެންފި
އެޕްރީލް 2024 ން ފެށިގެން މި ދައުރުގެ ބާކީ އޮތް މުއްދަތަށް މުސާރަ ނުދިނުމަށް ވަނީ އެދިވަޑައިގެންފަ
ކުރީގެ ރައީސް މުހައްމަދު ނަޝީދު
ރައްޔިތުންގެ މަޖިލީހުގެ މެންބަރެއްގެ ހައިސިއްޔަތުން ލިބިވަޑައިގަންނަވާ މުސާރަ އިން ބައެއް އުނިކޮށްދެއްވުމަށް ކުރީގެ ރައީސް އަދި މައްޗަންގޮޅި މެދު ދާއިރާގެ މެންބަރު މުހައްމަދު ނަޝީދު އެދިވަޑައިގެންފިއެވެ.
ރައްޔިތުންގެ މަޖިލީހުގެ ރައީސް މުހައްމަދު އަސްލަމަށް އެޑްރެސްކުރައްވާ ނަޝީދު ފޮނުއްވި ސިޓީފުޅުގައި ވިދާޅުވެފައިވަނީ އެމަނިކުފާނު މިވަގުތު ހުންނެވީ ކްލައިމެޓް ވަލްނަރަބްލް ފޯރަމް (ސީވީއެފް) ގެ ފުރަތަމަ ސެކްރެޓަރީ ޖެނެރަލްގެ ހައިސިއްޔަތުން ކުރަންޖެހޭ މަސައްކަތްތަކެއް ކުރެއްވުމަށް ގާނާގައި ކަމަށެވެ.
އަދި މިއިން ކޮންމެ ކަމެއްގައި ރަސްމީކޮށް ކަންކަން ހިންގުމަށް ވަރަށް ވަގުތު ނަގާ ކަން ފާހަގަ ކުރައްވާފައިވެއެވެ. އެގޮތުން، އެ މަސައްކަތާއި ވެސް ރަސްމީކޮށް ހަވާލުވުމުގެ ގޮތުން ހަމަޖައްސަންޖެހޭ އެތައްކަމެއް ކުރެވި މާޗް މަހުގެ މެދުތެރޭގައި ގާނާގެ ޕާލަމެންޓުން ވަނީ ސީވީއެފް ސެކްރެޓޭރިއަޓް އާއި ބެހޭ ގަރާރު ފާސްކޮށްފައިވާކަމަށްވިދާޅުވެ، މާތްﷲ ގެ ވާގިފުޅާއެކު އެންމެހާ ކަންކަން އަވަހަށް ހަމަޖެހިގެންދާނެ ކަމުގެ އުންމީދު ފާޅު ކުރައްވާފައިވެއެވެ.
އެހެންކަމުން އެޕްރީލް 2024 ން ފެށިގެން މި ދައުރުގެ ބާކީ އޮތް މުއްދަތަށް އެމަނިކުފާނަށް ރައްޔިތުންގެ މަޖިލިސްގެ މެންބަރެއްގެ ހައިސިއްޔަތުން ލިބޭ މުސާރަ އުނިކޮށް ދެއްވުމަށް ސިޓީގައި ވަނީ އެދިވަޑައިގަންނަވާފައެވެ.
