އުރުދުންގެ ކުޑަކުދިންގެ ފަރާތުން ޣައްޒާގެ ކުޑަކުދިންނަށް ތަފާތު މެސެޖެއް!

ޢުމަރު ޢުބައިދާތު، އޭނާގެ ކުޑަކުޑަ 3 ދަރިން ގޮވައިގެން އޮކްޓޯބަރު 22 ވަނަ ދުވަހު ނުކުތީ އުރުދުންގެ ވެރިރަށް، ޢައްމާންގެ މަގުތަކަށެވެ. އެއީ ފަލަސްޠީނުގެ ޙައްޤުގައި ކުރިއަށް ގެންދިޔަ ހިނގާލުމުގެ ބައިވެރިންގެ ގޮތުގައެވެ.

ޢުބައިދާތުގެ މަޤްޞަދަކަށް ވީ، ޣައްޒާގައި ޙާލުގައި ޖެހިފައި ވާ ކުޑަ ކުދިންނަށް އެހީތެރިކަމާއި އެއްބާރުލުން ދިނުމުގެ ރީތި އާދަތައް، އޭނާގެ ދަރިންނަށް ދަސްކޮށްދިނުމެވެ.

ޢުބައިދާތުގެ ދަރިންގެ އިތުރުން، އުރުދުންގެ އެތައް ކުދިންނެއް އާދީއްތަ ދުވަހުގެ ހަރަކާތުގައި ބައިވެރިވިއެވެ. އަދި އެއް ކުއްޖަކު އަނެއް ކުއްޖެއްގެ އަތުގައި ހިފާ، އެކުވެރިކަމުގެ ބަދަހި ޗޭނެއް ގަތާލިއެވެ. ޣައްޒާއާއި ޣައްޒާގެ ކުޑަ ކުދިންނާއެކު އުރުދުންގެ ކުދިންވެސް ތިބިކަން އަންގައިދިނުމަށެވެ.

ޔަހޫދީ އިޒްރޭލުގެ ޢުދުވާންތަކަށް މެދުކެނޑުމެއް ނާންނަތާ 2 ހަފުތާއަށް ވުރެ ގިނަ ދުވަސް ފާއިތުވެފައި ވާ އިރު، ޣައްޒާގެ ކުޑަ ކުދިން އުފުލަމުން ދާ، ޖިސްމާނީ ތަކުލީފުތަކުގެ އިތުރުން، ނަފްސާނީ ވޭނީ އާހަކީ، އެހެން ބަޔަކަށް ވަޒަންވެސް ކޮށްލެވޭނެ ވަރުގެ ކަމެއް ނޫނެވެ.

ވަޤުތީ ހިޔާތަކުގައި ތިއްބެއް ކަމަކު، އިޒްރޭލުގެ ޢުދުވާންތަކުން ސަލާމަތެއް ނެތް ކަމުގެ އިޙުސާސް އެ ކުދިން ކުރެއެވެ. އުޅޭ އުޅުމުގައި އިވޭ ކުދިކުދި އަޑުތަކަށް ސިހެއެވެ. ރޭގަނޑުގެ ހަމަ ނިދިން އެކުދިން ވަނީ މަޙްރޫމުވެފައެވެ.

ޢުމުރުން އެންމެ 11 އަހަރުގެ ރީމާސް އަބޫ ޠަބީޚްއަކީ އޭނާގެ މުޅި ޢުމުރު، އިންތިހާ ބިރުވެރިކަމާއި، ހާސް ކަމާއި ނުތަނަވަސްކަމުގައި ހޭދަ ކުރަމުން ދާ މަޢުސޫމު ކުއްޖެކެވެ. އުފަންވީއްސުރެ ޣައްޒާ ދުށް އެތައް ހަނގުރާމައެއް އޭނާ ތަޖުރިބާ ކޮށްފިއެވެ. ދިރިއުޅުމުގައި އެނޫން ކަމެއް ނެތް ފަދައެވެ.

އިޒްރޭލުގެ ރަޙުމެއް ނެތް ޢުދުވާނީ ޙަމަލާތައް ޣައްޒާއަށް އަމާޒު ކުރަމުން ދަނީ އެޔެއް މިޔެއް ބެލުމެއް ނެތިއެވެ. އެ ބަޔަކަށް އެންމެ ރައްކާތެރި ކަމަށް ފެންނަ ތަނަކަށް ކޮންމެ ޢާއިލާއަކުންވެސް ބަދަލުވ ވަނީއެވެ. ރީމާސްއާއި އޭނާގެ ޢާއިލާއިން ހިޔާވަހިކަން ހޯދަމުން ދަނީ އަލް-ޝިފާ ހޮސްޕިޓަލުގެ ބޭރުގައި ޖަހަފާއިވާ ބަނޑަހަގެއެއްގައެވެ.

ޢުމުރުން 15 އަހަރުގެ މުޙައްމަދު ހަލާސްއަކީވެސް އިޒްރޭލުގެ ޢުދުވާންތަކުގައި އޭނާގެ ދިރިއުޅުން އެ ފުއްމިފުށަށް ޖެހިފައިވާ ފުރާވަރު ޢުމުރުގެ ކުއްޖެކެވެ. ރީމާސް ފަދައިން ހަލާސްވެސް ދިރިއުޅެމުން ދަނީ އަލް-ޝިފާ ހޮސްޕިޓަލު ސަރަޙައްދުގައެވެ.

އިންސާނީ ޙައްޤުތަކަށް ވަކާލާތު ކުރަމުން ދާ ހުޅަނގުގެ ބާރުތަކުގެ ލޯތަކަށް ނުފެނު ކަމުގައި ވީ ނަމަވެސް، ޣައްޒާގެ މަޞްރަޙުން ލިބެމުން ދާ މަންޒަރުތަކާއި އިވެމުން ދާ އަޑުތަކަކީ އިންސާނިއްޔަތުކަމުގެ ޒައްރެއްގެ މިންވަރުވެސް އެމީހެއްގެ ހިތުވިންދުގައި ޖަހާ އެއްވެސް މީހަކަށް، އެއްޗެއް ނުބުނެ، ކެތްކޮށްލައިގެން ހިމޭނުން ހުރެވޭނެ ވަރުގެ މަންޒަރުތަކަކާއި އަޑުތަކެއް ނޫނެވެ.

2.3 މިލިއަން މީހުންގެ އާބާދީއެއް އޮތް ޣައްޒާގެ އާބާދީގެ ގާތްގަނޑަކަށް 2 ބައިކުޅަ 1 ބައި ހިއްސާ ކުރަނީވެސް ކުޑަ ކުދިންނެވެ. އދއިން ހިންގަމުންދާ ސްކޫލު ޢިމާރާތްތައް، ވަޤުތީ ހިޔާތަކުގެ ގޮތުގައި ބޭނުން ކުރަމުން ދާ އިރު، އެންމެ ކުލާހެއްގެ ތެރޭގައިވެސް 100 އެއްހާ މީހުން މިއަދު ދަނީ ދިރިއުޅެމުންނެވެ. އޭގެ ތެރޭގައިވެސް ގިނައީ ހަމަ ކުޑަކުދިންނެވެ.