ހެލްތީ އިވެންޓްސް ގައިޑްލައިނަށް އަމަލުކުރަން ފަށައިފި
މިއުސޫލަށް ސާރުކާރު އާއި އަދި ސަރުކާރު ހިއްސާވާ ކުންފުނިތަން ޢަމަލު ކުރުމަށް އެދިފައިވޭ
ހެލްތީ އިވެންޓްސް ގައިޑްލައިނަކީ ރަސްމިއްޔާތުތަކާއި ޙަފްލާތައް ޞިއްޙީ ގޮތުން ދުޅަހެޔޮ ހަރަކާތްތަކަކަށް ހެދުމާ ގުޅޭ ގައިޑްލައިނެއް
ހެލްތީ އިވެންޓްސް ގައިޑްލައިންކަމަށްވާ "ދިވެހިރާއްޖޭގައި ބާއްވާ ރަސްމިއްޔާތުތަކާއި ޙަފްލާތައް ޞިއްޙީ ގޮތުން ދުޅަހެޔޮ ހަރަކާތްތަކަކަށް ހެދުމާ ގުޅޭ ގައިޑްލައިން" އަށް އަމަލުކުރަން ފަށައިފިއެވެ.
މި ގައިޑްލައިނަކީ ސިއްޙީގޮތުން ރަނގަޅު އާދަކާދަ އާންމު ދިރިއުޅުމުގައި ބޭނުންކުރުމަށް ބާރުއެޅުމާއި ސާރުކާރާއި ސަރުކާރު ހިއްސާވާ ކުންފުނިތަކުން ރާވާ ހިންގާ ކުޅިވަރު މުބާރާތްތަކާއި، ފެއަރ އަދި މިއުޒިކް ޝޯތަކުގެ އިތުރުން ސްކޫލްތަކުގައާއި އޮފީސްތަކުން ކުރިޔަށްގެންދާ އެކިއެކި ރަސްމިއްޔާތުތަކާއި ބައްދަލުވުންތަކާއި މުނާސަބަތުތަކާއި މުހިންމު ދުވަސްތައް ފާހަގަ ކުރަން ބާއްވާ ޙަފްލާތަކާއި އެއްވުންތައް ސިއްހީ ދުޅަހެޔޮކަމަށް ބާރުދޭ ބައްދަލުވުންތަކަކަށް ހެދުމުގެ މަގުސަދުގައި އެކުލަވާލެވިފައިވާ ގައިޑްލައިނެކެވެ.
ގައިޑްލައިންގައި ބައްދަލުވުންތައް އިންތިޒާމް ކުރުމުގެ ކުރިން ސަމާލުވާންވީ ކަންކަން އެއްހަމައެއްގެ ތެރެއިން ކަނޑައެޅި، ދެމެހެއްޓެނިވި ގޮތެއްގައި ކަންކަން ކުރާނެގޮތައި، ހަރަކާތްތަކާއި ބައްދަލުވުންތަކުގައި ސިއްހަތަށް ފައިދާހުރި ކެއިންބުއިން ފޯރުކޮށްދިނުމާއި، ދުންފަތުގެ އިސްތިއުމާލު ނުކުރާ ޖިސްމާނީ ހަރަކާތްތެރިކަމަށް ހިތްވަރުދޭ މާޙައުލެއް ތަނަވަސްކޮށްދިނުމާއެކު ޞިއްޙީ ގޮތުން ފައިދާހުރި ގޮތަށް ހަރަކާތްތައް ބައްޓަން ކުރާނެ ގޮތްތައް ހިމެނިފައިވެއެވެ.
އަދި މި ގައިޑްލައިނަށް ސާރުކާރާއި ސަރުކާރު ހިއްސާވާ ކުންފުނިތަން ޢަމަލު ކުރުމަށް ނަސޭހަތްތެރިވެ ބާރުއެޅުމާއެކު މި ގައިޑްލައިންގައިވާ ކަންކަން ތަންފީޒު ކުރެންވެމުންދާވަރު ކަމާގުޅުންހުރި އިދާރާތަކުން މޮނީޓަރުކޮށް އަޅަންޖެހޭ ފިޔަވަޅުތައް އެޅުމަށް ސޯޝަލް ކައުސިލްއިން ވަނީ ނިންމަވާފައެވެ.
