މާލީ މައްސަލަ ބޮޑުވެފައިވާ އެފްއޭއެމަށް ފުލުހުން ވަދެ، ބަލައި ފާސްކުރަނީ

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ބަލައި ފާސް ކުރަން ދިވެހި ފުލުހުން ފަށައިފި އެވެ.

ފުލުހުންގެ މީޑިއާ އިން ހާމަކޮށްފައިވާ ގޮތުގައި، އާދިއްތަ ދުވަހުގެ ހެނދުނު ފުލުހުން ދަނީ އެފްއޭއެމްގައި ޙަރަކާތްތެރިވަމުންނެވެ. އެއީ މާލީ މައްސަލަތަކެއްގައި އެފްއޭއެމާ ދެކޮޅަށް ފުލުހުން ހިންގަމުންދާ ޖިނާއީ ތަހުގީގަކަށް ބޭނުންވާ މައުލޫމާތު ހޯދުމަށް، ޕްރޮސެކިއުޓާ ޖެނެރަލް (ޕީޖީ)ގެ އޮފީހުން އަންގައިގެން ކަމަށް ފުލުހުން ވަނީ ބުނެފަ އެވެ.

މި ފަހުން އައިސް އެފްއޭއެމްގެ މާލީ މައްސަތައް ވަނީ އިންތިހާއަށް ބޮޑުވެ، އެފްއޭއެމް ބަނގުރޫޓުވާން ކައިރިވެފަ އެވެ. އެގޮތުން އެ އިދާރާގައި މަސައްކަތް ކުރަމުން އަންނަ މުވައްޒަފުންނަށް މުސާރަ ނުދެވޭތާ ގިނަ މަސްތަކެއް ވެފައިވާއިރު، މުވައްޒަފުންގެ ޕެންޝަން ފައިސާ އަށް ވެސް ވަނީ ޚިޔާނާތްތެރިވެފަ އެވެ. އަނެއްކޮޅުން، އެކި އެކި ތަންތަނު ޚިދުމަަތް ހޯދުމަށް އެތަންތަނަށް ދައްކަން ޖެހޭ ފައިސާ ވެސް އޮތީ ނުދައްކަ އެވެ. އެކަމުގެ ސަބަބުން އެފްއޭއެމާ ދެކޮޅަށް ކޯޓުން ޙުކުމްތައް އިއްވަމުންދާއިރު، އެ ފައިސާ ދެއްކި ކަމެއް ނުވަތަ ނޫން ކަމެއް ސާފެއް ނުވެ އެވެ.

ފުޓުބޯޅައިގެ ޙާލަތު އިންތިހާ އަށް ދަށްވެފައިވާއިރު، އެފްއޭއެމްގެ ރައީސް ބައްސާމް އަދީލް ޖަލީލްގެ އިސްތިއުފާ އަށް ގޮވާލާ އަޑު ވެސް ވަނީ ގަދަވެފަ އެވެ. އެހެން ނަމަވެސް، ތަކުރާރުކޮށް ބައްްސާމް ވިދާޅުވަމުން ގެންދަވަނީ އިސްތިއުފާ ދޭން ޖެހިވަޑައިގަންނަވާ ކަމަށް ޤަބޫލު ނުކުރައްވާ ކަމަށެވެ. ދާދި ފަހުން އެފްއޭއެމްގެ ހިންގާ ކޮމެޓީން އެ އިދާރާގެ ނާއިބު ރައީސް ޙުސެއިން ޝާފިއު (ކޮއްކީ) އަދި ކްލަބް ގްރީން ސްޓްރީޓްސްގެ ރައީސް މުއާވިޔަތު ހަލީލް (މުއާބެ) ވަނީ އިސްތިއުފާ ދެއްވާފަ އެވެ. މައުލޫމާތު ލިބިފައިވާ ގޮތުގައި މި ދެ ބޭފުޅުން ވެސް އިސްތިއުފާ ދެއްވީ ބައްސާމްގެ ލީޑާޝިޕްގައި ފުޓުބޯޅަ އަށް ގެއްލުން ވަމުންދާތީ އެވެ.